گلۋبوكوە اۋداندىق اۋرۋحاناسىنىڭ باس دارىگەرى قايرات بەدەلمانوۆتىڭ قىزمەت ءوتىلى 30 جىل. ول ۇلان اۋدانىنىڭ تارعىن اۋىلىنداعى ورتا مەكتەپتى بىتىرگەن سوڭ ازاماتتىق بورىشىن وتەۋگە اسكەرگە اتتانادى. 21 جاسىندا سەمەيدەگى مەديتسينا اكادەمياسىنىڭ ستۋدەنتى اتانىپ, ءۇش بىردەي حيرۋرگ, تراۆماتولوگ, رەۆماتولوگ ماماندىعىن الىپ شىعادى. ەڭبەك جولىن ريددەردەگى قالالىق اۋرۋحانادا باستاپ, سوسىن وسكەمەندەگى جەدەل جاردەم اۋرۋحاناسىندا بىرەر جىل قىزمەت ەتەدى. بۇدان تۋرا 7 جىل بۇرىن ءوز ماماندىعىنا شەكسىز بەرىلگەن, ءبىلىمدى دە بىلىكتى دارىگەردى گلۋبوكوە اۋداندىق اۋرۋحاناسىنا باس دارىگەرلىككە تاعايىندايدى. اۋداندا 63 مىڭنان استام تۇرعىن بار. ول ەڭ اۋەلى كەنشىلەر مەن شاحتەرلەر, اۋىل شارۋاشىلىعى قىزمەتكەرلەرى مەكەندەپ جاتقان اۋىلدار مەن كەنتتەردى ارالاپ شىقتى. دارىگەرلىك قىزمەت كورسەتەتىن مەكەمەلەردە زاماناۋي جابدىقتار جوققا ءتان ەكەن. ال اۋدان ورتالىعىنداعى ورتالىق اۋرۋحانا قۇلاۋعا جاقىن. باس دارىگەر جاڭادان اۋرۋحانا سالۋ جونىندەگى ويىن جۇزەگە اسىردى. 2014 جىلى ساپالى دەنساۋلىق ورداسى پايدالانۋعا بەرىلدى.
– ەلباسىنىڭ جاقىندا عانا جاريالانعان قازاقستان حالقىنا جولداۋىندا حالىقتىڭ ءال-اۋقاتىن, تۇرمىسىن جاقسارتۋ, ادام دەنساۋلىعىنا كوڭىل ءبولۋ جايلى ايتىلعان. ءبىز بۇل ماقساتتا ىزدەنىس پەن ىلكىمدىلىك تانىتۋدامىز. قازىرگى تاڭدا اۋداندا 14 دارىگەرلىك امبۋلاتوريا, 8 فەلدشەرلىك, 4 دارىگەرلىك پۋنكت حالىققا قىزمەت ەتۋدە. بۇل سالادا 670 ادام ەڭبەك ەتەدى. «ديپلوممەن – اۋىلعا!» باعدارلاماسى بويىنشا سوڭعى بەس جىلدا جوعارى جانە ورتا ارناۋلى ءبىلىم وردالارىن ءبىتىرىپ كەلگەن جاس ماماندارعا 97 پاتەر بەرىلدى. بىزگە نەگىزىنەن الماتى, قاراعاندى جانە سەمەي مەديتسينا ينستيتۋتتارىن بىتىرگەن جاس ماماندار, سەمەي مەن وسكەمەندەگى مەديتسينالىق كوللەدجدەردى تامامداعان جاستار كەلەدى. ولاردىڭ بارلىعى قىزمەتكە ورنالاستى, تۇرعىن ءۇي ماسەلەلەرى شەشىلدى. سوڭعى جىلدارى «پارىز» قايىرىمدىلىق قورى ارقىلى 47 ساپالى دارىگەرلىك جابدىقتار, ۋزي اپپاراتتارى, جانساقتاۋ بولىمىنە جاڭا اپپاراتتار, 5 ەكگ, باسقا دا قوندىرعىلار ساتىپ الىندى, – دەيدى اۋداندىق اۋرۋحانانىڭ باس دارىگەرى قايرات رامازان ۇلى.
سوڭعى بىرەر جىلدا عانا اۋداندا 6 ەمدەۋ ورتالىعى سالىنىپتى. اتاپ ايتقاندا, كەنشىلەر كەنتى – بەلوۋسوۆكادا, چەرەمشانكا, ۋشانوۆ, سەكيسوۆكا اۋىلدارىنداعى دارىگەرلىك-ەمدەۋ امبۋلاتوريالارى تۇرعىندارعا قالتقىسىز قىزمەت كورسەتۋدە. ەلدى مەكەندەرگە اۋدان اكىمى قاليحان بايعونىسوۆ باس دارىگەرمەن بىرگە بارىپ, تۇرعىندارمەن كەزدەسۋ وتكىزەدى. اۋىل تۇرعىندارى وزدەرىنىڭ مۇڭ-مۇقتاجدارىن باتىل ءبىلدىرىپ, وتىنىشتەرىن ايتادى. ماسەلەن, بوبروۆكا اۋىلىندا بولعان كەزدەسۋدە تۇرعىندار كەي ماماندىق يەلەرىنىڭ بولماۋىنان اۋدان ورتالىعىنا نەمەسە وبلىسقا باراتىندارىن ايتتى.
اۋداندىق اۋرۋحانانىڭ جەدەل جاردەم بولىمىندە قازىر 52 دارىگەر مەن قىزمەتكەر ەڭبەك ەتەدى. بولىمشە قاجەتتى تەحنيكا, جەدەل جاردەم كولىكتەرىمەن قامتاماسىز ەتىلگەن. سىرقات جاندار اۋدان ورتالىعىنا نەمەسە تاياق تاستام جەردەگى وسكەمەنگە جەتكىزىلەدى. دارىگەرلەر تەلەفونمەن, باسقا دا قاجەتتى قۇرال-جابدىقتارمەن قامتاماسىز ەتىلگەن. باس دارىگەردىڭ ايتۋىنشا, سوڭعى بىرەر جىلدا عانا 78 دارىگەر, 213 مەدبيكە, باسقا ماماندىق يەلەرى ماسكەۋ, كيەۆ, استانا, پاۆلودار, سەمەي جانە وسكەمەن قالالارىندا بىلىكتىلىگىن ارتتىرعان.
– بىزدە قىزمەت ەتەتىن دارىگەرلەر گيپپوكرات انتىنا ادال, ناۋقاستارعا ساپالى قىزمەت ەتۋدى باستى مىندەتى سانايدى, – دەيدى باس دارىگەر قايرات بەدەلمانوۆ.
وڭداسىن ەلۋباي, جۋرناليست
شىعىس قازاقستان وبلىسى,
گلۋبوكوە اۋدانى
