اتلەتتەر 5 كۇن بويى باق سىناستى. سايىس سپورتتىڭ 7 ءتۇرىن قامتىدى. اتاپ ايتساق, وق اتۋ, ءجۇزۋ (50 م), قاشىقتىققا گراناتا لاقتىرۋ, كۇشتىك گيمناستيكا, ۇزىندىققا سەكىرۋ, سپرينت (100 م), توزىمدىلىككە جۇگىرۋ (1000 م).
جارىس قورىتىندىسى بويىنشا ارميالىق سپورتشى ءانۋار قوزىباەۆ ءابسوليۋتتى چەمپيون اتاندى. ونىڭ قورجىنىندا 4 التىن, 2 كۇمىس جانە 1 قولا مەدال بار. 2 التىن جانە 1 كۇمىس مەدالدى ەنشىلەگەن قاتارداعى جاۋىنگەر اعىباي نىعمەتوۆ چەمپيوناتتا ەكىنشى ورىندى يەلەندى.
ال وسى كەزدە بۇقارالىق سپورتتىق جۇمىستى ۇيىمداستىرۋ جانە گارنيزونداردا سپورت سەكتسيالارىن دامىتۋ باعدارلاماسى اياسىندا سارىوزەك گارنيزونى سپورت كەشەنىنىڭ بازاسىندا اسكەريلەردىڭ بالالارى اراسىندا قازاق كۇرەسىنەن وتكەن تۋرنير قورىتىندىلاندى.
جالپى العاندا, سايىسقا 80-نەن اسا جاس بالۋان قاتىستى. سايىس جەڭىمپازدارى مەن جۇلدەگەرلەرى مەدالدارمەن, قۇرمەت گراموتالارىمەن ماراپاتتالدى.
– مۇنداي جارىستاردىڭ وتكىزىلۋى وسكەلەڭ ۇرپاقتىڭ سپورتپەن شۇعىلدانۋىنا جاقسى ۇلگى. ويتكەنى گارنيزونداردا بالالار سەكتسياسىن قۇرۋدىڭ باستى ماقساتى – بالالاردى ىرىكتەپ, اوسك رەزەرۆىن قالىپتاستىرۋ. ءدال وسى بالالار بولاشاقتا قارۋلى كۇشتەر قاتارىن تولىقتىرىپ, ارميالىق كلۋبتىڭ نامىسىن ۇلكەن دودالاردا قورعايتىن بولادى, – دەيدى اوسك سپورت كوميتەتىنىڭ توراعاسى پولكوۆنيك راسۋل مەيىرمانوۆ.
«ەگەمەن-اقپارات»
