«بولاشاق» قاۋىمداستىعىنىڭ وڭىرلىك فيليالى ۇيىمداستىرعان شارادا تۋعان جەرىنە قول سوزعان مەتسەناتتاردىڭ ۇلگىلى ءىسى كوپشىلىككە كەڭىنەن تانىستىرىلدى. جىل باسىنان بەرى توعىز اي ىشىندە اق جايىق وڭىرىندە مەتسەناتتاردىڭ كۇشىمەن 166 جوبا جۇزەگە اسقان ەكەن. ونىڭ 138-ءى اۋىل وكرۋگتەرىندە, 20-سى – اۋدان, 8-ءى – ورال قالاسىندا اتقارىلعان. وسىدان-اق جومارت جۇرەك جانداردىڭ جىلۋىن ەڭ الدىمەن الىس اۋىل, شاعىن ەلدىمەكەندەر كورىپ جاتقاندىعى كورىنىپ تۇر.
شارادا 11 اتالىم بويىنشا مەتسەناتتار ماراپاتتالدى. «جۇرەكتەن جۇرەككە» سىيلىعىنا 2014 جىلى بولات وتەمۇراتوۆ قۇرعان «اسىل ميراس» قورى يە بولدى. بيىل ورال قالاسىندا وسى قوردىڭ ارالاسۋىمەن اۋتيزم دەرتىنە شالدىققان بالالاردى ەمدەۋ, الەۋمەتتىك تۇرمىسقا بەيىمدەۋ ءۇشىن بارلىق زاماناۋي جابدىقتارمەن قامتىلعان ورتالىق اشىلعان ەدى.
- ءوڭىر تۇرعىندارى اتىنان قايىرىمدىلىق پەن الەۋمەتتىك ماڭىزى بار شارالاردى جۇيەلى تۇردە جۇزەگە اسىرىپ, ازاماتتىق بەلسەندى ۇستانىم ارقىلى قازاقستاندىقتاردىڭ بويىندا شىنايى پاتريوتتىق سەزىم قالىپتاستىرۋدا بۇل قوردىڭ ەڭبەگى وتە زور. بولات وتەمۇراتوۆ اتىنداعى قايىرىمدىلىق قور ەلىمىزدە بىرقاتار الەۋمەتتىك جوبالاردى جۇزەگە اسىردى. سونىڭ ىشىندە اۋتيزم دەرتىنە شالدىققان بالالارعا پسيحولوگيالىق جانە مەديتسينالىق جاردەم كورسەتىپ ءجۇر, - دەدى ءوڭىر باسشىسى التاي كولگىنوۆ. قور ديرەكتورى مارات ايماعامبەتوۆكە ارنايى سىيلىقتى اقىن اقۇشتاپ باقتىگەرەەۆا تابىس ەتتى.
فورۋمعا قاتىسۋشىلار تۋعان ولكەسىن دامىتۋعا بەلسەنە كىرىسكەن جانداردىڭ قاتارى كوبەيىپ كەلە جاتقانىن ايتادى. جىل باسىنان بەرى باتىس قازاقستان وبلىسىندا مەتسەناتتاردىڭ كۇشىمەن 60 الەۋمەتتىك نىسان پايدالانۋعا بەرىلگەن ەكەن. اسىرەسە سپورت, دەنساۋلىق, ءبىلىم سالالارىنا كوڭىل ءبولىنىپ, ەلدىمەكەندەردە سپورت كەشەنى, بالالاردىڭ ويىن الاڭدارى اشىلىپ, مەكتەپتەردە ارنايى كابينەتتەر مەن ماتەريالدىق-تەحنيكالىق بازالارى جاڭارتىلدى.
فورۋمدا ءوڭىردىڭ, اۋىل ايماقتىڭ دامۋىنا زور ۇلەس قوسىپ جۇرگەن مەتسەنانتتارعا «جومارت جۇرەك» سىيلىعى مەن العىس حاتتارى تابىس ەتىلدى. ماراپاتتالعانداردىڭ قاتارىندا باتىسقازاقستاندىق بەلگىلى كاسىپكەرلەر روبەرت يرمەنوۆ, ۆالەنتينا ميحنو, سەرىك مەرعاليەۆ, ۆالەري ءجۇنىسوۆ, ۆالەري گولوۋحوۆ, جاسلان جاقىپوۆ, اعايىندى سەراليەۆتەر سەكىلدى جومارت جۇرەك جاندار بار.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان
