شەتەلدە تەگىن ءبىلىم الۋعا نيەتتى اتىراۋلىقتار ءۇشىن جاقسى مۇمكىندىك بار. وبلىس اكىمدىگى مەن «حالىقارالىق باعدارلامالار ورتالىعى» اق-تىڭ ۇيىمداستىرۋىمەن اتىراۋدا 12-13 قاراشادا «International Education Fair» شەتەلدىك جوعارى وقۋ ورىندارىنىڭ ءىرى كورمەسى وتۋدە. مۇنايلى ايماققا الەمنىڭ 40 ەلىنەن 200 ۋنيۆەرسيتەتتىڭ وكىلدەرى – «حالىقارالىق باعدارلامالار ورتالىعى» اق-تىڭ سەرىكتەستەرى كەلمەك. شارادا قازاقستاندىقتاردىڭ شەتەلدە تەگىن ءبىلىم الۋلارى ءۇشىن 20 مىڭ گرانت ۇسىنىلادى. «حالىقارالىق باعدارلامالار ورتالىعى» اق پرەزيدەنتى جانبولات مەلدەشوۆتىڭ ايتۋىنشا, كورمەدە شەتەلدىك جوعارى وقۋ ورىندارىنىڭ وكىلدەرىمەن تىكەلەي سويلەسۋگە, شەتەلدە تەگىن ءبىلىم الۋ تۋرالى بىلۋگە, سونداي-اق ءبىلىم بەرۋ سالاسىنداعى ماسەلەلەر بويىنشا كاسىبي كەڭەس الۋعا بولادى. ساراپشىلاردان گرانتتار مەن ستيپەنديالار تۋرالى اقپارات الۋعا, كورمەدە قولجەتىمدى ارنايى ۇسىنىستارعا قاتىسىپ, تانىمال حالىقارالىق ەمتيحانداردى تابىستى تاپسىرۋدىڭ باستى قۇپيالارى تۋرالى بىلۋگە دە مۇمكىندىك بار.
– «International Education Fair» حالىقارالىق ءبىلىم بەرۋ كورمەسى اتىراۋ وبلىسىنىڭ تۇلەكتەرى ءۇشىن وتە وزەكتى. ويتكەنى ءبىزدىڭ ءوڭىرىمىز بەلسەندى قارقىنمەن دامىپ كەلەدى, بۇل جونىندە الەۋمەتتىك-ەكونوميكالىق دامۋ كورسەتكىشتەرى بويىنشا ايتۋعا بولادى. بۇگىندە ەڭبەك نارىعىندا شەت تىلدەرىن بىلەتىن جانە شەتەلدىك تاجىريبەسى بار كەڭ بەيىندى ماماندار سۇرانىسقا يە. ءوڭىردىڭ ودان ءارى وركەندەۋى ءۇشىن بىزگە مىقتى ماماندار قاجەت. سوندىقتان دا اتىراۋدا حالىقارالىق ءبىلىم كورمەسىن وتكىزۋ تۋرالى شەشىم قابىلداندى, – دەيدى وبلىس اكىمىنىڭ ورىنباسارى نۇرساۋلە سايلاۋوۆا.
ەلباسى 5 قازانداعى جولداۋىندا 2019 جىلدى جاستار جىلى دەپ جاريالاعان بولاتىن. اتىراۋ ايماعىندا جاستار جىلىنا دايىندىق شارالارى باستالىپ كەتتى. بۇل شارا دا ەل ەرتەڭىنىڭ كەلەشەگى كەمەل بولۋى جولىنداعى ءبىر ماڭىزدى قادام بولارى انىق.
باقىتگۇل باباش,
«ەگەمەن قازاقستان»
اتىراۋ
