بۇل كەزدەسۋدىڭ بىرەگەيلىگى, قازىرگى تاريحتاعى العاش رەت رەسمي كابۋل مەن قارۋلى وپپوزيتسيا وكىلدەرى بىرىڭعاي كەلىسسوزدەر ۇستەلىندە وتىرعانى بولىپ تابىلادى.
كونسۋلتاتسيالار بارىسىندا تاراپتار اۋعانارالىق تاتۋلاسۋعا قاتىستى ماسەلەلەردىڭ كەڭ اۋقىمى تالقىلانىپ, اتاپ ايتقاندا اۋعانستانداعى ۇزاق سوعىستى توقتاتۋدىڭ شەشۋ جولدارى ۇسىنىلدى.
وتىرىستى رەسەي سىرتقى ىستەر ءمينيسترى سەرگەي لاۆروۆ اشتى. ءىس-شاراداعى سپيكەرلەر اۋعانستانداعى ساياسي كۇشتەر اراسىندا تىكەلەي جان-جاقتى كەلىسسوزدەر جۇرگىزۋ ارقىلى سول ەلدەگى بەيبىتشىلىكتى قالپىنا كەلتىرۋدى ۇسىندى.
قازاقستاندىق دەلەگاتسيانى سىرتقى ىستەر ءمينيسترىنىڭ ءبىرىنشى ورىنباسارى مۇحتار تىلەۋبەردى باسقاردى. ءوز سوزىندە قازاقستاندىق ديپلومات ورتالىق ازيا ەلدەرىنىڭ ورتاق شەكارالارى بار بولۋى سەبەبىنەن اۋعانستانداعى بەيبىتشىلىك ورناتۋدىڭ ماڭىزدىلىعىن اتاپ ءوتىپ, اۋعانستاندى ايماقتىق ينتەگراتسيالىق پروتسەستەرىنە تارتۋدى ۇسىندى. سونداي-اق, قازاقستاندىق تاراپپەن اۋعانستانداعى بەيبىتشىلىكتى قالپىنا كەلتىرۋگە, سونىڭ ىشىندە بۇۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندە جانە ەكىجاقتى ۋاعدالاستىقتاردىڭ شەڭبەرىندە ەلىمىز قوسقان ۇلەسى تۋرالى اتاپ ءوتىلدى.
كونسۋلتاتسيالاردىڭ قورىتىندىلارى بويىنشا تاراپتار بۇنداي فورماتتا اۋعانارالىق تاتۋلاسۋ ماسەلەسىن تالقىلاۋدى جالعاستىرۋعا كەلىستى. قالىپتاسقان ءداستۇر بويىنشا قورىتىندى قۇجات قابىلدانباي, كەلەسى كەزدەسۋدىڭ ءوتۋ مەرزىمدەرى بەلگىلەنبەدى.
