كورمەگە ەلورداداعى ۇلتتىق نەيروحيرۋرگيا ورتالىعى, رەسپۋبليكالىق بالالاردى وڭالتۋ ورتالىعى, ۇلتتىق عىلىمي ونكولوگيا جانە ترانسپلانتولوگيا ورتالىعى, №2 قالالىق كوپبەيىندى اۋرۋحانا جانە №1 قالالىق اۋرۋحانا, سونداي-اق جەكەمەنشىك مەديتسينالىق ورتالىقتاردىڭ جۇمىسىن كورسەتەتىن 126 فوتوسۋرەت قويىلعان. سۋرەتتەردى «Sultan magazine» بورتتىق جۋرنالىنىڭ فوتوگرافى مارات ءامىروۆ ءۇش اپتا ءجۇرىپ تۇسىرگەنىن ايتادى.
2016 جىلدان بەرى ءتورت تىلدە جارىق كورىپ كەلە جاتقان «Sultan magazine» بورتتىق جۋرنالىنىڭ باستاماسىمەن وتكەن الەۋمەتتىك جوباعا «نۇر وتان» پارتياسى مەن استانا قالاسىنىڭ №2 كوپبەيىندى اۋرۋحاناسى قولداۋ كورسەتكەن.
«ەلباسىنىڭ جاڭا جولداۋىندا قازىرگى زامانعا ساي مەديتسينا ساپاسىن كوتەرۋ كەرەكتىگى ايتىلدى. قانشاما مىڭداعان دارىگەرلەردىڭ اجالعا اراشاشى بولىپ, كۇندەلىكتى ەرلىك ىستەپ جاتقانىن كوپ بىلە بەرمەيمىز. بۇگىن فوتوكورمە ارقىلى سوعان كۋا بولدىق. ەلىمىزدەگى جەتى مەديتسينا ۋنيۆەرسيتەتى مەديتسينا سالاسىنىڭ ماماندارىن دايىندايدى. جاقسى دارىگەرلەرىمىز وتە كوپ. سولاردى ناسيحاتتايتىن, حالىقپەن شىنايى قارىم-قاتىناس ورناتۋعا جول اشاتىن وسىنداي باستامالاردىڭ بولعانى قۋانتادى», دەدى كورمەگە ارنايى قاتىسقان وڭتۇستىك قازاقستان مەديتسينالىق اكادەمياسىنىڭ رەكتورى مىرزابەك رىسبەكوۆ.
الەۋمەتتىك جوبا اياسىندا ءتىس دارىگەرى, نەۆروپاتولوگ, كارديولوگ, پەدياتر, تەراپەۆت, پسيحولوگ جانە كوسمەتولوگ دارىگەرلەر كوپشىلىكتى تەگىن تەكسەرۋدەن وتكىزۋدە.
مايگۇل سۇلتان,
«ەگەمەن قازاقستان
