«سوڭعى ەكى جىلدا تەڭگە ەڭ تومەنگى مينيمۋمىنا تۇسكەنىمەن, مۇناي باعاسى ءتورت جىلداعى ەڭ جوعارعى دەڭگەيىنە جەتتى. مىسالى, ەكى جىل بۇرىن مۇنايدىڭ ءبىر باررەلىنىڭ باعاسى 45 دوللار, ياعني 15300 تەڭگە بولسا, بىلتىر ول 17000 تەڭگەگە جەتتى. قازىر مۇناي باعاسى 80 دوللارعا جاقىندادى. ال تەڭگەنىڭ 1 دوللارعا شاققانداعى كۋرسى 380-گە جاقىندادى دەسەك, وسىنىڭ ناتيجەسىندە ءاربىر 1 باررەل مۇناي كومپانيالارىنا 30 400 تەڭگە تازا تابىس اكەلەدى. ءسويتىپ ارتىق شىعىنسىز, تەك تەڭگە كۋرسىنىڭ وزگەرۋىمەن عانا مۇناي سالاسىنىڭ كومپانيالارى جالپى ەل بويىنشا تريلليون تەڭگەگە جۋىق قوسىمشا تازا پايدا كورىپ وتىر. ەگەر وسى قاراجاتتى عانا الاتىن بولسا وسىنىڭ ءوزى حالىقتىڭ زەينەتاقى قورى مەن دەپوزيتتەگى سالىمدارىن يندەكساتسيالاۋعا ەركىن جەتەر ەدى» دەيدى دەپۋتات.
وسى ساۋالعا ۇكىمەتتەن جانە ۇلتتىق بانكتەن جاۋاپ كەلدى. ۇكىمەت ءوز جاۋابىندا. «بىرىڭعاي جيناقتاۋشى زەينەتاقى قورىن ء(ارى قاراي بجزق) سەنىمدى باسقارۋ ۇلتتىق بانككە جۇكتەلگەن. بجزق-نىڭ ينۆەستيتسيالىق دەكلاراتسياسى ۇلتتىق بانكتىڭ قاۋلىسىمەن بەكىتىلىپ, ۇزاق مەرزىمگە شاقتالعان تابىس تابۋعا باعىتتالعان» دەي كەلىپ, وسىنىڭ ءوزى زەينەتاقى سالىمدارىن قۇنسىزدانۋدان قورعايتىنىن جەتكىزىپتى. سونىمەن قاتار زەينەتاقى سالىمدارىن ۇلتتىق ۆاليۋتانىڭ السىرەگەن كەزدەرىندە قۇنسىزدانۋدان ساقتاۋ ءۇشىن 2016 جىلدان باستاپ زەينەتاقى اكتيۆتەرىنىڭ ۆاليۋتالىق ۇلەسى كەزەڭ-كەزەڭمەن ارتتىرىلعانى ايتىلعان. ودان ءارى زاڭعا سايكەس سالىنعان زەينەتاقىلىق جارنالار ادامنىڭ جاسى زەينەتكە جەتكەن ۋاقىتىنداعى ينفلياتسيا دەڭگەيىنە ارتتىرىلۋمەن تولىقتاي تولەنەتىنىنە كەپىلدىك بەرىلەتىنى كورسەتىلىپ, ۇلتتىق قورعا مۇنايدان تۇسەتىن قارجى ەسەبىنەن زەينەتاقى قورىن يندەكساتسيالاۋ تۇجىرىمدامادا قاراستىرىلماعانى ايتىلادى.
ال دەپوزيتتىك سالىمدارعا بايلانىستى ايتقاندا, ولاردى ساقتاۋ ءۇشىن ازاماتتاردىڭ بىرنەشە امالدى قولدانۋعا بولاتىنىن, سونىڭ ىشىندە ەكىنشى دەڭگەيلى بانكتەردە شەتەلدىك ۆاليۋتامەن ساقتاۋ مۇمكىندىگى بارىن مەڭزەيدى. سونىمەن بىرگە سالىمداردى تەڭگەمەن ساقتاسا ءوسىمى جوعارى بولاتىنى جانە 15 ملن تەڭگەگە دەيىنگى سومانىڭ ساقتالۋىنا مەملەكەت كەپىلدىك بەرەتىنى ايتىلعان.
ال ۇلتتىق بانك توراعاسى د.اقىشەۆتىڭ جاۋابى بويىنشا:
قازاقستان رەسپۋبليكاسى ازاماتتارىنا ولاردىڭ جيناقتاۋشى زەينەتاقى جۇيەسىندەگى زەينەتاقى جيناقتارىنىڭ ينفلياتسيا ناتيجەسىندە قۇنسىزدانۋدان ساقتالۋىنا كەپىلدىك بەرەدى. ينفلياتسيا دەڭگەيى زەينەتاقى قورىنىڭ كىرىستىلىگىنەن اسىپ كەتكەن جاعدايدا, ۇكىمەت ازاماتتارعا جيناقتارىنداعى ايىرمانىڭ ورنىن تولتىرادى.
ورتاق زەينەتاقىنىڭ مولشەرى قازاقستاندا جىل سايىن ينفلياتسيانىڭ دەڭگەيىنەن 2%-عا اسا وتىرىپ, ال بازالىق زەينەتاقى جانە جاردەماقىلار ينفلياتسيانىڭ دەڭگەيىنە تەپە-تەڭ يندەكستەلەدى. وسىلايشا زەينەتاقى جيناقتارىنىڭ جارنالارىن مەملەكەت قۇنسىزدانۋدان قورعاپ قويعان.
دايىنداعان جاقسىباي سامرات,
«ەگەمەن قازاقستان»
