كەزدەسۋ بارىسىندا ەكىجاقتى ساياسي قاتىناستاردىڭ جاي-كۇيى مەن كەلەشەگى, قازاقستان مەن قىتاي اراسىنداعى ساۋدا-ەكونوميكالىق, مادەني-گۋمانيتارلىق ىنتىماقتاستىقتىڭ وزەكتى ماسەلەلەرى, قاۋىپسىزدىك پروبلەمالارى بويىنشا ءوزارا ىقپالداستىق تالقىلاندى. ءوزارا قىزىعۋشىلىق تۋدىراتىن قازىرگى زامانعى وزەكتى ماسەلەلەردىڭ بۇكىل سپەكترى بويىنشا ديالوگتى دامىتۋدىڭ ماڭىزدىلىعى ايرىقشا اتاپ ءوتىلدى.
قازاقستان پرەزيدەنتى نۇرسۇلتان نازارباەۆتىڭ قحر-عا مەملەكەتتىك ساپارى جانە ونىڭ 2018 جىلدىڭ ماۋسىم ايىندا شىۇ سامميتىنە قاتىسۋى قورىتىندىسى نەگىزىندە قول جەتكىزىلگەن ەكىجاقتى كەلىسىمدەردى جۇزەگە اسىرۋ بارىسىن تالقىلاۋعا ەرەكشە نازار اۋدارىلدى.
ق. ءابدىراحمانوۆتىڭ ايتۋىنشا, استانا مەن پەكين اراسىنداعى جان-جاقتى تابىستى ىنتىماقتاستىق, نەگىزىنەن ەرەكشە دوستىق جانە سەنىمدى قاتىناستار ورناتقان ەكى ەل باسشىلارى كۇش-جىگەرلەرىنىڭ ارقاسىندا مۇمكىن بولدى. سوڭعى جىلدارى «نۇرلى جول» جاڭا ەكونوميكالىق جوباسىن «بەلبەۋ جانە جول» باستاماسىمەن ۇشتاستىرۋمەن قاتار, بىرقاتار ءىرى ينۆەستيتسيالىق جوبالار جۇزەگە اسىرىلدى.
قىتاي قازاقستاننىڭ ءىرى سىرتقى ساۋدا سەرىكتەسى بولىپ تابىلادى, سونىمەن بىرگە استانا, قازاقستاننىڭ ونىمدەرىن, ەڭ الدىمەن اۋىل شارۋاشىلىق ونىمدەرىن قىتاي نارىعىندا كەڭەيتۋگە مۇددەلى. وسى جىلدىڭ قىركۇيەك ايىندا استانا قالاسىندا «بەلبەۋ جانە جول» باستاماسىنىڭ 5 جىلدىق مەرەيتويىنا وراي 130-دان استام قىتايلىق ىسكەرلىك توپتار وكىلدەرىنىڭ قاتىسۋىمەن ۇيىمداستىرىلعان بيزنەس-فورۋمنىڭ ناتيجەسى جوعارى باعالاندى. تاراپتار وندىرىستىك قۋاتتاردى دامىتۋ باعدارلاماسىن ودان ءارى ىسكە اسىرۋعا قىزىعۋشىلىق تانىتتى. بۇگىنگى كۇنى جالپى قۇنى 27 ملرد. دولل. قۇرايتىن 51 بىرلەسكەن جوبالار بويىنشا جۇمىس جۇرگىزىلۋدە, ونىڭ ىشىندە جالپى قۇنى 2,5 ملرد. دولل. قۇرايتىن 9 جوبا ىسكە قوسىلدى.
وسى رەتتە, تاراپتار جوعارى ۇكىمەتتىك دەڭگەيدەگى الداعى جوسپارلانعان كەزدەسۋلەرگە دايىندىق ماسەلەلەرىن تالقىلادى جانە ولاردىڭ ناتيجەلەرى ەكى ەل اراسىنداعى ساۋدا-ەكونوميكالىق جانە ينۆەستيتسيالىق قاتىناستاردىڭ بارلىق سپەكترىن دامىتۋعا وڭ سەرپىن بەرەتىنىن اتاپ ءوتتى.
قحر ەلشىسى, پرەزيدەنت ن. نازارباەۆتىڭ قازاقستان حالقىنا جولداۋىنىڭ مازمۇنىن جوعارى باعالاپ, 2019 جىلدى جاستار, ءتۋريزمدى قولداۋ, شىمكەنت قالاسىنىڭ ۇلگىسىنە سايكەس مەگاپوليستەردى دامىتۋ جىلى دەپ جاريالاۋ سياقتى بىرقاتار باستامالاردى جۇزەگە اسىرۋعا قىتاي تاراپىنىڭ قىزىعۋشىلىعىن ءبىلدىردى.
سونىمەن قاتار, كەزدەسۋ بارىسىندا, تاراپتار قحر-داعى قازاق دياسپوراسىنىڭ قازاقستان مەن قىتاي اراسىنداعى «دوستىق كوپىرى» رەتىندە سانالاتىنىن اتاپ ءوتتى. سونىمەن بىرگە, شۇاا ەتنيكالىق قازاقتاردىڭ قۇقىقتارى مەن مۇددەلەرىن قورعاۋعا بايلانىستى ماسەلەلەر ءوزارا سەنىمدىلىك, تاتۋ كورشىلىك, قۇرمەتتەۋ قاعيداتتارى نەگىزىندە جانە ستراتەگيالىق ارىپتەستىكتىڭ جوعارى دەڭگەيىندەگى رۋحىندا وڭ شەشىلەتىن بولادى دەگەن ۋاعدالاستىققا قول جەتكىزىلدى.
قازاقستان تاراپى قازاقستان ازاماتتارىنا قحر-دىڭ جەكە, ىسكەرلىك جانە تۋريستىك ۆيزالارىن بەرۋدى تەز ارادا قايتا جالعاستىراتىنىنا ءۇمىت ءبىلدىردى.
