ۆەدومستۆو باسشىلارىنىڭ كەزدەسۋىندەگى قۇتتىقتاۋ سوزىندە قور باسشىسى نۇرتاي ابىقاەۆ تۇرىك تاراپقا شارانىڭ جوعارى دەڭگەيدە ۇيىمداستىرىلۋىنا العىس ايتىپ, اتالمىش كەزدەسۋ بۇدان بىلايعى تابىستى ىنتىماقتاستىقتىڭ باستاۋى بولاتىنىنا سەنىم ءبىلدىردى. قور پرەزيدەنتى باۋىرلاس ەلدەر اراسىندا تۇركيا رەسپۋبليكاسى ماڭىزدى, ەرەكشە ورىنعا يە ەكەندىگىن العا تارتتى. وعان سەبەپ – تۇركيانىڭ قازاق حالقىنا تانىتقان قوناقجايلىعى, باۋىرلاس حالقىنىڭ كورشىلەس ەلدەگى تىنىش ءومىرى مەن ءارى قارايعى دامۋىنا جاساعان مول مۇمكىندىگى. سونىمەن قاتار, نۇرتاي ابىقاەۆ قازاقستان حالقىنىڭ تاۋەلسىزدىگىن ەڭ ءبىرىنشى بولىپ مويىنداعان دا وسى تۇركيا رەسپۋبليكاسى بولعاندىعىن ەرەكشە اتاپ ءوتتى.
كەزدەسۋ قورىتىندىسى بويىنشا تاراپتار دياسپورا ىستەرىنە جاۋاپتى تۇركى كەڭەسىنىڭ ءتورتىنشى كەزدەسۋىن قازاقستاندا – تۇركىستان قالاسىندا وتكىزۋدى ءبىراۋىزدان ماقۇلدادى.
ءىسساپار اياسىندا قازاقستاندىق دەلەگاتسيانىڭ تۇركيا ۆيتسە-ءمينيسترى فۋات وكتايمەن, تۇركيا رەسپۋبليكاسىنىڭ شەتەلدەگى تۇرىكتەر مەن ولارعا بايلانىستى قاۋىمداستىقتار جونىندەگى تورالقا باسشىسى ابدۋللاح ەرەنمەن, يۋنۋس ەمرە ينستيتۋتىنىڭ ديرەكتورى شەرەف اتەشپەن, ستامبۇل قالاسى مەرىنىڭ ءبىرىنشى ورىنباسارى احمەت سەلامەتپەن جانە تۇركى كەڭەسىنىڭ باس حاتشىسى باعدات امىرەەۆپەن كەزدەسۋلەرى ءوتتى. تاراپتار تۇركىتىلدى دياسپورالاردىڭ ستراتەگيالىق, ەكونوميكالىق, مادەني دامۋىنداعى ەكىجاقتى جانە كوپجاقتى سەرىكتەستىكتىڭ نەگىزگى ماسەلەلەرىن تالقىلادى. كەلىسسوزدەردىڭ قورىتىندىسى بويىنشا «وتانداستار» قورى تۇرىك تاراپپەن سەرىكتەستىك تۋرالى بىرقاتار كەلىسىمدەرگە قول قويدى. اتاپ ايتقاندا, يۋنۋس ەمرە ينستيتۋتىمەن قازاق ءتىلىن الەمنىڭ 60 مەملەكەتىندە ورنالاسقان وقۋ ورتالىقتارىندا وقىتۋعا مۇمكىندىك بەرۋ تۋرالى ءبىتىم جاسالدى.
9 قاراشادا ستامبۇل قالاسىندا دارحان كالەتاەۆ پەن نۇرتاي ابىقاەۆ تۇركيا جانە ەۋروپاداعى شەتەلدىك قازاق ۇيىمدارىنىڭ مانسۇر ءتايجى, ياكۋپ جان, فازىل توپلۋ, ابدۋاقاپ قارا سياقتى بەلدى ءارى بەلسەندى باسشىلارىمەن كەزدەسۋ وتكىزدى. قازاق دياسپورالارىنىڭ وكىلدەرى جىراقتا جۇرسە دە تاريحي وتانىمەن اجىراماس بايلانىستا ەكەندىگىن, قازاقستاندا بولىپ جاتقان بارلىق ماڭىزدى جايتتاردان حاباردار ەكەندىگىن جانە وسكەلەڭ ۇرپاق تۋعان ءتىلىن, مادەنيەتىن جانە سالت-ءداستۇرىن مەڭگەرۋدە ۇلكەن قولداۋعا يە ەكەندىگىن جەتكىزدى.
نۇرتاي ابىقاەۆ تۇركياداعى قانداستارعا ءوزى باسشىلىق ەتىپ وتىرعان ەلباسى تاپسىرماسىمەن قۇرىلعان «وتانداستار» قورىنىڭ ماقسات-مىندەتتەرىن تانىستىردى. قور باسشىسىنىڭ ايتۋىنشا, بىرلەستىكتىڭ قىزمەتى سىرتتاعى باۋىرلار مەن شەتەلدەن تاريحي وتانىنا ورالعان قازاقتارعا جان-جاقتى قولداۋ كورسەتۋگە باعىتتالعان. قوردىڭ باستى مىندەتى – قازاقستانعا كەلگەن ەتنيكالىق قازاقتاردىڭ بەيىمدەلۋى مەن كىرىگۋىنە جاردەمدەسىپ, ولارعا اقپاراتتىق, ۇيىمداستىرۋشىلىق, كونسۋلتاتسيالىق كومەك كورسەتۋ, سونىمەن بىرگە, الىس-جاقىن شەتەلدەردەگى قازاق ديساپورالارىمەن مادەني, ىسكەرلىك بايلانىستى ساقتاۋ جانە دامىتۋ, دەدى نۇرتاي ابىقاەۆ.
قوردىڭ العاشقى رەسمي شاراسى – 7 قاراشادا استانا قالاسىندا شەتەلدە تۇراتىن وتانداستارىمىزدىڭ قاتىسۋىمەن وتكەن «قاسيەتتى قازاق ەلى» حالىقارالىق ونەر فەستيۆالى. شاراعا فرانتسيا, گەرمانيا, قىتاي, رەسەي, موڭعوليا, تۇركيا, يران, وزبەكستان, قىرعىزستان جانە اۋعانستان قاتارلى الىس-جاقىن شەتەلدەردەن 50-دەن استام ونەرپاز قاتىستى. جاقىن ارادا قور شەتەلدەردە تۇراتىن اعايىنداردىڭ قازاقستاننىڭ قاسيەتتى جەرلەرىنە تانىمدىق ەكسكۋرسياسى مەن رەسەي فەدەراتسياسىندا دۇنيەجۇزى قازاقتارىنىڭ كىشى قۇرىلتايىن وتكىزۋدى جوسپارلاپ وتىر.
