مەملەكەت باسشىسى سولتۇستىك قازاقستان وبلىسىنىڭ اكىمى ق.اقساقالوۆتىڭ وڭىردەگى الەۋمەتتىك-ەكونوميكالىق احۋالدىڭ دامۋى, يندۋستريالىق جوبالاردىڭ ىسكە اسىرىلۋى جانە جولداۋ اياسىنداعى تاپسىرمالاردىڭ ورىندالۋى جونىندەگى ەسەبىن تىڭدادى.
نۇرسۇلتان نازارباەۆ وبلىس اكىمىنىڭ بايانداماسىنان كەيىن قازاقستان رەسپۋبليكاسى مەن رەسەي فەدەراتسياسىنىڭ وڭىرارالىق ىنتىماقتاستىعىنىڭ فورۋمىنا ازىرلىك اياسىندا ايماقتى دامىتۋ باعدارلاماسىنىڭ ءتيىمدى ىسكە اسىرىلىپ جاتقانىن اتاپ ءوتتى.
– پەتروپاۆل قالاسىن كوركەيتۋ ماقساتىمەن كوپ جۇمىس اتقارىلدى. وبلىستىڭ ەكونوميكالىق كورسەتكىشتەرى قالىپتى. ءوسىم قارقىنى رەسپۋبليكا بويىنشا ورتاشا كورسەتكىشتەن جوعارى, – دەدى ەلباسى.
سونىمەن قاتار, مەملەكەت باسشىسى وبلىستىڭ اگرارلىق الەۋەتىنە توقتالىپ, بۇل وڭىردە اۋىل شارۋاشىلىعى سالاسىن دامىتۋ قاجەتتىگىن ايتتى.
– ەلىمىزدەگى اۋىل شارۋاشىلىعى ونىمدەرىن وڭدەۋ ءىسى كوڭىل كونشىتەرلىكتەي ەمەس. مەن اۋىل شارۋاشىلىعىنداعى ەڭبەك ونىمدىلىگىن ەكى ەسە كوتەرۋ جونىندە مىندەت قويدىم. بۇل سىزدەردىڭ وبلىستارىڭىزعا تىكەلەي قاتىستى. قايتا وڭدەۋ مەن ەكسپورتتى ىلگەرىلەتۋ ارقىلى عانا ونىمدىلىكتى ارتتىرۋعا بولادى. سىزدەر ءۇشىن جاڭا تۇتىنۋ نارىقتارى اشىلدى, – دەدى قازاقستان پرەزيدەنتى.
ەلباسى تۇرعىن ءۇي جانە ينفراقۇرىلىم نىساندارىن سالۋ, الەۋمەتتىك باعدارلامالاردى ىسكە اسىرۋ جۇمىستارىنىڭ ناتيجەلەرىنە دە توقتالدى. اتاپ ايتقاندا, 2018 جىلى ءوڭىردىڭ 6 مىڭنان استام تۇرعىنى باسپانامەن قامتاماسىز ەتىلىپ, 150 مىڭنان استام جۇمىسشىنىڭ جالاقىسى كوتەرىلەدى, سونداي-اق وڭىرلىك ماڭىزى بار جولدار جوندەۋدەن وتكىزىلەدى.
سوڭىندا نۇرسۇلتان نازارباەۆ ءوڭىر جۇرشىلىعىمەن كەزدەستى. وبلىس تۇرعىندارى الەۋمەتتىك سالاعا قاتىستى باعدارلامالار قابىلداپ, حالىققا ۇدايى قامقورلىق كورسەتىپ كەلە جاتقانى ءۇشىن مەملەكەت باسشىسىنا العىس ءبىلدىردى.
