ءوز باسىم 11 بالا تاربيەلەپ وتىرعان انامىن. تۇسىنىكتى بولۋ ءۇشىن ايتا كەتەيىن, التاۋى وزىمدىكى, بەس پەرزەنتتى اسىراپ الدىم. وسى ارادا تۇيتكىلدى ءبىر جاي, باۋىرىنا باسقان بالالاردىڭ ون سەگىز جاسقا تولعاننان كەيىنگى تاعدىرى. ماسەلەن, ەكى قىزىم بۇگىندە ون سەگىزدەن استى. كامەلەتتىك جاستان اسقان سوڭ مەملەكەت تاراپىنان كورسەتىلەتىن كومەك توقتاتىلادى. ارينە, ءومىر بويى ولاردى ەشكىم اسىرامايتىنى انىق. بىراق, مەنى انا رەتىندە وسى بالالارىمنىڭ بولاشاعى قاتتى تولعاندىرادى. ءالى ءوز قولدارى ءوز اۋىزدارىنا جەتە قويعان جوق.
بىرەۋى زاڭگەر, ەكىنشىسى شاشتاراز ماماندىعىن يگەرۋ ءۇشىن ءبىلىم الۋدا. وسى ارادا بيىلعى جولداۋدا ەڭ تومەنگى جالاقى مولشەرىن كوتەرۋ ءۇمىت وتىمىزدى لاۋلاتىپ وتىر. اسىرەسە, ەڭبەك جولىن جاڭا باستاعان, قولتىعىنان دەمەيتىن جاناشىرى از وسىنداي بالالار تارشىلىق كورمەي, قاتارعا قوسىلىپ كەتەدى عوي. كۇنكورىس دەڭگەيى شىنىن ايتۋ كەرەك, كوپ دۇنيەگە اسەر ەتەدى. كەيدە شاڭىراق تا سودان شايقالادى. وسى سالادا جۇمىس ىستەگەننەن كەيىن بالانىڭ جەتىم قالۋ جايى نەلىكتەن ورىن الىپ وتىر دەگەن ساۋالعا سان مارتە جاۋاپ ىزدەدىك. سەبەپ وتە كوپ.
مىسالى, جالاقىنىڭ جەتىمسىزدىگى, جۇمىستىڭ بولماۋى, پاتەرگە قول جەتپەۋ, بالالارىن باقشاعا ورنالاستىرا الماۋى. وسىنداي سالدارلار شاڭىراقتىڭ شايقالۋىنا سەبەپشى. بيىل ءبىزدىڭ وبلىستا شاڭىراق كوتەرگەن جاستاردىڭ تەڭ جارتىسى اجىراسىپ كەتكەن دەگەن دە دەرەك جوعارىداعى جاعدايلاردىڭ كەرى اسەرىنەن ورىن العان.
بيىل ەسىل اۋدانىنداعى بالالار ءۇيى جابىلدى. وسى جەردە ەكى ايداي جۇمىس ىستەپ, سەكسەن بالانى اسىراپ العىسى كەلگەندەرگە تابىس ەتتىك. بۇل اراداعى جاۋاپكەرشىلىك جۇگى وراسان زور. بالالارمەن عانا ەمەس, بولاشاق اتا-انالارمەن دە ۇلكەن جۇمىس اتقارىلدى. ەڭ باستىسى, جەتىمدى جەبەيمىن دەگەن جاناشىر جاندار كوپ ەكەن. سوعان قۋاندىق. بۇل مىسال ءبىزدىڭ قوعامنىڭ ىزگىلىگىن كورسەتەدى. جەتىمنىڭ جانى نازىك قوي, ءسال نارسەگە وكپەلەپ قالۋى مۇمكىن. ۋىزعا جارىماعان بالا بولعاندىقتان, شىنى ۇستاعانداي اباي بولۋ كەرەك. مىنە, وسى ماسەلەنى اتا-انالارعا ابدەن ۇعىندىرۋعا تىرىستىق.
ءوزىم مەكتەپتە پسيحولوگيا پانىنەن ساباق بەردىم. سوندىقتان ءبىر پەرزەنتكە زار بولعان اتا-انانىڭ دا, جالعاننان جاقسىلىق ىزدەگەن جەتىمنىڭ جايىن دا جاقسى بىلەمىن دەپ ايتا الامىن. بار بالاعا ءبىلىم بەرەتىن مۇعالىم ەڭبەگىن باعالاۋ, ولاردى كولدەنەڭ شارۋاعا جەكپەۋ تۋرالى دا تاماشا ايتىلعان. ويتكەنى ولار بولاشاقتىڭ باعبانى عوي. بايىپتاپ قاراساڭىز, جولداۋداعى ايتىلعان ماسەلەلەردىڭ ءبارى ءبىر-بىرىمەن ساباقتاسىپ جاتقان دۇنيەلەر. ەندىگىسى ەلباسىمىز ايتىپ وتىرعان, ەلدىڭ كوكەيىندە جۇرگەن ورتاق مىندەتتى جۇزەگە اسىرساق, قوعامنىڭ كەمدىگى بۇتىندەلىپ, العا باسقان قادامىمىز نىق بولا تۇسەر ەدى.
قۇرالاي جۇمابەكوۆا,
«انا ءۇيى» قوعامدىق قورىنىڭ
«جانۇيا» بالا اسىراپ الۋدى قولداۋ
اقمولا ورتالىعىنىڭ وڭىرلىك وكىلى
اقمولا وبلىسى,
ەسىل اۋدانى
