الدىمەن قىركۇيەكتىڭ سوڭعى ونكۇندىگىندە ماڭعىستاۋ وبلىسىندا ورنالاسقان «ويماشا» پوليگونىندا «باتىس-2018» ءىرى اۋقىمدى ستراتەگيالىق كوماندالىق-شتابتىق وقۋ-جاتتىعۋلارى ءوتتى. وقۋ-جاتتىعۋ بارىسىندا اسكەرلەردىڭ بىرىككەن توپتاماسى ءشول دالادا شارتتى قارسىلاستى قورشاپ, ەل ىشىنە ەنۋىنە توسقاۋىل بولىپ, شابۋىلداۋ ارقىلى «جويىپ جىبەردى».
قارۋلى كۇشتەردىڭ قۇرامالارى مەن اسكەري بولىمدەرىنىڭ «باتىس-2018» ستراتەگيالىق كوماندالىق-شتابتىق وقۋ-جاتتىعۋىنا قارۋلى كۇشتەردىڭ باس شتابىنىڭ باستىعى, گەنەرال-لەيتەنانت مۇرات مايكەەۆ جەتەكشىلىك ەتتى.
وقۋ-جاتتىعۋدىڭ ءبىرىنشى كەزەڭى بارىسىندا «وڭتۇستىك», «شىعىس» وڭىرلىك قولباسشىلىقتارى مەن دەسانتتىق-شابۋىلداۋ اسكەرلەرىنىڭ قۇرامالارى, اسكەري بولىمدەرى بىرنەشە مىڭداعان شاقىرىمعا جاياۋ مارش جاساپ, شتاتتىق قارۋ-جاراعى جانە اسكەري تەحنيكاسىمەن قۇرامداستىرىلعان تاسىلمەن ماڭعىستاۋ وبلىسىنا الماستىرىلدى. بۇدان سوڭ قىسقا مەرزىم ىشىندە اۋماقتىق اسكەر بولىمشەلەرىنىڭ جاۋىنگەرلىك ۇيلەسۋى جۇرگىزىلىپ, وڭىردەگى ماڭىزدى نىساندار, ونىڭ ىشىندە, داعدارىس اۋدانىندا اسكەرلەردى ءتۇسىرۋ ستانسالارى كۇزەتكە الىندى. سونىمەن قاتار «باتىس» وڭىرلىك قولباسشىلىعى باسشىسىنىڭ جەتەكشىلىگىمەن وڭىردەگى تۇراقتى جاعدايدى قالپىنا كەلتىرۋى ءتيىس اسكەرلەردىڭ تۇرارالىق توپتاماسى قۇرىلدى.
ستراتەگيالىق ماڭىزدى وقۋ-جاتتىعۋدىڭ ەكىنشى كەزەڭىندە ەلىمىزدەگى زاڭسىز قارۋلى قۇرىلىمداردىڭ ءىس-ارەكەتتەرى ۇلگى بويىنشا جوسپارلانىپ, ولارعا قارسى ارنايى وپەراتسيالار جۇرگىزىلدى. قارۋلى كۇشتەردىڭ ارنايى وپەراتسيالار كۇشتەرىنىڭ بولىمشەلەرى ءوتۋى قيىن جانە تاڭسىق جەردە تاسالانىپ, شاعىن توپتارمەن الماسا, بۇركەمەلەنە وتىرىپ, بارلانعان مالىمەتتەردى ونلاين رەجىمدە باسقارۋ پۋنكتتەرىنە جىبەرىپ وتىردى. ىزدەستىرۋ ناتيجەلەرى بويىنشا اۆياتسيا مەن ارتيللەريانىڭ اتىسىن قولدانۋ تۋرالى شەشىم قابىلداندى. مۇنىڭ بارلىعى قازىرگى زامانعى قارۋلى قاقتىعىستار تاجىريبەسىن ەسكەرە وتىرىپ, بارىنشا شىنايى تۇردە جۇرگىزىلدى.
«باتىس-2018» وقۋ-جاتتىعۋى شەڭبەرىندە تىلدىق جانە تەحنيكالىق قامتاماسىز ەتۋدىڭ كۇشتەرى مەن قۇرالدارىنىڭ ءىرى توپتاماسى قولدانىلدى. وقۋ-جاتتىعۋدىڭ بارلىق كەزەڭى ماتەريالدىق-تەحنيكالىق جابدىقتارمەن قامتاماسىز ەتىلدى. كومەندانتتىق قىزمەتتى اسكەري پوليتسيا ۇيىمداستىرىپ, ال وڭىردەگى اسا ماڭىزدى نىسانداردى ماڭعىستاۋ وبلىسىنىڭ اۋماقتىق قورعانىس بريگاداسى كۇزەتتى. جاتتىعۋدىڭ شەشۋشى كەزەڭىندە بريگادالىق-تاكتيكالىق توپ قورعانىس پوزيتسيالارىنا ورنىعىپ, ەل شەتىنە زاڭسىز ەنگەن قارۋلى قۇرىلىمداردى قورشاۋعا الىپ, سودان سوڭ اۋە, ارتيللەريا جانە جالپىاسكەري بولىمشەلەر اتىس پەن شابۋىلعا كوشە وتىرىپ, شارتتى قارسىلاستىڭ كوزىن جويىپ جىبەردى.
وسىلايشا, «باتىس-2018» ستراتەگيالىق كوماندالىق-شتابتىق وقۋ-جاتتىعۋىنا قۇرلىق اسكەرلەرى, اۋە قورعانىسى كۇشتەرى, اسكەري-تەڭىز كۇشتەرى, ارنايى وپەراتسيالار كۇشتەرى, ارنايى اسكەرلەر جانە ماتەريالدىق-تەحنيكالىق قامتاماسىز ەتۋ بولىمدەرى مەن بولىمشەلەرىنىڭ شتاتتىق قارۋ-جاراعى جانە اسكەري تەحنيكامەن 5000-نان اسا اسكەري قىزمەتشى جۇمىلدىرىلدى. ال وقۋ-جاتتىعۋدىڭ ارنايى تاپسىرمالارىن ۇلتتىق ۇلان مەن ىشكى ىستەر مينيسترلىگى, توتەنشە جاعدايلار كوميتەتىنىڭ بولىمشەلەرى ورىندادى.
قورعانىس مينيسترلىگى باسشىلارىنىڭ باعا بەرۋى بويىنشا وقۋ-جاتتىعۋ ءساتتى وتكىزىلدى. اسكەرلەر ءشول دالا جاعدايىندا باتىس وڭىرىندە جاۋىنگەرلىك ءىس-قيمىلداردى جۇرگىزۋ تاجىريبەسىن جيناقتاپ, دالالىق داعدىعا جوعارى دارەجەدە ماشىقتانىپ, قويىلعان مىندەتتى ابىرويمەن اتقارىپ شىقتى.
ۆەنەرا تۇگەلباي,
«ەگەمەن قازاقستان»
