ءىس-شارا و.مۇحامەدجانوۆتىڭ تۋعانىنا 70 جىل تولۋىنا وراي ۇيىمداستىرىلدى. وعان ءماجىلىس توراعاسى نۇرلان نىعماتۋلين, پارلامەنت دەپۋتاتتارى, قوعام قايراتكەرلەرى, و.مۇحامەدجانوۆتىڭ جارى شولپان عالىمجانقىزى, وتباسى مۇشەلەرى, تۋعان-تۋىستارى جانە جاقىندارى قاتىستى.
الدىمەن جينالعاندار ورال بايعونىس ۇلىنىڭ ءومىرى مەن قىزمەتىنە ارنالعان فوتوكورمەنىڭ اشىلۋىنا كۋا بولدى.
و.مۇحامەدجانوۆ وبلىستىق تۇتىنۋشىلار وداعىنان باستاپ, كومسومول جانە پارتيا ۇيىمدارىندا, اۋىلدىق اكىمشىلىكتەردە, سونىمەن بىرگە وبلىستىق حالىق دەپۋتاتتارى كەڭەسىندە باسشىلىق قىزمەتتەردە بولدى. جوعارعى كەڭەسكە دە دەپۋتات بولىپ سايلاندى. كەيىن ۇكىمەت اپپاراتىندا, پرەزيدەنت اكىمشىلىگىندە كوپ جىلدار جاۋاپتى قىزمەتتەر اتقاردى. سودان سوڭ, 9 جىل بويى ءومىرىنىڭ سوڭعى كۇندەرىنە دەيىن پارلامەنت ءماجىلىسىنىڭ ەكى رەت توراعاسى, دەپۋتاتى بولىپ ەلگە, حالىققا قىزمەت ەتتى. ەكس-سپيكەردىڭ وسى جىلدارداعى ءومىرىنىڭ ەڭ جارقىن ساتتەرى ارنايى كورمەدەگى فوتوسۋرەتتەر ارقىلى باياندالىپ تۇردى.
و.مۇحامەدجانوۆ كوزى تىرىسىندە «قۇرمەت», «پاراسات», دوستىق (رف), «سودرۋجەستۆو» (تمد پاا) وردەندەرىمەن ماراپاتتالعان.
ەسكە الۋ كونفەرەنتسياسىن ءماجىلىس دەپۋتاتى نۇرتاي سابيليانوۆ جۇرگىزدى. ول العاشقى ءسوزدى ءماجىلىس توراعاسى نۇرلان نىعماتۋلينگە بەردى.
ءماجىلىس توراعاسى ءوز سوزىندە 2013 جىلى ومىردەن وزعان مەملەكەت جانە قوعام قايراتكەر و.مۇحامەدجانوۆپەن تانىسقان ءساتىن قىزمەتتەس بولعان كەزدەرىن ەسكە الىپ, كورنەكتى تۇلعانىڭ كىسىلىك, ادامگەرشىلىك قاسيەتتەرىنە توقتالدى.
– ورال بايعونىس ۇلىنىڭ ءوزىنىڭ قىزمەتىن تۋعان جەرى – قوستاناي وبلىسىنان باستاپ, ءومىرىنىڭ سوڭىنا دەيىن ەلىم دەپ, جەرىم دەپ ەڭبەك ەتتى. قازاقستانىمىز ەگەمەندىك العان ءبىرىنشى كۇننەن باستاپ, ەلباسىمىز نۇرسۇلتان ءابىش ۇلى نازارباەۆتىڭ قاسىندا بولىپ, ارقاشاندا پرەزيدەنتىمىزدىڭ ساياساتىن قولداپ, ەلىمىزدىڭ دامۋىنا ۇلكەن ۇلەس قوسقان ازامات ەدى. ەلباسىمىزدىڭ بارلىق باستامالارىنا بەلسەنە ارالاسىپ, قاي جەردە, قانداي قىزمەت اتقارسا دا, ىسكەرلىگىمەن, جاۋاپكەرشىلىگىمەن ادامگەرشىلىك جانە پاراساتتىلىق قاسيەتتەرىمەن تانىلدى. ارقاشاندا ابىرويى جوعارى, بەدەلى بيىك بولدى, – دەدى ن.نىعماتۋلين.
ورال بايعونىس ۇلىنىڭ جان-جاقتى قابىلەتى زور, ماقساتقا بەرىك, قىزمەتكە ادال بولعانىن العا تارتقان ءماجىلىس توراعاسى ونىڭ ەسىمى ەلىمىز تاريحىندا, سونىڭ ىشىندە ءماجىلىستىڭ تاريحىندا ماڭگىلىك ساقتالاتىنىن ايتتى.
ورال بايعونىس ۇلىنىڭ سوزگە شەشەندىگى, زاڭ شىعارۋشى ورگاننىڭ جۇمىسىنا قوسقان ەرەكشە ۇلەسى ايتىلدى.
ءماجىلىس توراعاسىنىڭ سوزىنەن سوڭ و.مۇحامەدجانوۆتىڭ عۇمىرىنان سىر شەرتەتىن بەينەفيلمنىڭ كورسەتىلىمى بولدى.
سونىمەن قاتار مەملەكەت جانە قوعام قايراتكەرى ورالباي ابدىكارىموۆ, سەنات توراعاسىنىڭ ورىنباسارى سەرگەي گروموۆ, قوعامدىق دامۋ ءمينيسترى دارحان كالەتاەۆ, IV شاقىرىلىمداعى ءماجىلىس توراعاسىنىڭ ورىنباسارى ۆلاديمير بوبروۆ, قوستاناي وبلىستىق ءماسليحاتىنىڭ حاتشىسى سايلاۋبەك ەسجانوۆ جانە باسقالار ورال بايعونىس ۇلىنىڭ عيبراتتى عۇمىرى مەن ونەگەلى ەڭبەك جولىن ەرەكشە تەبىرەنىسپەن بايانداپ بەردى.
سەرىك ابدىبەك,
«ەگەمەن قازاقستان»
