كينو • 09 قاراشا، 2018

VII «باستاۋ» حالىقارالىق كينوفەستيۆالى اياقتالدى

264 رەتكورسەتىلدى

الماتىدا ءتورت كۇنگە سوزىلعان «باستاۋ» ستۋدەنتتىك فيلمدەردىڭ  VII حالىقارالىق فەستيۆالى اياقتالدى. 

قاراشانىڭ 5-8 ارالىعىندا قازىلار القاسى مەن كورەرمەندەر نازارىنا ەۋروپانىڭ، ازيانىڭ جانە تمد ەلدەرىنىڭ ەڭ جاس رەجيسسەرلەرى تۇسىرگەن تاڭداۋلى فيلمدەر ۇسىنىلدى. بيىلعى «باستاۋ» كينوفەستيۆالىنە الەمنىڭ تۇكپىر-تۇكپىرىنەن 300-دەن استام ۇسىنىس كەلىپ تۇسكەن. رەجيسسەر ءادىلحان ەرجانوۆ باسقارعان ىرىكتەۋ كوميسسياسى كونكۋرسقا 22 ەلدەن كەلگەن 47 ءفيلمدى تاڭداپ العان بولاتىن. 

– ءبىزدىڭ جاس فەستيۆالىمىز بيىل جەتىنشى رەت وتكىزىلىپ وتىر جانە ستۋدەنتتىك كينو مەن كينوبىلىمىنىڭ وزەكتى ماسەلەلەرىن تالقىلايتىن ناعىز كاسىبي ورتاعا اينالدى. ءبىزدىڭ كىشكەنتاي عانا فەستيۆالىمىز قالامىزدىڭ مىڭداعان ستۋدەنتتەرىنە، سونداي-اق الەمنىڭ تۇكپىر-تۇكپىرىنەن كەلگەن جاس كينەماتوگرافيستەرگە پايدالى بولعانىنا سەنىمدىمىن، – دەدى فەستيۆالدىڭ پرەزيدەنتى سەرگەي ءازىموۆ.   

سونداي-اق فەستيۆال پرەزيدەنتى ساحنا تورىنەن فەستيۆالدى ۇيىمداستىرۋعا بەلسەنە ارالاسىپ، قولداۋ بىلدىرگەن دەمەۋشىلەرگە، سەرىكتەستەر مەن فەستيۆال جاناشىرلارىنا، اسىرەسە فەستيۆال پرەزيدەنتى الماتى قالاسىنىڭ اكىمى باۋىرجان بايبەككە، قازاق ۇلتتىق ونەر اكادەمياسى مەن «تۇران» ۋنيۆەرسيتەتىنىڭ باسشىلىعىنا ەرەكشە العىسىن ءبىلدىردى.

كينوفەستيۆالدىڭ قازىلار القاسىنا ەنگەن گرۋزين كينورەجيسسەرى، ستسەناريستى، جازۋشى ءارى پەداگوگ يراكلي كۆيريكادزە، مونتاج رەجيسسەرى سيلۆان كۋتاندين، رەسەيلىك اكتريسا ەلۆيرا بولگوۆا، قىرعىز كينورەجيسسەرى، ستسەناريست جانە پروديۋسەر تەمىربەك ءبىرنازاروۆ، سونداي-اق، وتاندىق رەجيسسەر ءسابيت قۇرمانبەكوۆ ۇزاق تالقىلاۋدان سوڭ «باستاۋدىڭ» جۇلدەلەرىن بىلايشا بەلگىلەدى:

گران-پري رەسەيلىك رەجيسسەر ادام دۋناەۆتىڭ «زاۋرە تۋرالى حاتتارىنا»،  قازىلار القاسىنىڭ ارنايى جۇلدەسى قازاقستاندىق رەجيسسەر دانيار ءازىموۆتىڭ «الەم ادامىنا»، «ەر ادام ءرولىن ۇزدىك سومداعانى ءۇشىن» جۇلدەسى تۇركيالىق احمەد ءۆارليدىڭ «كەشەگى قالدىق» فيلمىنە، «ايەل ادام ءرولىن ۇزدىك سومداعانى ءۇشىن» جۇلدەسى وزبەكستاندىق اكتريسا ەلميرا راحيمجونوۆاعا «انا» ءفيلمى ءۇشىن، «ۇزدىك وپەراتورلىق جۇمىس» جۇلدەسى رەسەيلىك ۆاحتانگ كحۋبيتياعا «ايقاي» ءفيلمى ءۇشىن، «ۇزدىك ستسەناري»  وڭتۇستىك كورەيادان كەلگەن يە كيمنىڭ «بىرگە بارامىز» دەرەكتى ءفيلمى ءۇشىن، قازىلار القاسىنىڭ ارنايى اتالىمى  گەرمانيا رەجيسسەرى سينە كولەنىڭ «اشىق اسپانداعى سيمفونيا» ءفيلمى ءۇشىن تابىستالدى. ال «وتاندىق كينەماتوگرافياعا قوسقان ۇلەسى جانە قازاقستاننىڭ جاس كينەماتوگرافيستەرىن وسىرگەنى ءۇشىن» جۇلدەسى تانىمال رەجيسسەر دارەجان ومىرباەۆقا بەرىلدى.  وراز ابىشەۆ اتىنداعى جۇلدە «اتاكاسىپ» دەرەكتى ءفيلمىنىڭ رەجيسسەرى بەرىك جاحانوۆقا بۇيىردى.

«باستاۋدىڭ» نەگىزگى قازىلار القاسىمەن قاتار بەلورۋسسيا، قىرعىزستان، رەسەي جانە قازاقستاننىڭ وكىلدەرى توپتاستىرىلعان ستۋدەنتتىك قازىلار القاسى دا جۇمىس ىستەگەن بولاتىن. بۇل قازىلار القاسىن VI حالىقارالىق «باستاۋ» كينوفەستيۆالىنىڭ باس جۇلدەسىن جەڭىپ العان يسپانيالىق رەجيسسەر ياگو ماتەو باسقاردى. ستۋدەنتتىك قازىلار القاسىنىڭ گران-ءپريىن قازاقستاننان قاتىسقان الىشەر جادىگەروۆتىڭ «وتاۋ» فيلمىنە تابىستاپ، ەرەكشە اتالىمدى سينگاپۋرلىق رەجيسسەر تەنگ ۆان ءسيننىڭ «اق قالامپىر» كارتيناسىنا بەردى.

ايتا كەتەلىك، «باستاۋ» كينوفەستيۆالى اياسىندا قازىلار القاسى جانە فەستيۆال قوناقتارى شەبەرلىك ساباقتارىن وتكىزىپ، شىعارماشىلىق كەزدەسۋلەرگە قاتىستى.  ماسەلەن، نەگىزگى قازىلار القاسىنىڭ مۇشەسى ەلۆيرا بولگوۆا ت.جۇرگەنوۆ اتىنداعى قازۇوا ستۋدەنتتەرىمەن كەزدەستى، ال وتاندىق رەجيسسەر ءادىلحان ەرجانوۆ «تۇران» ۋنيۆەرسيتەتىنىڭ تالىمگەرلەرىمەن اڭگىمەلەسىپ، تاجىريبەسىمەن ءبولىستى. ء«موسفيلمنىڭ» دىبىس رەجيسسەرى مارينا نيگماتۋللينا جانە كينووپەراتور، ۋكرايناداعى كارپەنكو-كاري اتىنداعى ۋنيۆەرسيتەتتىڭ ۇستازى ەۆگەني فيليپپوۆ شەبەرلىك ساعاتىن وتكىزىپ، جينالعاندارعا ماماندىقتارىنىڭ ەرەكشەلىكتەرى جايىندا ءسوز ەتتى. سونداي-اق، «باستاۋ» فەستيۆالى اياسىندا «كينەماتوگراف، مەدياسالا جانە الەۋمەتتىڭ رۋحاني جاڭعىرۋىنداعى اقپاراتتىق  قاتەرلەر» تاقىرىبىمەن حالىقارالىق عىلىمي-تاجىريبەلىك كونفەرەنتسيا ءوتتى.

ايگۇل احانبايقىزى،

«ەگەمەن قازاقستان»

الماتى

سوڭعى جاڭالىقتار

تارالىم ءھام قارالىم

100 • بۇگىن، 06:55

تارحان تەكتى رەداكتور

100 • بۇگىن، 06:40

ءجۇز جىل

100 • بۇگىن، 06:27

ۇشقىر ويلار ۇشقىندارى

100 • بۇگىن، 06:11

ۇلكەن جولدىڭ ۇزىكتەرى

100 • بۇگىن، 05:58

ينۆەستيتسيا – دامۋ داڭعىلى

ايماقتار • بۇگىن، 05:49

ۇقساس جاڭالىقتار