«ليگا» سەرىكتەستىگىنىڭ ونىمدەرى جۇرتشىلىققا جاقسى تانىمال. ونىڭ ديرەكتورى ۆيكتور جاۆورونكوۆ سۋىق جانە كادەسىيلىق قارۋ-جاراق تۇرلەرىن جاساۋمەن شيرەك عاسىرعا جۋىق اينالىسىپ كەلەدى. وسى ۋاقىت ارالىعىندا قارۋ-جاراقتىڭ الپىستان استام ءتۇرىن ۇسىنىپتى. ولاردىڭ اراسىندا قازاق حاندارى مەن باتىرلارىنىڭ قايقى قىلىش, ايبالتا, قولشوقپار سەكىلدى قارۋلارى ۇلكەن سۇرانىسقا يە. كوللەكتسيادا سونداي-اق ازىرەت ءالىنىڭ زۇلپىقارى, ساق سەمسەرى-اكيناك, انگليا پاتشاسى ارتۋردىڭ ەسكاليبۋرى, ماملۇكتەردىڭ, ورتالىق جانە شىعىس ازيا ەلدەرىنىڭ, جاپونداردىڭ, ۇندىلىكتەردىڭ, تۇرىكتەردىڭ, ورىستاردىڭ, كازاكتاردىڭ قارۋلارى دا بار.
«كاسىپورىندا ونبەس ادام ەڭبەك ەتەدى. ارقايسىسى ءوز ءىسىنىڭ مايتالمان شەبەرلەرى سانالادى. ءبىر تۋىندىنى جاساۋعا ءۇش ايعا دەيىن ۋاقىت كەتەدى. سوعان وراي باعاسى دا ارقيلى. جارتى ميللون تەڭگەگە دەيىن باعالاناتىن دۇنيەلىكتەر جوق ەمەس. ادەمىلىگىمەن قوسا جاسالۋ تەحنيكاسىنا دا باسا نازار اۋدارامىز. ءار قارۋدىڭ ءوز تاريحى بار. ارنايى تاپسىرىستار كوپتەپ ءتۇسىپ جاتادى, دەيدى ۆيكتور پاۆلوۆيچ.
مۇسىلمانداردىڭ اتى اڭىزعا اينالعان باتىرى, يسلام دىنىندەگى وتە ءادىل حاليفالاردىڭ ءبىرى ازىرەت الىگە مۇحاممەد/ع.س.ع./پايعامبارىمىزدان مۇراعا قالعان ۇشى ايىر قىلىش-زۇلپىقاردى تاماشالاۋشىلار قاتارى قالىڭ. ەكى ءجۇزدى, ۇشى وتكىر, قىسقا ساپتى قارۋلار قۇرىشتان سوعىلعاندىقتان مىقتى. قاشقار, بالاساعۇن, شاش, وتىرار قالالارىنان قالعان جۇرناقتى, ەسكى جادىگەردى كوزگە ەلەستەتەدى. قايقى قىلىشتار, ۇزىندى-قىسقالى پىشاقتار, اسكەري اساتاياق, قولشوقپار جاسالۋ شەبەرلىگىمەن ەرەكشە سۇيسىندىرەدى.
داماسك بولاتىنان قۇيىلعان اۆتورلىق سۋىق جانە ەكسپونات قارۋ-جاراقتار كورمەسىن الماتىلىقتار مەن استانالىقتار, ماسكەۋلىكتەر دە قىزىعا تاماشالاپتى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
