قازىرگى تاڭدا اتقارىلىپ جاتقان شارۋالار اۋقىمدى. ماسەلەن, ماجىلىستە قارالىپ جاتقان جوبادا الەۋمەتتىك سالاعا 4,7 تريلليون تەڭگە بولىنبەك. بۇل ەل بيۋدجەتىنىڭ 42 پايىزىنا تەڭ.
تاۋەلسىزدىك العالى بەرى 1300-دەن استام دەنساۋلىق ساقتاۋ مەكەمەسى سالىندى. وسى شامادا ءبىلىم وردالارى اشىلدى. زەينەتاقى ءوسىپ, الەۋمەتتىك قىزمەتتەردىڭ قۇنى ارزاندادى. الايدا ءالى كۇنگە شەشىلمەگەن تۇيتكىلدەر بار. ماسەلەن, ءبىلىم بەرۋ سالاسىندا مەكتەپتەردەگى ءۇش اۋىسىمدىق وقۋ, وقۋ عيماراتتارىنىڭ ساپاسى – نازار اۋدارارلىق نارسە. دەنساۋلىق ساقتاۋ, ءبىلىم بەرۋ سالالارىنداعى جۇمىسشىلار جالاقىسىنىڭ ازدىعى سەكىلدى ماسەلەلەر دە جەتەرلىك.
جولداۋدا ايتىلعانداي, دەنساۋلىق, ءبىلىم جانە عىلىم سالالارىنا بولىنەتىن قارجىنى ىشكى جالپى ءونىمنىڭ 10 پايىزىنا دەيىن ۇلعايتۋ حالىقتىڭ تۇرمىسىن جاقسارتىپ, بالالاردىڭ قاجەتتى ءبىلىم الۋىن قامتاماسىز ەتىپ, مەديتسينالىق قىزمەتتەر مەن ەمدەلۋدى جەڭىلدەتەدى. سونداي-اق مۇنداي قادام قازاقستاندى حالىقارالىق ستاندارتتارعا جاقىنداتىپ, دامىعان 30 ەلدىڭ قاتارىنا ەنۋگە مۇمكىندىك بەرەدى.
اۋىل شارۋاشىلىعىنا ارنالعان بولىگى دە ءتيىمدى جۇزەگە اسادى دەپ ەسەپتەيمىن. ويتكەنى اتالعان جوبالارعا ناقتى قاراجات بولىنگەن.
شاۆحات وتەمىسوۆ,
پارلامەنت ءماجىلىسىنىڭ دەپۋتاتى
