كوشپەندى حالىقتاردىڭ باسىن بىرىكتىرىپ, ءداستۇرىن جالعاستىرعان تۇرىك قاعاناتىنىڭ داڭقتى اسكەري قولباسشىسى كۇلتەگىننىڭ جاستىق شاعىنا قۇرىلعان, تاريحي سالماعى مىڭ باتپان ءمۋلتفيلمدى بەسىكتەن بەلى شىقپاعان بالاعا قالايشا «جەڭىل» ەتىپ جەتكىزۋگە بولادى؟ مىڭ سان سۋرەتپەن سايكەستەندىرە وتىرىپ, ءتورت اياعىن تەڭ باسىپ, تايپالىپ تۇرعان جاتىق ءتىل تاۋىپ, كەيىپكەر ءسوزىن جۇرەككە بايلاپ بەرەتىن داۋىستى ورايلاستىرا سيۋجەت قۇرۋ رەجيسسەرلەرگە وڭايعا سوقپاسى انىق. ارينە, بالا تانىمىندا سۋرەت پەن دىبىستىڭ ورنى ەرەكشە, مۋلفيلمدەگى قيالدى سامعاتاتىن ادەمى سۋرەتكە, تەبىرەنتەتىن سازدى داۋىسقا ونىڭ ەرەسەكتەر سەكىلدى ەلىگىپ, ەلىتىپ قارايتىنىن بايقاۋ قيىن ەمەس. ازىرگە كورگەنى مەن ەستىگەنىنە عانا سەنەتىن كىشكەنتاي كورەرمەننىڭ جۇرەگىن بىردەن باۋراپ الاتىن, سەنىمى مەن سەزىمىن بيلەيتىن داۋىستى مەڭگەرۋگە كەز كەلگەن ءارتىستىڭ شەبەرلىگى جەتە بەرمەيدى دە. ساناسى قالىپتاسپاعان بۇلدىرشىندەر جاعىمدى-جاعىمسىز كەيىپكەرلەردى ەڭ الدىمەن داۋىس ارقىلى اجىراتادى.
ەلىمىزدىڭ بارلىق كينوتەاترىندا 22 قاراشادان باستاپ پروكاتقا شىعاتىن تولىقمەتراجدى انيماتسيالىق «كۇلتەگىن» مۋلتفيلمىندەگى نەگىزگى كەيىپكەرلەردى ەلىمىزدىڭ بەلگىلى تەاتر جانە كينو اكتەرلەرى دىبىستاعان. قازاقستاننىڭ حالىق ءارتيسى نۇكەتاي مىشباەۆا, مەرەي اجىبەكوۆ, دينارا ابىكەەۆا جانە فيليپپ ۆولوشيندەر قاتىسقان مۋلتفيلم كورەرمەن قىزىعۋشىلىعىن وياتىپ جاتسا, جەتىستىك سىرى ساپالى جاسالعان دۋبلياج جۇمىسىمەن تىكەلەي بايلانىستى. بەلگىلى ارتىستەرمەن بىرگە كوپتەگەن گولليۆۋدتىق فيلمدەردى قازاق تىلىنە دىبىستاعان رامازان امانتاي («بيزنەس پو-كازاحسكي»), ءاليحان بايسۇلتانوۆ («سەميا بازارباەۆىح») سەكىلدى جاس اكتەرلەر دە تاريحي كەيىپكەرلەردى اسا جاۋاپكەرشىلىكپەن دىبىستاعان.
فيليپپ ۆولوشين: مەن بالا كۇلتەگىندى ورىس تىلىندە دىبىستادىم. مۋلتفيلم كەيىپكەرلەرىن دىبىستاۋدى جانىم سۇيەدى, ويتكەنى ستۋديا ىشىندە وتىرىپ-اق داۋىستىڭ كومەگىمەن كەيىپكەرىڭنىڭ وبرازىن جاساي الاسىڭ. كەيىپكەردىڭ ماقساتىن, ەرەكشەلىكتەرىن جانە استارلى ارەكەتتەرىن داۋىس قانا بەرەدى. بۇل رەتتە اكتەر كوپتەگەن تەحنيكالىق ماشىقتارمەن قارۋلانۋى ءتيىس. مەن ءۇشىن مۋلتفيلمدە جۇمىس ىستەۋ – ءوزىمدى اكتەر رەتىندە جان-جاقتى سىناپ-بايقاۋ, تاجىريبە جيناقتاۋ.
رامازان امانتاي: «كۇلتەگىندى» كورگەن كەزىمدە ونىڭ گولليۆۋدتىق مۋلتفيلمدەردەن ەش كەم تۇسپەيتىنىن بايقادىم. مەن بۇل مۋلتفيلمدە بىلگە قاعاننىڭ بالا كەزىن دىبىستادىم. دۋبلياجداعى تاجىريبەم كوپ بولماسا دا, بۇل دىبىستاۋدان ەرەكشە ءلاززات الدىم. ويتكەنى, مەنىمەن بىرگە دوسىم ءاليحان بايسۇلتانوۆ تا دىبىستاۋعا قاتىستى. ونىڭ دىبىستاۋىنداعى كۇلتەگىندى جايباراقات وتىرىپ قاراي المايسىڭ.
اداي ءابىلدينوۆ, فيلم رەجيسسەرى: تاريحي كەيىپكەرلەردى دىبىستاۋدا اكتەرلەر بار كۇشىن سالىپ جۇمىس ىستەدى. جالپى بارىمىزگە دە «كۇلتەگىن» ءفيلمى باعا جەتپەس تاجىريبە بەردى. جيىرماعا جۋىق ەلىمىزدىڭ ۇزدىك كومپيۋتەرلىك گرافيكا جانە انيماتسيا ماماندارى جۇمىس ىستەدى. ءبىر جىلدىڭ ىشىندە عانا بۇرىن-سوڭدى بولماعان انيماتسيالىق اۋقىمدى تۋىندى جاساپ شىعارا الدىق. بۇل حالىقارالىق ستاندارتتار بويىنشا وتە از ۋاقىت. الايدا, بار كۇشىمىز بەن جانىمىزدى سالىپ جاساپ شىعارعان بۇل تۋىندى كىشكەنتاي كورەرمەندەرىمىزگە عانا ەمەس, بارلىق قازاقستاندىقتاردىڭ دا تالعامىنان شىعاتىنىنا, ۇنايتىنىنا سەنەمىن.
ايگۇل احانبايقىزى,
«ەگەمەن قازاقستان»
الماتى
