ايتىس ونەرىنىڭ اقتاڭگەرى كوكەن شاكەەۆ اتىنداعى اقىندار مەكتەبىنىڭ اتىنان جىر دوداسىنا سايا تۇرسىنبەكقىزى, دۋمان سامات, ەردەن نۇراحمەت, ابزال جۇمابەك قاتىسسا, ەرىك اسقاروۆ اتىنداعى اقىندار ورتالىعىنان دياس اياعان, داۋلەت قۇرماش, سارا قۇلاحمەت جانە اقان سەرى اتىنداعى مادەنيەت كوللەدجىنەن باعزور ەربولقىزى ءوز ونەرلەرىن ورتاعا سالدى. ءتورت جۇپ بولىپ ايتىسقان ورىمدەي جاستاردىڭ ونەرگە دەگەن قۇلشىنىسى جەڭىسكە دەگەن ۇمىتىلىسىمەن ۇشتاسىپ, تىڭدارماندى قۋانتتى.
ساحنادا ءوز ونەرىن ورتاعا سالعان جاستار دا سۇيەگىنە ءسوز سىڭگەن, تالابىنان ءۇمىت كۇتتىرەتىن دەڭگەيدە ەكەن. الامان بولعان سوڭ الۋان-الۋان جۇيرىكتىڭ الىنە قاراي شاباتىنى دا راس. بۇل جولى دا ءبىر قايناۋى ىشىندە, شيكىلىكتەر دە كوزگە كورىنىپ تۇردى. بالكىم دايىندىقتىڭ ازدىعى ما, جوق الدە, تاجىريبەنىڭ جۇتاڭدىعىنان با ايتەۋىر جەكە باسقا ءتيىسۋ, سىناپ-مىنەۋ, ءتىپتى شامدانىپ, اشۋ شاقىرىپ, ايتار ءسوزىن ۇمىتىپ جاتقاندار دا كەزدەسىپ جاتتى. مۇنى البىرت جاستىقتىڭ قىزۋى دەپ تۇيسىندىك. ال, ايتىسكەرلەردىڭ ساحنادا ءوزىن-ءوزى ۇستاۋى, ۇلتتىق كيىمدەرى, ماقامى كەلىستى بولدى. اسىرەسە, قىزىلجارلىق داۋلەت قۇرماشتىڭ تاپقىرلىعى مەن ورىندى ءازىلى, ۇتىمدى ۇيقاستارى جىرسۇيەر قاۋىمدى ءتانتى ەتتى. القالى توپتىڭ الدىندا ونەر كورسەتۋ وڭاي ەمەس. جۇزدەگەن كورەرمەنگە نە ايتامىن, قانداي ماسەلە قوزعايمىن دەگەن كوكەيدەگى كەلىستى ويمەن شىقپاساڭ, سوزدەن توسىلىپ, تابان استىندا ءسوز تاۋىپ ايتا الماۋىڭ ابدەن مۇمكىن. ايتىستا قىز بەن جىگىت ايتىسىنىڭ ۇلگىسىن كورسەتكەندەردىڭ قاتارىندا داۋلەت قۇرماش پەن باعزور ەربولقىزى بار. باعزوردىڭ: «الدارىڭا اقىن قىزىڭ كەلىپ قالدى, سارا مەن قىز جىبەكتىڭ جالعاسىنداي» دەگەن سوزىنە, داۋلەتتىڭ: «جىبەكتىڭ جالعاسىمىن دەپ وتىر عوي, تولەگەندەي بريلليانتتىڭ ءبۇتىنىمىن» دەگەن جاۋابى ۇيلەسە كەتتى.
جوعارىدا ايتىپ وتكەنىمىزدەي, ءمۇشايرا جانە ايتىس اتالىمدارىنا بولىنگەن ءسوز دوداسى بويىنشا سايىسقا جاس اقىندار كەزەكتەسىپ شىعىپ وتىردى. ولاردىڭ اراسىندا مەكتەپ وقۋشىلارى دا بار. ەرمەك ءجۇمين جۇرەكجاردى جىرىن وقىسا, جانسايا جۇمابەكوۆا كەربەز كوكشەتاۋدى ولەڭىنە ارقاۋ ەتكەن. بالا اقىننىڭ «سارىارقا – جۇزىكتەي, كوكشەتاۋ – گاۋھارى» دەگەن ولەڭ جولدارى ادەمى ورىلگەن. ءوزىنىڭ جىر شۋماقتارىن وقىعان كوكەن اتا مەكتەبىنىڭ وقۋشىلارى قاراشاش ۇعىلان, دامير باقىتجان جانە ەرىك اقىن ورتالىعىنىڭ شاكىرتتەرى جارقانات قيناۋحان, ابىلايحان ءاشىمحان ۇلىنىڭ دا ولەڭدەرى دە كوپتىڭ كوڭىلىنەن شىقتى.
قازىلار القاسى ايتىسكەر اقىنداردىڭ ىشىنەن اقتىق مارەگە ابزال جۇمابەك پەن داۋلەت قۇرماشتى لايىق دەپ تانىدى. قوس اقىننىڭ دا جاستىق البىرتتىقپەن جۇلدەگە تالاسۋى قىزىقتى شىققانىمەن, بويىن اشۋعا الدىرعان كوكشەتاۋلىق ابزالدىڭ ۇيقاسىن كەلتىرە الماي, تۇتىعۋى, ساحنا مادەنيەتىن ساقتاماۋى كوپتىڭ كوڭىلىنە قاياۋ ءتۇسىردى.
ءمۇشايرادا جۇلدەلى ءۇشىنشى ورىندى ەرمەك جۇمكەي, 2-ءشى ورىندى جارقانات قيناۋحان يەلەندى. جانسايا جۇمابەكوۆا جۇلدەلى ءبىرىنشى ورىندى قانجىعاسىنا بايلادى. ال, ايتىس اتالىمى بويىنشا 3-ءشى ورىنعا دۋمان سامات, 2-ءشى ورىنعا ابزال جۇمابەك لايىق دەپ تانىلدى. ال, ءسوز ساپتاۋى مەن سۋىرىپ سالمالىق قابىلەتىمەن كوپ ىشىنەن دارالانعان جاس دارىن قىزىلجارلىق داۋلەت قۇرماش باس جۇلدەنى يەلەندى. ايتىس پەن ءمۇشايرادا باعىن سىناعان بارلىق جاس اقىندارعا العىس حاتتار مەن «ەل بىرلىگى» قوعامدىق بىرلەستىگى اتىنان ۇلتتىق ناقىشتاعى سىيلىقتار تارتۋ ەتىلدى.
بايقال ءبايادىل,
«ەگەمەن قازاقستان»
اقمولا وبلىسى
