كىرىستىلىك پەن تاۋەكەل اراسىندا. ۇلتتىق بانك توراعاسىنىڭ ورىنباسارى جانات قۇرمانوۆپەن سۇحبات

– جانات بوستان ۇلى, قازاقستان رەسپۋبليكاسىنىڭ ۇلتتىق قورى (قرۇق) ەلىمىزدىڭ قارجىلىق ورنىق­تىلىعىن قامتاماسىز ەتۋ جۇيەسىندە نەگىزگى ەلەمەنتتەردىڭ ءبىرى ەكەنى بەلگىلى. ۇلتتىق بانكتىڭ باس­قارۋىنداعى قوردىڭ قاراجاتى سالىنعان ينۆەستيتسيالىق پورت­فەل­دىڭ قۇرىلىمى تۋرالى ايتىپ بەرسەڭىز.

– قرۇق قۇرىلىمى تۇراقتاندىرۋ جانە جيناق پورتفەلدەرىنەن تۇرادى. تۇراقتاندىرۋ پورتفەلى قرۇق وتىمدىلىگىنىڭ جەتكىلىكتى دەڭ­گەيىن ۇستاپ تۇرۋ ءۇشىن قاجەت. اقش-تىڭ 6 ايلىق قازىناشىلىق وبليگا­تسيا­لارىنىڭ يندەكسى تۇراقتاندىرۋ پورتفەلى ءۇشىن ەتالون پورتفەلى بولىپ سانالادى. ءوز كەزەگىندە, جيناق پورتفەلىنىڭ نەگىزگى ماقساتتارى قارا­جاتتى جيناقتاۋ مەن ساق­تاۋ, سونداي-اق تاۋەكەلدىڭ ءتيىستى دەڭگەيى بولعان كەزدە ۇزاق مەرزىمدى بولاشاقتا كىرىستىلىكتى قامتاماسىز ەتۋ بولماق.

2016 جىلدىڭ سوڭىندا ۇلتتىق قوردىڭ قاراجاتىن قالىپتاس­تىرۋ مەن پايدالانۋدىڭ جاڭا تۇجى­رىم­داماسى بەكىتىلدى, وندا جيناق پورت­فەلىنىڭ اكتيۆتەرىن كونسەرۆاتيۆتى بولۋدەن 3-5 جىل ىشىندە اكتيۆتەردى بارىنشا تەڭگەرىمدى ستراتەگيالىق بولۋگە ءوتۋ كوزدەلەدى.

قرۇق اكتيۆتەرىن جاڭا ءبولۋ شەڭبەرىندە جيناق پورتفەلىنىڭ قۇرامىنداعى اكتسيالار ۇلەسىن 20%-دان 35%-عا دەيىن, بالاما قۇرالدار پورتفەلىن 5%-عا دەيىنگى ۇلەستىك سالماقپەن قۇرۋ, سونداي-اق وبليگاتسيالار ۇلەسىن 80%-دان 60%-عا دەيىن تومەندەتۋ جوسپارلانىپ وتىر.

دامىعان مەملەكەتتەردىڭ تاۋەل­سىز وبليگاتسيالارىنىڭ پورت­فەلى ءۇشىن ەتالوندىق كومپوزيتتىك يندەكس­كە مىناداي ۇلەستىك سالماقتارى بار يندەكستەر كىرەدى: اقش – 55%, ەۋرو ايماق – 15%, ۇلىبريتانيا – 10%, جاپونيا – 5%, اۋستراليا – 5%, كانادا – 5%, وڭتۇستىك كورەيا – 5%. 2018 جىلعى قىركۇيەكتەگى جاعداي بويىنشا اكتسيالار پورتفەلىنە 37 ەلدىڭ ەميتەنتتەرىنىڭ اكتسيالارى كىرەدى. نەگىزگى ينۆەستيتسيالاۋ ۆاليۋتالارى مىنالار: اقش دوللارى – اكتسيالار پورتفەلىنەن 60,10%, ەۋرو – 13,18%, فۋنت ستەرلينگى – 8,64%, جاپون يەناسى – 8,36%, كانادا دوللارى – 2,87%, شۆەيتساريا فرانكى – 2,43%, اۋستراليا دوللارى – 1,55%, قالعان ۆاليۋتالار – 2,87%.

– قازىرگى ۋاقىتتا قرۇق پورت­فەلىندەگى قانداي قۇرالدار بارىنشا كوپ تابىس اكەلەدى؟

– تاريحي تۇرعىدان اكتسيالارعا ينۆەستيتسيالار بارىنشا جوعارى كىرىستىلىكتى كورسەتىپ وتىر. قرۇق جيناق پورتفەلىنىڭ قۇرامىنداعى اكتسيا­لارعا ينۆەستيتسيالاۋ اكتيۆ­تەردى ءارتاراپتاندىرۋ ساياساتىن جال­عاستىرۋعا جانە ۇزاق مەرزىمدى كۇ­تىلەتىن كىرىستىلىكتى ارتتىرۋعا باعىت­تالعان. اكتسيالار بويىنشا كىرىس­تى­لىكتىڭ جوعارى كورسەتكىشى بارىن­شا جوعارى نارىقتىق قۇبىلما­لى­لىقپەن سيپاتتالادى. مىسالى, 2017 جىلدىڭ قورىتىندىلارى بويىن­شا اكتسيالار پورتفەلىنىڭ كىرىستى­لىگى 22,81%, ال 2018 جىلعى ءبىرىنشى جار­تى­جىلدىقتا (-)0,48% بولدى. سوندىقتان ۇزاق مەرزىمدى بولاشاقتا كىرىستىلىكتى قامتاماسىز ەتۋ بويىنشا العا قويىلعان ماقساتتاردى ەسكەرە وتىرىپ كىرىستىلىك كورسەتكىشتەرىن باعالاعان دۇرىس.

– ۇلتتىق بانك وڭتۇستىك ازيا­نىڭ تەز دامىپ كەلە جاتقان نارىق­تارىن ينۆەستيتسيالاۋ ءۇشىن تار­تىمدى ايماق رەتىندە قاراستىرا ما؟

– وسىعان دەيىن اتاپ وتكەن قرۇق اكتيۆتەرىن جاڭا ءبولۋ وبليگاتسيالار پورتفەلىنىڭ ىشىندە دامىعان مەملەكەتتەردىڭ تاۋەلسىز وبليگاتسيالارىنا (35%), كورپوراتيۆتىك وبليگاتسيالارعا (10%) جانە دامۋشى مەملەكەتتەردىڭ تاۋەلسىز وبليگاتسيالارىنا (15%) ءبولۋدى دە بولجايدى. دامۋشى مەملەكەتتەردىڭ اقش دوللارىمەن دەنومينيرلەنگەن تاۋەلسىز وبليگاتسيالارىنىڭ پورتفەلى ءۇشىن ەتالوندىق يندەكسكە كرەديتتىك رەي­تينگى ۆۆ (S&P)-دان تومەن ەمەس ەلدەر كىرەدى. بۇل ولشەمشارتقا ين­دونە­زيا جانە فيليپپين سياقتى ەلدەر سايكەس كەلەدى, وسىلايشا, دامۋ­­شى نارىقتارعا ينۆەستيتسيالاۋ وڭ­تۇستىك-شىعىس ازيا ءوڭىرىن ءىشىنارا قامتيدى.

– ۇلتتىق قوردىڭ ينۆەستيتسيا­لىق پورتفەلىندەگى دوللارلىق قاعاز­داردىڭ ۇلەسى قانداي؟ بۇل ۇلەس وتكەن بىرنەشە جىلدا قالاي وزگەردى؟

– اقش دوللارىمەن دەنومينيرلەنگەن باعالى قاعازداردىڭ ۇلەسى الەمدەگى باسقا تاۋەلسىز قورلار­داعى سياقتى قرۇق اكتيۆتەرىندە دە ءداستۇرلى تۇردە اۋقىمدى سانالادى. قرۇق تۇراقتاندىرۋ پورتفەلىنىڭ اكتيۆتەرى 99,99%-عا اقش دوللارىمەن دەنومينيرلەنگەن.

2017 جىلعى ماۋسىمدا قرۇق جيناق پورتفەلىنىڭ قۇرامىندا ۆاليۋ­تا­لىق قۇبىلمالىلىقتى تومەندەتۋ, سونداي-اق كىرىستىلىك مولشەرلەمەسى تارتىمسىز ەلدەرگە سالۋ ۇلەسىن ازايتۋ ماقساتىندا تىركەلگەن كىرىستىلىگى بار باعالى قاعازدار ءۇشىن اقش دوللارىمەن اكتيۆتەردىڭ ۇلەسى 45%-دان 10 پايىزدىق تارماققا ۇلعايتىلدى. وسىلايشا اعىمداعى ساتتە جيناق پورتفەلىنىڭ قۇرامىندا دامىعان مەملەكەتتەردىڭ تاۋەلسىز وبليگاتسيالار پورتفەلى ءۇشىن ەتالوندىق كومپوزيتتىك يندەكستەگى اقش دوللارىمەن اكتيۆتەردىڭ ۇلەس سالماعى 55%-دى قۇرايدى.

MSCI World يندەكسى اكتسيالارعا ينۆەستيتسيالار ءۇشىن ەتالوندىق پورتفەل بولادى. بۇل يندەكسكە كىرە­تىن باعالى قاعازداردىڭ 55%-دان استامى اقش دوللارىمەن دە­نو­مينيرلەنگەن. 2018 جىلعى قىر­كۇيەك­تەگى جاعداي بويىنشا اكتسيا­لار پورتفەلىنىڭ قۇرامىنداعى دول­لاردىڭ ۇلەسى 60,10% بولدى.

– ۇلتتىق بانك پورتفەلدە قىتاي ەميتەنتتەرى قۇرالدارى­نىڭ ۇلەسىن ءوسىرۋدى جوسپارلاپ وتىر ما؟ بۇل قاعازدار دوللار­مەن دەنو­مينيرلەنگەن بە الدە ۇلتتىق بانك يۋانعا ءتان تاۋەكەلدەردى وزىنە قابىلداي ما؟

– قازىرگى كەزدە قرۇق مەن بجزق اك­تيۆتەرىندە يۋانمەن دەنومي­نيرلەنگەن قارجى قۇرالدارى جوق. سونىمەن بىرگە قىتايدىڭ نارىعىن ىرىقتاندىرۋ جاعدايىندا يۋانمەن دەنومينيرلەنگەن قارجى اكتيۆ­تەرى كاپيتالدىڭ الەمدىك نارىعى­نىڭ اجىراماس بولىگى بولادى. قىتاي قاعازدارىن MSCI جانە Bloomberg يندەكستەرىنە قوسۋ ولارعا ينستيتۋتسيونالدىق ينۆەستورلار تاراپىنان سۇرانىستىڭ ۇلعايۋىنا اپارۋى مۇمكىن. وسىعان وراي ۇلت­تىق بانك يۋان جانە قىتايدىڭ باعا­لى قاعازدارى اينالاسىنداعى اعىم­داعى جاعدايدى, سونداي-اق اقش پەن قىتاي اراسىنداعى ساۋدا جانجالىنىڭ دامۋىن تۇراقتى نەگىزدە قاداعالايدى.

– پورتفەلدە رەسەي ەميتەنت­تەرىنىڭ قاعازدارى بار ما؟ رف-عا قاتىستى سانكتسيالارعا قا­تىستى احۋال ۇلتتىق بانكتىڭ ينۆەس­تيتسيالىق ساياساتىنا اسەر ەتە مە؟

– قازىرگى كەزدە قرۇق پورت­فەلىن­­دە رەسەيلىك ەميتەنتتەردىڭ باعالى قاعازدارى جوق. وسىلايشا رەسەي فەدەراتسياسىنا قاتىستى سانك­تسيالار ۇلتتىق قوردىڭ اعىم­داعى ينۆەستيتسيالارىنا تىكەلەي اسەر ەتپەيدى.

– ۇلتتىق قوردىڭ اعىمداعى جىلدىڭ باسىنان بەرگى ينۆەستي­تسيالىق كىرىستىلىگى قانداي؟ بۇل كورسەتكىشكە ۆاليۋتا باعامىنىڭ قۇبىلمالىلىعى قالاي اسەر ەتتى؟

– قرۇق-نىڭ اكتيۆتەرىن ۇلت­تىق بانك شەتەلدىك قارجى نارىق­تارىنداعى اينالىستاعى قارجى قۇرالدارىنا ينۆەستيتسيالايدى. قور اكتيۆتەرىنىڭ كىرىستىلىگىن ەسەپتەۋ نەگىزگى ۆاليۋتا – اقش دوللارىمەن جۇرگىزىلەدى. وسىلايشا اقش دوللارىنىڭ ۇلتتىق ۆاليۋتاعا قاتىستى ايىرباستاۋ باعامى قرۇق كىرىستىلىگىنىڭ كورسەتكىشتەرىنە اسەر ەتپەيدى, سەبەبى ول اقش دوللارىمەن كورسەتىلەدى.

اكتيۆتەردى ۆاليۋتالارمەن ءارتا­راپ­ت­اندىرۋدى ساقتاۋ قاجەتتى­لىگىنە بايلانىستى اقش دوللارىمەن كورسەتىلگەن كىرىستىلىككە اقش دوللارىنىڭ باسقا الەمدىك ۆاليۋ­تالارعا قاتىستى باعامىنىڭ وزگەرۋى اسەر ەتەدى. 2018 جىلدىڭ باسىنان بەرى اقش دوللارىنىڭ نىعايۋى اعىم­داعى تەرىس كىرىستىلىككە اكەپ سوق­تى, ول ءبىرىنشى جارتىجىلدىقتىڭ قورى­تىندىسى بويىنشا (-)0,73%-دى قۇرادى. سونىمەن بىرگە قوردىڭ قۇرىلعاننان بەرى 2018 جىلعى 30 ماۋسىمعا دەيىنگى ۋاقىتتاعى كىرىس­تىلىگى 79,51% بولدى, بۇل جىل­دىق كور­­سەتكىش بويىنشا 3,54%-دى قۇ­راي­­دى. قرۇق-نىڭ سوڭعى 5 جىل­دا­عى جيىنتىق كىرىستىلىگى 8,12%, ال سوڭ­­عى 3 جىلداعى كىرىستىلىگى 5,87% بول­دى. 2017 جىلدىڭ قورىتىندىسى بو­­يىن­­شا قرۇق كىرىستىلىگى 7,61%-دى قۇرا­دى.

– ۇلتتىق بانكتىڭ تاعى ءبىر ما­ڭىزدى قىزمەتى – بجزق اكتيۆ­تەرىن باسقارۋ. ۇلتتىق بانكتىڭ اكتيۆتەردىڭ ءبىر بولىگىن سىرتقى باسقارۋعا بەرۋ ساتىسىن­دا ەكەن­دىگى بەلگىلى. بجزق اكتيۆ­تەرىنىڭ قانداي ۇلەسىن قازىر ۇلت­تىق بانك دەربەس باسقارىپ وتىر, قانداي بولىگى تىسقارى باسقارۋ­شىلاردىڭ باسقارۋىنا بەرىلدى؟

– 2018 جىلعى 1 قازانداعى جاع­داي بويىنشا بجزق زەينەتاقى اكتيۆتەرى پورتفەلىنىڭ كولەمى 8,9 ترلن تەڭگەنى قۇرايدى. بۇل رەتتە سىرتقى باسقارۋدا 79,4 ملرد تەڭگە نەمەسە زەينەتاقى اكتيۆتەرىنىڭ 0,9%-ى بار.

قازىرگى ۋاقىتتا ۇلتتىق بانك «جاھاندىق اكتيۆ اكتسيالار» جانە «جاھاندىق پاسسيۆ اكتسيالار» مانداتتارى شەڭبەرىندە شەتەل­دىك باسقارۋشى كومپانيالاردى تاڭداۋ جانە تارتۋ بويىنشا جان-جاقتى جۇمىس جۇرگىزىپ جاتىر. اتاپ ايتقاندا, پورتفەلدەردىڭ ولشەمدەرى, ينۆەستيتسيالىق سترا­تە­گيا جانە سەنىمگەرلىك باس­قارۋ­دىڭ باسقا دا تالاپتارى تالقى­لانۋ­دا, سونداي-اق اكتسيالار نارى­عىنا ينۆەستيتسيالاۋدىڭ نەعۇر­لىم قولايلى ءساتىن ايقىنداۋ جۇ­مىسى جۇرگىزىلۋدە. اكتسيالار نارى­عىنا كىرۋدىڭ قولايلى ءساتىنىڭ ماڭىز­دىلىعىن ەسكەرە وتىرىپ, بجزق-نىڭ اكتيۆتەرىن كورسەتىلگەن مانداتتار بويىنشا سىرتقى سەنىمگەرلىك باسقارۋعا تارتۋ كەزەڭ-كەزەڭىمەن جۇزەگە اسىرىلاتىن بولادى. 

ۇلتتىق بانك «اقش دوللارىمەن نومينيرلەنگەن, كاپيتالداندىرىلۋى جوعارى ينۆەستيتسيالىق دەڭگەيدەگى جاھاندىق كورپوراتيۆتىك وبليگاتسيالار» مانداتى بويىنشا شەتەلدىك باسقارۋشى كومپانيالاردى تارتۋ جونىندەگى جۇمىستى دا جۇرگىزۋدە. 

ۇلتتىق بانك بجزق-نىڭ زەينەت­اقى اكتيۆتەرىن بەرمەيتىنىن, ۇلتتىق بانكتىڭ شارتتى كەز كەلگەن ساتتە بۇزۋ قۇقىعىمەن ينۆەستيتسيالىق شەكتەۋلەر شەڭبەرىندە بجزق اكتيۆتەرى­نىڭ ءبىر بولىگىن باسقارۋ جونىندەگى وكىلەتتىكتەردى شەتەلدىك باسقارۋشى كومپانيالارعا بەرەتىنىن اتاپ وتكەن ءجون. وسىلايشا بجزق-نىڭ سىرتقى سەنىمگەرلىك باسقارۋداعى زەينەتاقى اكتيۆتەرى كەز كەلگەن جاعدايدا ۇلت­تىق بانكتىڭ كاستوديان-بانكتەگى شوتتارىندا قالادى. 

– بجزق-نىڭ ۇلتتىق بانكتىڭ باسقارۋىنداعى پورتفەلىنىڭ قۇرىلىمى قانداي؟

– 2018 جىلعى 1 قازانداعى جاعداي بويىنشا ۆاليۋتالىق اكتيۆ­تەردىڭ ۇلەسىنە جالپى پورتفەلدىڭ 30,9%-ى تيەسىلى, ونىڭ 30,5%-ىن اقش دوللارى, 0,3%-ىن رەسەي ءرۋبلى جانە 0,1%-ىن باسقا دا ۆاليۋتالار قۇرايدى. 

قاراستىرىلىپ وتىرعان كۇنگى جاعداي بويىنشا ينۆەستيتسيالاردىڭ نەگىزگى ۇلەسى قازاقستان رەسپۋبلي­كاسى ەميتەنتتەرىنىڭ قارجى قۇرال­دارىنا تيەسىلى. ولاردىڭ پورت­فەل­دەگى ۇلەسى – 77,4%. اقش ەمي­تەنت­تەرىنىڭ ۇلەسى – 7,2%, رەسەي فەدەرا­تسياسىنىڭ ۇلەسى – 3,4%. 12,0% مولشەرىندەگى قالعان بولىگى حالىق­ارالىق قارجى ۇيىمدارىنىڭ جانە فرانتسيا, نيدەرلاند, سينگا­پۋر, يندونەزيا, مەكسيكا, پەرۋ جانە باسقا دا شەت مەملەكەتتەر ەمي­تەنت­تەرىنىڭ قارجى قۇرالدارىنا تيەسىلى. 

قارجى قۇرالدارىنىڭ تۇرلەرى بويىنشا بجزق زەينەتاقى اكتيۆ­تەرىنىڭ ينۆەستيتسيالىق پورتفەلى 86,7%-عا وبليگاتسيالاردان, 9,1%-عا دەپوزيتتەردەن, 2,0%-عا اكتسيالاردان, 1,3%-عا اقشادان جانە رەپو-دان, سونداي-اق 0,9%-عا سىرتقى باسقارۋداعى اكتيۆتەردەن تۇرادى. 

– دوللاردىڭ الەمنىڭ باسقا ەلدەرىنىڭ, ءبىرىنشى كەزەكتە, دامۋشى نارىقتاردىڭ ۆاليۋتالارىنا قاتىستى نىعايعانىن ەسكەرسەك, بجزق پورتفەلىندەگى دوللارمەن سالىنعان قۇرالداردىڭ ۇلەسى ۇلعايىپ جاتىر ما؟

– 2016 جىلدان بەرى ۇلتتىق بانك بجزق زەينەتاقى اكتيۆتەرىنىڭ پورتفەلىن ءارتاراپتاندىرۋ, ونىڭ ىشىندە بجزق زەينەتاقى اكتيۆ­تەرىنىڭ ۆاليۋتالىق ۇلەسىن كەزەڭ-كەزەڭىمەن ۇلعايتۋ جانە ونى 30% دەڭگەيىندە ۇستاپ تۇرۋ ەسەبىنەن بەلسەندى جۇمىس جۇرگىزۋدە. 2016 جىلعى 1 قاڭتار – 2018 جىلعى 30 قىركۇيەك ارالىعىنداعى كەزەڭدە زەينەتاقى اكتيۆتەرىنىڭ ۆاليۋتالىق ۇلەسى پورتفەلدىڭ 17%-دان 31%-نا دەيىن ۇلعايتىلدى. ۆاليۋتا­لىق پوزيتسيانىڭ بولۋى ەلدەر بو­يىنشا ينۆەستيتسيالار گەوگرافياسىن جانە ساتىپ الىناتىن قارجى قۇرالدارىنىڭ اياسىن كەڭەيتۋگە, ينۆەستيتسيالىق پورتفەلدىڭ ساپاسى مەن وتىمدىلىگىن ارتتىرۋعا, سونداي-اق ۇلتتىق ۆاليۋتا السىرەگەن كەزەڭ­دەردە سالىمشىلاردىڭ زەينەت­اقى اكتيۆتەرىن قورعاۋدى قامتاماسىز ەتۋگە مۇمكىندىك بەرەدى. بۇل رەتتە بجزق زەينەتاقى اكتيۆتەرىنىڭ ۆاليۋ­تالىق بولىگىنىڭ قولداۋ كور­سەتىلەتىن ۇلەسى بۇگىندە وڭتايلى جانە ىشكى ەكونوميكانى بجزق-نىڭ زەينەتاقى اكتيۆتەرىنىڭ ەسەبىنەن ساتىپ الۋعا رۇقسات ەتىلگەن سەنىمدى قۇرالدار تىزبەسىنە ينۆەستيتسيالاۋ ارقىلى قورلاندىرۋعا مۇمكىندىك بەرەدى.

– بجزق اكتيۆتەرىنىڭ جىلدىڭ باسىنان بەرگى ينۆەستيتسيالىق كىرىس­تىلىگى قانداي؟ ۆاليۋتا باعا­مى­نىڭ قۇبىلمالىلىعى بۇل كور­سەتكىشكە قالاي اسەر ەتتى؟

– 2018 جىلعى 9 ايدا بجزق زەينەتاقى اكتيۆتەرىنىڭ بجزق سالىم­شىلارىنىڭ شوتتارىنا بو­لىنگەن كىرىستىلىگى ينفلياتسيا دەڭگەيى 3,3% مولشەرىندە قالىپتاسقان كەزدە 7,75%-دى قۇرادى. وسىلايشا 2018 جىلدىڭ باسىنان بەرى بجزق-نىڭ زەينەتاقى اكتيۆتەرى بويىنشا 4,45% مولشەرىندە ناقتى كىرىستىلىك قامتاماسىز ەتىلدى. 

باعامدىق اسىرا باعالاۋدان تۇسەتىن كىرىستەردىڭ 2018 جىلعى 9 ايداعى جالپى ينۆەستيتسيالىق كىرىستەگى ۇلەسى شامامەن 37% بولدى. باعالى قاعازدار, دەپوزيتتەر جانە باسقا دا قارجى قۇرالدارى بويىنشا سىياقى تۇرىندەگى كىرىستەر ۇلەسى شامامەن 63%-دى قۇرايدى.

– بجزق پورتفەلىندەگى دەفولت­تىق قۇرالداردىڭ ۇلەسى قانداي؟

– بۇگىندە بجزق زەينەتاقى اك­تيۆ­­تەرىنىڭ پورتفەلىندەگى دەفولت­تىق قارجى قۇرالدارى قۇنسىزدان­عان جانە سالىمشىلاردىڭ زەي­نەت­اقى جيناقتارىنىڭ كولەمىنە اسەر ەتپەيدى. مۇنداي ەميتەنتتەر مىن­دەت­تەمەلەرىنىڭ نومينالدىق قۇنى بو­يىنشا كولەمى زەينەتاقى اكتيۆتەرى­نىڭ 1%-نا جەتپەيدى. بجزق-نىڭ بارلىق بورىشكەرلەرىنە قاتىستى سالىنعان قاراجاتتى قايتارۋعا باعىتتالعان شاعىم-تالاپ ەتۋ جانە باسقا دا جۇمىستار بەلسەندى تۇردە جۇرگىزىلۋدە.

دۋمان اناش,

«ەگەمەن قازاقستان»