جەرلەستەرى ۇيىمداستىرعان ەسكە الۋ شارالارى اياسىندا رۋدنىي قالاسىنداعى ول وقىعان بۇرىنعى مەكتەپ, قازىرگى مۋزىكا كوللەدجى عيماراتىنىڭ قابىرعاسىنا ەسكەرتكىش تاقتا ءىلىندى. ونىڭ اشىلۋىنا وبلىس جانە رۋدنىي قالاسى باسشىلىعىنىڭ وكىلدەرى, زامانداس دوستارى قاتىستى.
– قازاقستان رەسپۋبليكاسى پرەزيدەنتىنىڭ اكىمشىلىگىندە جاۋاپتى قىزمەتتەر اتقارىپ, پارلامەنت ماجىلىسىنە دەپۋتات, ەكى مارتە توراعا بولىپ سايلانۋى ورەكەڭە ارتىلعان زور سەنىم مەن جاۋاپكەرشىلىكتىڭ جەڭىل بولماعانىن اڭعارتادى. كوزى ءتىرى بولسا ول بۇگىن 70 جاسقا تولار ەدى. «جاقسىنىڭ اتى ولمەيدى, عالىمنىڭ حاتى ولمەيدى» دەگەندەي, رۋدنىي قالاسىندا ىلىنگەن ەسكەرتكىش تاقتا ورال بايعونىس ۇلىنىڭ ەلى ءۇشىن جاساعان ەڭبەگىن ۇمىتتىرمايدى, – دەدى قوستاناي وبلىستىق ءماسليحاتىنىڭ حاتشىسى سايلاۋبەك ەسجانوۆ.
ورال مۇحامەدجانوۆ جاس تاۋەلسىز ەلدىڭ زاڭنامالىق بازاسىن نىعايتۋعا ەڭبەك ءسىڭىردى. ەلباسىنىڭ سەنىمدى سەرىكتەرىنىڭ ءبىرى بولدى. ءوزىنىڭ ءبىلىمى مەن قاجىر-قايراتىن قازاقستاننىڭ گۇلدەنۋىنە جۇمسادى. ول دەپۋتات رەتىندە قوستانايعا كەلگەن ساپارى سايىن تۋعان جەردەگى ءبىلىم وردالارىنا بارىپ, ستۋدەنت جاستارمەن كەزدەسۋگە, ولاردى بولاشاق بىلىكتى مامان بولۋى ءۇشىن باعىتتاۋعا, پىكىرلەسۋگە ۋاقىت تابا بىلەتىن.
ادەتتە, و.مۇحامەدجانوۆتى ەسكە العاندا تەكتى اۋلەتتىڭ تۇياعى ەكەنى تۋرالى اڭگىمە قوزعالادى. بۇل شارادا دا جەرلەستەرى ونىڭ بويىنداعى ونەرگە جاقىندىق اتالارىنان كەلگەن دارىن ەكەنىن ايتتى.
– ورال اعانىڭ اتاسى مۇحامەدجان وتەلباي ۇلى ارقاداعى انشىلىك مەكتەبىنىڭ ءىرى وكىلى بولعان. جاسىندا ترويتسك, بوقىراۋ, قاراوتكەل, اتباسار جارمەڭكەلەرىندە ءان سالىپ, ونەر جارىستىرعان. ونىڭ ءوزى شىعارعان سەگىز ءانى تاليعا بەكحوجينانىڭ «قازاقتىڭ 200 ءانى» جيناعىندا جارىق كورگەن. ال اكەسى بايعونىس اتامىز قوستاناي-تورعاي وڭىرىنە تانىمال ءانشى ەدى. ورال اعا نوۆوسىبىردە وقىپ جۇرگەندە كلاسسيكالىق اندەر مەن وپەرالىق اريالاردى ورىنداپ, انشىلىگىمەن تانىلعان, – دەدى مۋزىكا زەرتتەۋشىسى گۇلنار الپەيىسوۆا.
– تاۋەلسىز قازاقستاننىڭ قۇقىقتىق-زاڭنامالىق ىرگەتاسىنىڭ نىعايۋىنا ايتارلىقتاي ۇلەس قوسقان ورال مۇحامەدجانوۆتىڭ ءومىرى مەن قىزمەتى جاستارعا ۇلگى. جاس ۇرپاق تۋعان ەلدىڭ جاقسىلارىن ۇمىتپاۋى كەرەك, سوندىقتان بۇگىنگى ەسكەرتكىش تاقتانىڭ اشىلۋى وسى عيماراتتا ءبىلىم الىپ جاتقان جاستار جانە قالالىقتار ءۇشىن ماڭىزدى وقيعا سانالادى, – دەدى رۋدنىي قالاسى اكىمىنىڭ ورىنباسارى ەلەنا سكارەدينا. ەڭبەك ارداگەرى جۇماعالي قاسىموۆ ورال بايعونىس ۇلىنىڭ دوستىققا ادال, ادامگەرشىلىگى تۋرالى اڭگىمەلەدى.
ورال بايعونىس ۇلىنىڭ جارى شولپان مەن قىزى زۋحرا ەسكەرتكىش تاقتانىڭ اشىلۋىنا قاتىسىپ, وتباسى اتىنان جەرلەستەرىنە ريزالىعىن ءبىلدىردى.
ءنازيرا جارىمبەت,
«ەگەمەن قازاقستان»
قوستاناي وبلىسى, رۋدنىي قالاسى
