سەنات توراعاسىنىڭ ورىنباسارى س.گروموۆ كاسپي تەڭىزىنىڭ قۇقىقتىق مارتەبەسى تۋرالى كونۆەنتسياعا قول قويىلعان كاسپي ماڭى مەملەكەتتەرى باسشىلارىنىڭ اقتاۋ ءسامميتىنىڭ قورىتىندىلارىن استانا جوعارى باعالايتىنىن اتاپ ءوتتى.
قازاقستان پرەزيدەنتى نۇرسۇلتان نازارباەۆ اتاپ وتكەندەي, كونۆەنتسيا تەڭىزدىڭ سۋىن, ءتۇبىن, قويناۋىن, تابيعي رەسۋرستارى مەن اۋە كەڭىستىگىن قوسا العاندا وسى سۋ ايدىنىنا قاتىستى تاراپتاردىڭ بارلىق قۇقىقتارى مەن مىندەتتەمەلەرى ايقىندالعان جانە رەتتەلگەن «كاسپي تەڭىزىنىڭ كونستيتۋتسياسى» بولىپ تابىلادى.
بۇل قۇجات تەڭىزدەگى قۇقىقتار مەن ەگەمەندىكتىڭ اراجىگىن اجىراتۋعا, قويناۋىن پايدالانۋ, ترانزيت پەن تاسىمالداۋ قۇقىقتارىن جۇزەگە اسىرۋعا, سۋ استى قۇبىرلارى مەن جەلىلەردى جۇرگىزۋگە, تاريعي ورتا مەن بيولوگيالىق رەسۋرستاردى قورعاۋعا بايلانىستى اۋقىمدى ماسەلەلەردى قامتيدى.
سەنات توراعاسىنىڭ ورىنباسارى وسىناۋ ەرەكشە قۇجاتقا قول قويۋ جونىندەگى كەلىسىمگە كەلۋدەگى رەسەي مەن يراننىڭ ۇلەسىن جوعارى باعالادى.
- كونۆەنتسيانى ءبىزدىڭ پارلامەنتتەرىمىزدىڭ راتيفيكاتسيالاعانى ماڭىزدى بولىپ وتىر. بيىلعى 6 قاراشادا كونۆەنتسيانى راتيفيكاتسيالاۋ جونىندەگى قۇجاتتار توپتاماسى قازاقستان رەسپۋبليكاسىنىڭ ۇكىمەتىندە قارالعانىن حابارلايمىن. كونۆەنتسيانى راتيفيكاتسيالاۋ تۋرالى زاڭ جوباسىن ۇكىمەت الداعى ەكى اپتادا پارلامەنت ماجىلىسىنە بەرەدى دەپ كۇتىپ وتىرمىز, دەدى س.گروموۆ.
وتىرىستا رەسەي فەدەراتسياسى فەدەرالدىق جينالىسى فەدەراتسيا كەڭەسى اگرارلىق-ازىق-ت ۇلىك ساياساتى جانە تابيعاتتى پايدالانۋ كوميتەتى توراعاسىنىڭ ورىنباسارى سەرگەي بەلوۋسوۆ جانە يران يسلام كونسۋلتاتيۆتىك كەڭەسى توراعاسىنىڭ ءبىرىنشى ورىنباسارى ماسۋد پەزەشكيان كونۆەنتسيانى ۋاقىتىندا راتيفيكاتسيالاۋدىڭ ماڭىزى تۋرالى ايتتى.
وتىرىس بارىسىندا ەكى ەلدىڭ سەناتورلارى بىرىڭعاي ەكونوميكالىق كەڭىستىك اياسىندا ماڭعىستاۋ وبلىسى مەن رەسەيدىڭ داعىستان رەسپۋبليكاسىن مىسال ەتە وتىرىپ, شەكارالىق ايماقتاردى دامىتۋدى, كاسپيدەگى تۋريزم, ەكولوگيا مەن بيورەسۋرستاردى قورعاۋ سالاسىنداعى ىنتىماقتاستىقتى دامىتۋ ماسەلەلەرىن تالقىلادى.
س.گروموۆ پەن يران يسلام كونسۋلتاتيۆتىك كەڭەسى توراعاسىنىڭ ءبىرىنشى ورىنباسارى ماسۋد پەزەشكياننىڭ كەزدەسۋىندە پارلامەنتارالىق ىنتىماقتاستىق جانە ەكىجاقتى قاتىناستاردى, ونىڭ ىشىندە پارلامەنتارالىق ۇنقاتىسۋلاردى ودان ءارى نىعايتۋ ماسەلەلەرى تالقىلاندى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
