بۇل جوبا جاستاردىڭ يننوۆاتسيالىق جانە كاسىپكەرلىك پوتەنتسيالىن ارتتىرىپ, جاستاردى كاسىپكەرلىككە باۋلۋ ارقىلى ولاردىڭ قۇزىرەتتىك دەڭگەيىن كوتەرۋگە باعىتتالعان. جوبا قاتىسۋشىلارى كاسىپكەرلىك نەگىزدەرىن ۇيرەنىپ, بيزنەس-جوسپار دايىنداۋدا كونسۋلتاتيۆتىك قىزمەت كورسەتۋ مەن بيزنەس-جوسپارلاردى قورعاۋ الاڭىن ۇيىمداستىرۋدى مەڭگەردى. سونىمەن قاتار, «يدەيالار جارمەڭكەسى» بايقاۋىنا قاتىستى. قاتىسۋشىلار وقۋ بارىسىندا بيزنەستىڭ قىر-سىرىن مەڭگەرىپ, بولاشاقتا جۇزەگە اسىرعىسى كەلەتىن جوبالارىن كوميسسيا الدىندا قورعاپ شىقتى.
ناتيجەسىندە جاڭاشىلدىعى مەن الەۋمەتتىك ماڭىزى جاعىنان سايكەس كەلەتىن 4 قاتىسۋشىنىڭ «قارالما» تاۋ-شاڭعى كۋرورتىندا تۋريستىك قىزمەت كورسەتۋ,
جامبىل وبلىسىنىڭ توزعان جانە تۇزدالعان جەرلەرىندە فوسفور, گيپس جانە كوڭ نەگىزىندە بيومەليورانت-ءونىمنىڭ جاڭا ءتۇرىن ەنگىزۋ, فەتردەن ازىرلەنگەن بالالارعا ارنالعان دامىتۋ كىتاپشالارى مەن ويىنشىقتارىن وندىرەتىن شاعىن تسەح جانە پلاستيكالىق قالدىقتاردى قايتا وڭدەيتىن شاعىن تسەح سياقتى جوبالارى ىرىكتەلىپ الىندى.
كوميسسيا مۇشەلەرىنىڭ شەشىمىمەن م.ح.دۋلاتي اتىنداعى تاراز مەملەكەتتىك ۋنيۆەرسيتەتىنىڭ دوكتورانتى داۋلەت ەگەمبەرديەۆتىڭ جوباسى ءبىرىنشى ورىندى جەڭىپ الدى جانە ول گرانتتىق قارجىلاندىرۋ باعدارلاماسىنا ۇسىنىلاتىن بولادى. جاس عالىم توپىراعى توزعان ەگىستىك القاپتارى مەن تۇزدالعان جەرلەردى قالپىنا كەلتىرەتىن جاڭا بيومەليورانت ويلاپ تاپقان. قازاقستاندا اۋىل شارۋاشىلىعى وندىرىسىندە 2 ميلليون گەكتار ەگىستىك القابىنىڭ توپىراعى توزعانىن ەسكەرسەك, توزعان توپىراقتى ءتيىمدى پايدالانۋ ءۇشىن بيومەليورانتتار مەن ورگانيكالىق تىڭايتقىشتاردى قولدانۋ قاجەت. داۋلەت ەگەمبەرديەۆ تۇزدالعان جەرلەردە توپىراقتىڭ قۇنارلىلىعىن قالپىنا كەلتىرۋدىڭ ءتيىمدى ادىستەرىنىڭ ءبىرى جاڭا بيومەليورانتتى پايدالانۋ بولىپ تابىلاتىنىن ايتادى. «بۇل ءادىستى جۇزەگە اسىرۋ ءۇشىن جولى وتە قاراپايىم. ەنەرگو ۇنەمدەۋشى كومپونەنتتەر جەرگىلىكتى شيكىزات رەسۋرستارىنان قۇرالعان. ءبىر كيلوگرامم بيومەليورانتتىڭ وزىندىك قۇنى 16 تەڭگە. بيومەليورانتتى پايدالانعاننان كەيىن ەگىستىك ونىمدىلىگى 30-50 پايىزعا دەيىن ارتادى», دەيدى ول.
مۇنداعى تاعى ءبىر قىزىقتى جوبا «فەتردەن ازىرلەنگەن بالالارعا ارنالعان دامىتۋ كىتاپشالارى مەن ويىنشىقتارىن وندىرەتىن شاعىن تسەح» اشۋ بولدى. «جاس كاسىپكەرلىك مەكتەبىنىڭ» قاتىسۋشىسى سىرعالىم تويباەۆا كيىزدەن بالالاردىڭ اقىل-ويىن دامىتۋعا باعىتتالعان ءتۇرلى ويىنشىقتار تىگۋمەن اينالىسادى. كەيىننەن بالاباقشالار مەن اتا-انالار تاراپىنان سۇرانىس تۇسە باستاعانىن بايقاعان ول تاپسىرىس قابىلداپ, ويىنشىقتار مەن كىتاپتار تىگە باستايدى.
ء«بىز 1000 تەڭگەدەن باستاپ 25000 مىڭ تەڭگەگە دەيىنگى قاراجات ارالىعىندا ويىنشىقتار ازىرلەيمىز. ياعني, تۇتىنۋشىنىڭ تالعامىنا وراي بارلىق تاپسىرىستى قابىلدايمىز» , دەيدى جاس كاسىپكەر. سىرعالىم تويباەۆا «جاس كاسىپكەرلەر مەكتەبىندە ءتۇرلى تىڭ يدەيالارمەن تانىسىپ, بولاشاق بيزنەسمەنگە قاجەت قاسيەتتەردى مەڭگەرىپ شىققان.
«بايقاۋدا باعىن سىناعان ءار قاتىسۋشىنىڭ تىڭعىلىقتى دايىندالعاندىعى كورىنىپ تۇر. ەسەپ-قيساپتارى, ماركەتينگتىك جاعىنان ەسەپتەلۋى, شىعىن مەن كىرىس, كاسىپتى جۇزەگە اسىرۋ ورنى ءتيىمدى تاڭدالعان جانە بيزنەس باستاۋداعى بارلىق جايتتار جان-جاقتى قامتىلعان. بۇل ەڭ اۋەلى كاسىپكەرلەر پالاتاسىنىڭ بيزنەس-ترەنەردىڭ ەڭبەگى», – دەيدى جامبىل وبلىسى كاسىپكەرلەر پالاتاسىنىڭ قارجىلاي ەمەس قولداۋ ءبولىمىنىڭ باسشىسى ديانا تۇكپەتوۆا.
حاميت ەسامان,
«ەگەمەن قازاقستان»
جامبىل وبلىسى
