ەۋروپالىق باعدارلامالاردىڭ ماڭىزدىلىعىنا جانە ەرەكشەلىكتەرىنە توقتالىپ وتكەن ۋنيۆەرسيتەت رەكتورى, الماتى ايماقتىق رەكتورلار كەڭەسىنىڭ توراعاسى تاكير بالىقباەۆتىڭ ايتۋىنشا, ەراcمۋس+ باعدارلاماسى ءبىلىم بەرۋ جۇيەسىن تۇراقتى دامىتىپ, تيىمدىلىگىن ارتتىرۋ ارقىلى قازاقستاندىق ءبىلىمدى حالىقارالىق دەڭگەيگە كوتەرۋگە ىقپال ەتەدى. باعدارلامالار وقىتۋشىلارىمىزعا جانە ستۋدەنتتەرگە جوعارى ءبىلىم بەرۋدە مول تاجىريبە جيناقتاۋعا, باسەكەگە قابىلەتتى بولۋعا ءارى كاسىبي دەڭگەيىن كوتەرۋگە قولايلى.
ەراcمۋس+ باعدارلاماسىنىڭ اقپاراتتىق كۇنىنە, اباي اتىنداعى قازۇپۋ رەكتورى تاكير بالىقباەۆ, قر-داعى فرانتسۋز ەلشىلىگى باس كونسۋلدىعىنىڭ ۋنيۆەرسيتەتتىك ىنتىماقتاستىعى بويىنشا اتتاشەسى جيل مەمەتتس, قازاقستانداعى ەراcمۋس+ باعدارلاماسىنىڭ ۇلتتىق ۇيلەستىرۋشىسى شايزادا تاسبولاتوۆا, ۋنيۆەرسيتەتتىڭ پروفەسسور-وقىتۋشىلار قۇرامى, رەسپۋبليكامىزدىڭ وڭىرلەرىنەن كەلگەن جوعارى وقۋ ورىندارىنىڭ وكىلدەرى قاتىستى.
شارا اياسىندا شايزادا تاسبولاتوۆا باعدارلامانىڭ جاڭا جوبالارى, كونكۋرستارعا قاتىسۋ ەرەكشەلىكتەرى تۋرالى بايانداپ, ەراcمۋس + باعدارلاماسىنا قاتىسام دەۋشىلەرگە ارنالعان جوبالاردى قارجىلاندىرۋ بويىنشا كەڭەستەر بەردى. ءىس-شارا بارىسىندا ەراسمۋس + باعدارلاماسىنىڭ ۇلتتىق كەڭسەسىنىڭ وكىلدەرى وزدەرىنە قويىلعان سۇراقتارعا جاۋاپ بەردى.
ەلۆيرا سەرىكقىزى,
«ەگەمەن قازاقستان»
الماتى
