وسىدان ەكى جىل بۇرىن برازيليانىڭ ريو دە جانەيرو قالاسىندا وتكەن وليمپيا ويىندارىنىڭ اۋىر اتلەتتەر سايىسىندا 85 كيلو سالماق دارەجەسىندە ونەر كورسەتكەن دەنيس ۋلانوۆ بۇل جارىستى ءتورتىنشى ورىنمەن قورىتىندىلاعان بولاتىن. قوسسايىستا ول 390 (175+215) كيلو سالماقتى ەڭسەردى. ءۇشىنشى ورىنعا تابان تىرەگەن رۋمىنيالىق گابريەل سينكراياننىڭ دا ناتيجەسى ءدال سونداي ەدى. دەسەك تە قارسىلاسىنا قاراعاندا ءوزىنىڭ جەكە سالماعىنىڭ ازدىعىنىڭ ارقاسىندا قولا مەدالدى ەۋروپانىڭ وكىلىنە تابىس ەتىلدى.
ريو وليمپياداسى اياقتالعاننان كەيىن بىرقاتار زىلتەمىرشىلەردىڭ دوپينگ قولدانعانى انىقتالدى. سولاردىڭ قاتارىندا گابريەل سينكرايان دا بار. ءىستىڭ اق-قاراسى انىقتالعاننان كەيىن رۋمىنيالىق زىلتەمىرشى وليمپيادانىڭ قولا جۇلدەسىنەن ايىرىلىپ, ۇلكەن سپورتتان بىرنەشە جىلعا شەتتەتىلدى. وسىلايشا, ريوداعى دودانىڭ قولا مەدالى دەنيس ۋلانوۆقا تابىس ەتىلدى.
اشحابادتاعى الەم چەمپيوناتى كەزىندە جەرلەسىمىزگە وليمپيادا جۇلدەسى رەسمي تۇردە تابىس ەتىلگەن كەزدە ول: بۇل ءساتتى مەن ەكى جىل بويى سارعايا كۇتتىم. ارينە, وليمپيا ويىندارى بارىسىندا وزگە مىقتىلارمەن بىرگە جەڭىس تۇعىرىندا مارقايىپ تۇرعاننىڭ ءجونى مۇلدە بولەك قوي. ونداي باق ماعان بۇيىرمادى. دەسەك تە «ەشتەڭ كەش جاقسى» دەگەن ءسوز بەكەر ايتىلماعان عوي. رەسمي تۇردە وسى جۇلدەنىڭ ماعان تابىس ەتىلگەنىنە ريزامىن. تىپتەن, ءانۇرانىمىز دا شىرقالدى. وسىنىڭ ءبارىن جان-تانىممەن سەزىنىپ, قازىر قاتتى قۋانىپ تۇرمىن», – دەيدى دەنيس.
عالىم سۇلەيمەن,
«ەگەمەن قازاقستان»
