24 تامىزدا ءا.قاستەەۆ اتىنداعى مەملەكەتتىك ونەر مۇراجايىنىڭ فيليالى – ورتالىق كورمە زالىندا سول ەسكيزدەر مەن ماكەتتەردىڭ كورمەسى ۇيىمداستىرىلدى. ءمۇسىن ەسكيزدەرى مەن ماكەتتەرىنىڭ باسىم كوپشىلىگى الماتى, استانا جانە وسكەمەن قالالارىنان قاتىستى.
سونىمەن بايقاۋدىڭ باس جۇلدەسىن الماتىدان قاتىسقان ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ تۇلەكتەرى مۇسىنشىلەر دۋلات ۇسەنباەۆ, ايدوس بۇركىتباەۆ, قانات بەگۋليەۆ, ءالىمجان توقباەۆتار شىعارماشىلىق كۆارتەتى جەڭىپ الدى. بۇل جىگىتتەردىڭ جۇمىسى «بولاشاققا كوزقاراس» دەپ اتالادى.
جەڭىسكە جەتكەن جىگىتتەردىڭ بىرلەسىپ ەڭبەك ەتكەنىنە بىرنەشە جىل عانا بولعان جانە بۇعان دەيىن الماتى قالاسىندا 31 مامىردا اشارشىلىق قۇرباندارىنا قويىلعان ەسكەرتكىشتىڭ بايقاۋىندا باس جۇلدەگە يە بولعان. قازىر ول ەسكەرتكىش تە قابانباي باتىر مەن ناۋرىزباي باتىر كوشەلەرىنىڭ قيىلىسىنداعى قاراعايلى باقتا تۇر. سول سياقتى تاڭداۋدان وتكەن تاعى بىرنەشە تۋىندىلارى الماتى, تالدىقورعان, جاڭاوزەن قالالارىندا تۇر.
بىرىككەن ءتورت تالانت مودەرن ستيلىندە ورىندالعان مۇسىنگە ءار قىرىنان كەلگەن. ماسەلەن, دۋلات ۇسەنباەۆ كەسكىندەمەشى بولسا, قالعاندارى سكۋلپتۋرا, ينتەرەرلىك ديزاينەرلىك تۇرعىدا مۇسىنگە ءوز قولتاڭبالارىن كىرىكتىرگەن.
– بۇل بايقاۋ بىزگە شابىت پەن ماتەريالدىق يگىلىك الىپ كەلەدى. بىزگە بايقاۋدىڭ ۇيىمداستىرىلۋ دەڭگەيى ۇنادى. جارتى جىل بۇرىن جاريالاندى. باسەكە بارىسىندا ونىڭ بۇكىل جاي-جاپسارى حابارلانىپ تۇردى. اتاقتى جانە مىقتى مۇسىنشىلەرمەن قاتار باق سىنادىق. بارلىق جۇمىستار مەن ولاردىڭ تۇجىرىمدامالارىن كورىپ وتىردىق, – دەيدى كەسكىندەمەشى دۋلات ۇسەنباەۆ.
سونىمەن Polpharma توبى باقىلاۋ كەڭەسىنىڭ حاتشىسى, «Starak Family Foundation» قورىنىڭ پرەزيدەنتى ەلجبەتا دجيكوۆسكا «بولاشاققا كوزقاراس» ءمۇسىنى قازاقستان پرەزيدەنتى جانىنداعى شەتەلدىك ينۆەستورلار كەڭەسىنىڭ وتىرىسى كەزىندە 2019 جىلدىڭ ماۋسىمىندا شىمكەنتتەگى SANTO كومپانياسىنىڭ زاۋىتىنا قويىلىپ, سالتاناتتى تۇردە اشىلادى دەدى.
بۇل تۋىندىنىڭ ايتار ويى تومەندەگىدەي: ادامنىڭ باسى – عىلىمي-تەحنيكالىق ورلەۋ مەن ونەردىڭ قوزعالتقىشى. ول بولاشاققا كوز سالادى, بارلىق جاڭانى قابىلداۋعا دايىن.
ايناش ەسالي,
«ەگەمەن قازاقستان»
الماتى
