ەنەرگەتيكا ۆيتسە-ءمينيسترى بولات اقشولاقوۆتىڭ ايتۋىنشا, ساۋالداماعا قاتىسقان كاسىپورىنداردى تسيفرلى جۇيەگە كوشىرۋدە مينيسترلىكتىڭ كومەگىنە مۇقتاج ەكەنى بەلگىلى بولدى. مينيسترلىك «تسيفرلى قازاقستان» باعدارلاماسى بويىنشا ۇزىن سانى 15 ءىرى جوبا ۇسىنعان. ونى جۇزەگە اسىرۋعا قاجەتتى قاراجات جوبانىڭ باستى ورىنداۋشىلارى سانالاتىن ۇلتتىق كومپانيالار ەسەبىنەن ءبولىنىپ, تسيفرلى جۇيەنىڭ ەنگىزىلۋىنەن ەكونوميكاعا 143 ملرد تەڭگە كولەمىندە قوسىمشا قارجى تۇسەدى دەپ جوسپارلانعان.
2017-2022 جىلدارعا ارنالعان «ينتەللەكتۋالدى كەن ورنى» اقپاراتتىق جۇيەسى اياسىندا «قازمۇنايگاز» ۇلتتىق كومپانياسى تسيفرلى جۇيەگە كوشۋگە 25 ملرد تەڭگە جۇمساپ, ونىڭ قايتارىمى 56 ملرد تەڭگەنى قۇراماق. جوبالاردىڭ تىكەلەي ەكونوميكالىق اسەرىن ساناماعاندا, مينيسترلىك وسى ارقىلى مۇناي سالاسىنداعى كولەڭكەلى ساۋدانىڭ دا الدىن الماق.
«قازترانسويل» كومپانياسى مۇناي تاسىمالىندا «اقىلدى» تەحنولوگيالاردىڭ كومەگىمەن سالاداعى وپەراتسيالىق شىعىنداردى ەسەلەپ ازايتۋدى كوزدەپ وتىر. سول سياقتى, «قازمۇنايگاز»-دىڭ جانارماي قۇيۋ بەكەتتەرى استانا قالاسىندا «smart-بەكەت» قىزمەتىن ەنگىزىپ جاتىر.
– بۇل قاراپايىم تۇتىنۋشىلارعا ارزان جانە ساپالى جانارمايدى بارىنشا وڭاي ءارى قاۋىپسىز جەتكىزۋدىڭ ءتيىمدى ءتاسىلى,– دەيدى بولات اقشولاقوۆ.
سونىمەن قاتار ۆيتسە-مينيستر ءوز سوزىندە الداعى ۋاقىتتا ەلدەگى ءۇش ءىرى مۇناي وڭدەۋ زاۋىتتارىنىڭ دا تسيفرلى جۇيەمەن جۇمىس ىستەي باستايتىنىن ايتتى. بۇل باستامانىڭ اياسىندا مۇناي وڭدەۋ زاۋىتتارى بۇرىنعىداي جىل سايىن ءبىر اي بويى جوندەۋدى كۇتىپ تۇرماي, ءۇش جىلدا ءبىر-اق رەت قىسقامەرزىمدى جوسپارلى جوندەۋدەن وتەتىن بولدى. وسى باستامالاردىڭ ارقاسىندا ەلدەگى جانارماي تاپشىلىعى دا جويىلىپ, باعانىڭ ارزانداپ قالۋى عاجاپ ەمەس.
بۇدان بولەك, قورشاعان ورتانى قورعاۋ جۇمىستارىنىڭ تيىمدىلىگىن ارتتىرۋ ءۇشىن مينيسترلىك تسيفرلى جۇيەگە ينۆەستيتسيا قۇيىلاتىنى تۋرالى قۇلاعدار ەتتى.
شىناربەك جومارت ۇلى,
جۋرناليست
