«2019–2021 جىلدارعا ارنالعان رەسپۋبليكالىق بيۋدجەت تۋرالى» زاڭ جوباسى قر-نىڭ 2019–2023 جىلدارعا ارنالعان بيۋدجەت پارامەترلەرى مەن الەۋمەتتىك-ەكونوميكالىق دامۋ بولجامىنىڭ جانە قر پرەزيدەنتىنىڭ قازاقستان حالقىنا جىل سايىنعى جولداۋلارى نەگىزىندە ازىرلەنگەن.
ۇلتتىق ەكونوميكا ءمينيسترى ت. سۇلەيمەنوۆ حالىقارالىق ۆاليۋتا قورىنىڭ بولجامدارىنا سايكەس 2018–2019 جىلدارى الەمدىك ەكونوميكا 3,9% دەڭگەيىندە بىرتىندەپ وسەدى دەپ كۇتىلەتىنىن اتاپ ءوتتى. 2019 جىلى الەمدىك قارجى ۇيىمدارىنىڭ مۇناي باعاسىنىڭ ءباتۋا-بولجامى باررەلىنە $66,7 قۇرايدى. بۇنى ەسكەرگەندە نەگىزگى ستسەناري كەزىندە مۇناي باعاسى $60 دەڭگەيىندە انىقتالعان.
ء«جىو ناقتى ءوسىمى 2019 جىلى 3,9% دەڭگەيىندە, 2023 جىلى 4,6 % دەيىن وسەدى دەپ بولجانعان. ءجىو-ءنىڭ ورتاشا جىلدىق ءوسىم قارقىنى 4,2% قۇرايدى. اتاۋلى ءجىو 2019 جىلى 64 145,7 ملرد تەڭگەدەن 2023 جىلى 86 944,7 ملرد تەڭگەگە دەيىن وسەدى. جان باسىنا شاققاندا ءجىو 2019 جىلى $9,9 مىڭدى قۇرايدى, 2023 جىلى $12,9 مىڭ دەيىن وسەدى», — دەدى ت. سۇلەيمەنوۆ.
ورتاشا مەرزىمدى پەرسپەكتيۆادا ەكونوميكالىق بەلسەندىلىك ءوسىمىنىڭ نەگىزگى قوزعاۋشى كۇشى وڭدەۋ جانە اوك سالالارى, قۇرىلىس يندۋسترياسى, كولىك-لوگيستيكا سالاسى جانە سەرۆيستىك ەكونوميكا بولماق. وڭدەۋ ونەركاسىبى 4,4 %-عا, تاۋ-كەن ءوندىرۋ ونەركاسىبى 3%-عا وسەدى. اۋىل شارۋاشىلىعىندا — 6,4 %, قۇرىلىس سالاسىندا — 4,2 % جانە ساۋدا-ساتتىقتا — 4,6 % دەڭگەيىندە تۇراقتى قارقىن ساقتالادى. 2019 جىلى ەكسپورت كولەمى $56,5 ملرد قۇرايدى, 2023 جىلى $68,5 ملرد-قا دەيىن وسەدى.
ۇلتتىق ەكونوميكا ءمينيسترىنىڭ ايتۋىنشا, قاشاعان كەن ورنىندا مۇناي ءوندىرۋ كولەمىن ۇلعايتۋ مەن تەڭىزشەۆرويلدى بولاشاقتا كەڭەيتۋ جوباسى ەسەبىنەن مۇناي ءوندىرۋ كولەمى 2019 جىلى 88 ملن توننادان 2023 جىلى 99 ملن تونناعا دەيىن ۇلعايادى.
بۇدان وزگە, ماكروەكونوميكالىق بولجام نەگىزىندە 2019–2021 جىلدارعا ارنالعان بيۋدجەتتىك پارامەترلەر بولجامى ازىرلەنگەن. 2019 جىلى رەسپۋبليكالىق بيۋدجەت كىرىستەرى (ترانسفەرتتەرسىز) 6809,7 ملرد تەڭگە كولەمىندە, 2020 جىلى — 7382 ملرد تەڭگە, 2021 جىلى — 8024,7 ملرد تەڭگە كولەمىندە بولجامدالعان. 2019 جىلى بيۋدجەت تاپشىلىعى 2018 جىلعى دەڭگەيدە – ءجىو-گە 1,5 % دەڭگەيىندە جوسپارلانعان, ونى 2020 جىلى ءجىو-گە 1,4 % دەيىن جانە 2021 جىلى ءجىو-گە 1,3% دەيىن قىسقارتۋ كوزدەلگەن.
قارجى ءمينيسترى ءا. سمايىلوۆ بيۋدجەت ءۇش نەگىزگى مىندەتتى شەشۋگە باعىتتالعانىن ايتتى. بۇل — كەز كەلگەن ەكونوميكالىق جاعدايات كەزىندە بارلىق الەۋمەتتىك مىندەتتەمەلەردى قامتاماسىز ەتۋ, ەلىمىزدى دامىتۋدىڭ 2025 جىلعا دەيىنگى ستراتەگيالىق جوسپارىن ىسكە اسىرۋ اياسىندا جەتى ساياسات پەن رەفورمالاردى ىسكە اسىرۋ, سونداي-اق, مەملەكەت باسشىسىنىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» جولداۋىن ورىنداۋ.
«بيۋدجەتتىڭ نەگىزى جانە ونىڭ قارجىلىق مۇمكىندىكتەرى بيۋدجەتتىڭ مۇناي كىرىستەرىنە تاۋەلدىلىگىن بىرتە-بىرتە تومەندەتۋ جانە سالىق تۇسىمدەرىنىڭ تۇراقتىلىعىن قامتاماسىز ەتۋ ارقىلى جۇزەگە اسىرىلاتىن ىنتالاندىرۋشى ماكروەكونوميكالىق ساياساتتى جۇرگىزۋگە نەگىزدەلگەن. ۇلتتىق قوردان كەپىلدەندىرىلگەن ترانسفەرت تۇرىندە جانە مۇنايعا ەكسپورتتىق كەدەندىك باج سالىعى تۇرىندە بيۋدجەتكە مۇناي تۇسىمدەرىنىڭ كولەمى 2019 جىلى 3,5 ترلن تەڭگەنى نەمەسە ءجىو-ءنىڭ 5,4% قۇرايدى, 2021 جىلعا قاراي 4,1%-عا دەيىن تومەندەيدى. بيۋدجەتكە مۇناي تۇسىمدەرىنىڭ ۇلەسى 2019 جىلى 35,5% -دان 2021 جىلى 28,9%-عا دەيىن تومەندەيدى», — دەپ مالىمدەدى ءا. سمايىلوۆ.
ونىڭ ايتۋىنشا, ۇلتتىق قور قاراجاتىن شەكتەۋلى پايدالانۋ, سونداي-اق وسى جىلدىڭ وزىندە مۇناي باعاسىنىڭ ءوسۋى قور اكتيۆتەرىن مەرزىمىنەن بۇرىن تۇراقتاندىرۋعا الىپ كەلەدى. مۇنايلى ەمەس تۇسىمدەردىڭ كولەمى بيىلعى جوسپارعا قاراعاندا 973,2 ملرد تەڭگەگە نەمەسە 18,3%-كە وسۋمەن, 2019 جىلعا 6,3 ترلن تەڭگە مولشەرىندە جوسپارلانىپ وتىر. وزگەرىستەردىڭ باستى فاكتورلارى جوبالاۋ ءوفيسىنىڭ جۇمىس ناتيجەسى رەتىندە بولجاناتىن ەكونوميكانىڭ دامۋ قارقىندارىنىڭ ۇلعايۋى, سالىقتىق اكىمشىلەندىرۋدى جاقسارتۋ جانە سالىقتاردىڭ جينالۋ تيىمدىلىگىن ارتتىرۋ بولدى.
رەسپۋبليكالىق بيۋدجەت جوباسى بيۋدجەت تاپشىلىعىن 2019 جىلى ءجىو-گە 1,5%-دان 2021 جىلى 1,3%-عا دەيىن تومەندەتۋ ەسەبىنەن بورىشتى قاۋىپسىز دەڭگەيدە ۇستاپ تۇرۋ مىندەتىن ىسكە اسىرۋدى قامتاماسىز ەتەدى. 2019 جىلى رەسپۋبليكالىق بيۋدجەت شىعىستارى وسى جىلدىڭ جوسپارىنان 11%-عا ءوسىپ, 10,7 ترلن تەڭگەنى قۇرايدى (2020 جىلى — 11,1 ترلن تەڭگە, 2021 جىلى — 11,4 ترلن تەڭگە).
«الەۋمەتتىك بلوكتىڭ شىعىستارى 2025 جىلعا دەيىنگى دامۋ ستراتەگياسىنىڭ جاڭا ادامي كاپيتالىن قۇرۋدىڭ جۇيەلى رەفورماسىنا تولىعىمەن بايلانىستى جانە ءۇش جىلدىق كەزەڭدە 15,7 ترلن تەڭگەنى قۇرايدى, ونىڭ ىشىندە 2019 جىلى – 4,8 ترلن تەڭگەنى نەمەسە شىعىستاردىڭ جالپى كولەمىنەن 45%-دى, ال 2021 جىلى بۇل كورسەتكىش 49,1%-دى قۇرايدى», — دەدى ءا. سمايىلوۆ.
قارجى ءمينيسترىنىڭ مالىمدەۋىنشە, پرەزيدەنتتىڭ جولداۋىن ىسكە اسىرۋ ءۇشىن الەۋمەتتىك بلوكتىڭ شىعىستارى 107 ملرد تەڭگەگە ۇلعايتىلدى, ول 2019 جىلدىڭ 1 قاڭتارىنان باستاپ ەڭ تومەنگى جالاقى مولشەرىن 42 500 تەڭگەگە دەيىن كوتەرۋمەن, ءۇش جىلدا مەكتەپتەردى سالۋ كولەمدەرىن 50 ملرد تەڭگەگە ۇلعايتۋمەن, سونداي-اق مەكتەپ پسيحولوگتارىنىڭ جۇمىسىن كۇشەيتۋ قاجەتتىلىگىمەن بايلانىستى.
«ەكونوميكانىڭ ناقتى سەكتورىن قولداۋعا جانە دامىتۋعا ارنالعان شىعىستار ەكونوميكا سالالارىنىڭ باسەكەگە قابىلەتتىلىگىن قامتاماسىز ەتۋ, تەحنولوگيالىق جاڭعىرتۋ, تسيفرلاندىرۋ ساياساتىن ىسكە اسىرۋمەن بايلانىستى جانە ورتا مەرزىمدە 4,6 ترلن تەڭگەنى قۇرايدى, ونىڭ ىشىندە 2019 جىلعا – 1,8 ترلن تەڭگە. مەملەكەت باسشىسىنىڭ تاپسىرمالارىن ىسكە اسىرۋ بارىسىندا وسى باعىت بويىنشا شىعىستار ءۇش جىل ىشىندە 600 ملرد تەڭگەدەن اسا سوماعا, ونىڭ ىشىندە 2019 جىلى 215 ملرد تەڭگەگە ۇلعايتىلدى», — دەدى ءا. سمايىلوۆ.
بۇدان وزگە, ءۇش جىل ىشىندە قوسىمشا 190,4 ملرد تەڭگەنى وڭدەۋ ونەركاسىبى مەن ەكسپورتتى دامىتۋعا ءبولۋ ۇسىنىلدى. بجك–2020 باعدارلاماسى اياسىندا شاعىن جانە ورتا بيزنەستى دامىتۋعا ءۇش جىلعا قوسىمشا 90 ملرد تەڭگە نەمەسە جىل سايىن 30 ملرد تەڭگە بولىنەدى. بۇل قاراجاتتاردى كاسىپكەرلەردى نەسيەلەۋ بويىنشا پايىزدىق مولشەرلەمەلەردى سۋبسيديالاۋعا پايدالانۋ ۇسىنىلىپ وتىر. اگروونەركاسىپتىك كەشەندى دامىتۋعا ءۇش جىل ىشىندە 300 ملرد تەڭگە نەمەسە جىل سايىن 100 ملرد تەڭگە بولىنبەك. ءۇش جىلدىق كەزەڭدە ارەندالىق تۇرعىن ءۇي شىعىنىن 30 ملرد تەڭگەگە نەمەسە جىل سايىن 10 ملرد تەڭگەگە ارتتىرۋ ۇسىنىلۋدا.
جالپى العاندا, مەملەكەت باسشىسىنىڭ جولداۋىن جانە «بەس الەۋمەتتىك باستامانى» ىسكە اسىرۋ ءۇشىن ءۇش جىلدىق كەزەڭگە ارنالعان رەسپۋبليكالىق بيۋدجەت جوباسىندا 2,4 ترلن تەڭگە قاراستىرىلعان, ونىڭ 817 ملرد تەڭگەسى 2019 جىلعا جوسپارلانعان.
ءوز كەزەگىندە, ۇلتتىق بانك توراعاسى د. اقىشەۆ اقشا-نەسيە جانە بيۋدجەت ساياساتىن ۇيلەستىرۋ ەكونوميكانىڭ تۇراقتى دامۋىنىڭ قاجەتتى شارتى ەكەنىن ايتتى. 2019–2021 جىلدارعا ارنالعان رەسپۋبليكالىق بيۋدجەتتەگى وزگەرىستەردىڭ پارامەترلەرى ۇكىمەت پەن ۇلتتىق بانكتىڭ ماكروەكونوميكالىق بولجامدارىنا نەگىزدەلىپ جاسالعان.
ۇلتتىق بانك ينفلياتسيالىق نىسانالاۋ ساياساتىن ءارى قاراي دا جۇرگىزە بەرەدى. ۇلتتىق بانكتىڭ 2019 جىلعا ارنالعان نەگىزگى ماقساتى ينفلياتسيانى 4–6% دالىزىندە ۇستاپ تۇرۋ. بۇل ءدالىز رەسپۋبليكالىق بيۋدجەتتىڭ نەگىزگى الەۋمەتتىك كورسەتكىشتەرىنىڭ يندەكستەۋ پارامەترلەرىن ەسەپتەۋ ءۇشىن پايدالانىلدى. ينفلياتسيالىق ۇدەرىستەردى رەتتەۋ ءۇشىن پايىزدىق مولشەرلەمەلەردىڭ اقشا-نەسيەلىك كانالى نەگىزگى قىزمەت اتقارادى. بۇل — نەگىزگى قۇرال رەتىندە مولشەرلەمە ءدالىزىن انىقتايتىن ۇلتتىق بانكتىڭ بازالىق مولشەرلەمەسى قالا بەرەدى دەگەن ءسوز. ۇلتتىق بانك ەلدەگى بەلگىلەنگەن جانە كۇتىلەتىن ينفلياتسيانىڭ مولشەرى, سونداي-اق سىرتقى فاكتورلارعا قاراپ مولشەرلەمەنى بەلگىلەيتىن بولادى.
«2018 جىلدىڭ توعىز ايىندا ينفلياتسيا 3,3% بولدى, 2018 جىلدىڭ قىركۇيەگىندە جىلدىق ينفلياتسيا دەڭگەيى 2017 جىلدىڭ سوڭىنداعى 7,1%-بەن سالىستىرعاندا 6,1%-عا دەيىن تومەندەدى. ينفلياتسيا تاۋەكەلىن تومەندەتۋ ءۇشىن 15 قازاندا بازالىق مولشەرلەمە 9%-دان 9,25%-عا دەيىن ءوستى», — دەدى د. اقىشەۆ.
كەلەر جىلى ۇلتتىق بانك قارجىلىق تۇراقتىلىقتى قامتاماسىز ەتۋ ءۇشىن جۇمىسىن جالعاستىرادى. 2019 جىلدىڭ 1 قاڭتارىنان باستاپ تاۋەكەلگە باعدارلانعان ءتاسىل ەنگىزىلىپ, ءتيىستى زاڭدار مەن قاجەتتى نورماتيۆتىك-قۇقىقتىق اكتىلەر قابىلدانادى. سونداي-اق, تاۋەكەلدەردى باسقارۋ جۇيەسىن كاپيتالداندىرۋ دەڭگەيىنە قويىلاتىن تالاپتار كۇشەيمەك. بانك سەكتورىن وڭالتۋ جانە ولاردى باقىلاۋ ءارى رەتتەۋ ءۇشىن ەنگىزىلەتىن جاڭا تاسىلدەر نەگىزگى بانكتەر ءۇشىن تاۋەكەلدى اناعۇرلىم تومەندەتەدى.
«ۇلتتىق بانك مەملەكەت باسشىسىنىڭ قازاقستان حالقىنا جولداۋىندا, اسىرەسە نەگىزگى سەكتورلارعا نەسيە بەرۋ تاپسىرماسىن ورىنداۋعا باستى باسىمدىقتى بەرىپ وتىر. “7–20–25” باعدارلاماسى ءارى قاراي جۇزەگە اسىرىلادى. ءبىزدىڭ باعالاۋىمىز بويىنشا 2019 جىلى بانكتىك نەسيەلەردىڭ كولەمى 10%-عا ارتادى. ۇلتتىق بانك تۇراقتى ەكونوميكالىق ءوسۋدى قامتاماسىز ەتۋ جانە حالقىمىزدىڭ ءال-اۋقاتىن ارتتىرۋ ءۇشىن قارجى نارىعىنداعى تۇراقتىلىق پەن باعا تۇراقتىلىعىن قامتاماسىز ەتۋ ءۇشىن بار شارالاردى قولدانادى», — دەدى ۇلتتىق بانك توراعاسى.
قر پرەمەر-ءمينيسترى باقىتجان ساعىنتاەۆ پارلامەنت ءماجىلىسى دەپۋتاتتارىنىڭ ساۋالدارىنا جاۋاپ بەرە وتىرىپ, ەكونوميكانىڭ ماقساتتى ءوسۋىن قامتاماسىز ەتۋ ءۇشىن جوبالىق باسقارۋ جۇيەسىندە ءار سالا بويىنشا ينديكاتور قويىلعان 12 باعىت, ياعني 8 سالالىق جانە 4 وتپەلى باعىت انىقتالعانىن ايتتى. جوبالىق كەڭسە مينيسترلىكتەر مەن اكىمدىكتەردە دە قۇرىلعان.
ب. ساعىنتاەۆ مەملەكەت باسشىسىنىڭ جولداۋىندا قاراپايىم زاتتار ەكونوميكاسى مەن الەۋمەتتىك ەكونوميكانى, ياعني دەنساۋلىق ساقتاۋ, ءبىلىم بەرۋ جانە قىزمەت كورسەتۋ سالالارىن دامىتۋ تۋرالى تاپسىرما بەرگەنىن ەسكە سالدى. وسىلايشا, پرەزيدەنت ۇلتتىق بانككە ەكونوميكانى نەسيەلەندىرۋدى باستاۋ ءۇشىن 600 ملرد تەڭگە ءبولۋدى تاپسىرعان بولاتىن.
بۇگىنگى كۇنى ۇكىمەت قارجىگەرلەر قاۋىمداستىعىنىڭ قاتىسۋىمەن ۇلتتىق بانك پەن ەكىنشى دەڭگەيدەگى بانك وكىلدەرىمەن, «اتامەكەن» ۇكپ-مەن بولىنگەن قاراجاتتى ەكونوميكاعا تارتۋ مەحانيزمى تۋرالى كەلىسسوزدەر جۇرگىزدى. «نەگىزگى پارامەترلەر انىقتالدى: بۇل قاراجات مەرزىمدىلىك, تولەم جانە وتەۋ شارتتارىمەن بەرىلۋى ءتيىس. 600 ملرد تەڭگەنىڭ 300 ملرد تەڭگەسى ۇلتتىق بانكتەن, قالعان 300 ملرد تەڭگەسى بىرىڭعاي زەينەتاقى جيناقتاۋ قورىنان بولماق. نەگىزگى مولشەرلەمە 11% دەڭگەيىندە بەلگىلەنەدى (ياعني, بزجق-نىڭ قاراجاتى نارىقتىق مولشەرلەمەمەن بولىنەدى), ال قوسىمشا 4% — ەكىنشى دەڭگەيلى بانكتەردىڭ پايىزى, سەبەبى نەگىزگى تاۋەكەلدى بانكتەر كوتەرەدى. بارلىعى 15% بولادى. بۇل نارىق ءۇشىن دە, بيزنەس ءۇشىن دە اۋىر.
وسىعان بايلانىستى «بيزنەستىڭ جول كارتاسى» اياسىندا مەملەكەت 7 پايىزدىق مولشەرلەمەنى سۋبسيديالايدى, ياعني شاعىن جانە ورتا بيزنەس ءۇشىن 8 پايىز دەڭگەيىندە بولادى. «اتامەكەن» ۇكپ-مەن بىرگە ءتۇرلى سالالارداعى 4 مىڭنان استام جوبا ءتىزىمى جاسالدى. ەكىنشى دەڭگەيلى بانكتەر وزدەرىنىڭ جوبا بويىنشا ۇسىنىستارىن بەرۋدى اياقتاپ قالدى.
پرەمەر-مينيستر 600 ملرد تەڭگەنىڭ 300 ملرد تەڭگەسى وڭدەۋ ونەركاسىبىنە, 200 ملرد تەڭگە اگروونەركاسىپتىك كەشەن مەن وڭدەۋ ونەركاسىبىنە, 100 ملرد تەڭگە شاعىن جانە ورتا بيزنەستى قولداۋعا باعىتتالاتىنىن ايتتى. قازىرگى ۋاقىتتا باسىم باعىتتار انىقتالۋدا. وسى جىلدىڭ قاراشا ايىندا ءتيىستى قۇجاتتار دايىندالادى, جەلتوقسان ايىنىڭ باسىندا جوبالاردىڭ دايىندىعىنا بايلانىستى ەكىنشى دەڭگەيلى بانكتەر قارجىلاندىرۋعا كىرىسەدى. 2018 جىلى ۇلتتىق بانك 100 ميللياردتان استام تەڭگە بولگەن بولاتىن.
سونىمەن بىرگە, ەلباسى ەلىمىزگە قاجەتتى جوبالاردىڭ باسىمدىقتارىن قايتا قاراۋ مىندەتىن جۇكتەدى. وسى باعىتتا ۇكىمەت ەكونوميكا مەن حالىققا قاجەتتى نەگىزگى جوبالاردى انىقتايدى. ماسەلەن, قانت باعاسىنىڭ تۇراقتىلىعىن ساقتاۋ ءۇشىن — ەلىمىزدە زاماناۋي ءىرى قانت زاۋىتتارىن سالۋدى باستاۋ قاجەت. بۇل ىشكى قاجەتتىلىكتى قاۋىپسىز دەڭگەيدە قامتاماسىز ەتۋگە مۇمكىندىك بەرەدى.
الەۋمەتتىك ماڭىزى بار تاۋارلار مەن قىزمەتتەر باعاسىنىڭ تۇراقتىلىعىن ساقتاۋ جانە قامتاماسىز ەتۋ ماسەلەسى اپتا سايىن, سەيسەنبىدە, ۇكىمەت وتىرىستارىندا اكىمدىكتەرمەن پىسىقتالادى. الەۋمەتتىك ماڭىزى بار ونىمدەردىڭ ءار پوزيتسياسى باقىلاۋعا الىنعان. رەتتەلەتىن قىزمەتتەر تاريفتەرىنىڭ ينفلياتسياعا قوسار ۇلەسى تۋرالى ايتاتىن بولساق, بۇل كورسەتكىش 1,2% دەڭگەيىندە جوسپارلانعان. قازىرگى كەزدە بۇل ۇلەس 0,4% دەڭگەيىندە, ياعني تاريفتەر ينفلياتسيا وسىمىنە ايتارلىقتاي اسەر ەتىپ جاتقان جوق.
جيىن سوڭىندا پرەمەر-مينيستر دەپۋتاتتارعا ءۇش جىلدىق بيۋدجەت جوباسىنىڭ قابىلدانعانى ءۇشىن العىس ءبىلدىردى. باقىتجان ساعىنتاەۆ بيىل بيۋدجەتتىڭ ايرىقشا ماڭىزعا يە ەكەنىن اتاپ ءوتتى, سەبەبى مۇندا مەملەكەت باسشىسىنىڭ بيىلعى جولداۋىنداعى بارلىق تاپسىرمالارى قامتىلعان, جانە جوبا ولاردى جۇزەگە اسىرۋعا باعىتتالعان. وسىعان بايلانىستى ۇكىمەتتىڭ بۇگىن قابىلداپ, ماقۇلدانعان ءۇش جىلعا ارنالعان ءىس-قيمىل جوسپارى ەكى كەزەڭ بويىنشا ورىندالادى. ءبىرىنشى كەزەڭ — جىلدىڭ سوڭىنا دەيىن, ەكىنشىسى — 2019 جىلدان باستاپ ىسكە اسىرىلادى. بارلىق جۇمىستار ەلباسى تاپسىرمالارىن ورىنداۋعا باعىتتالادى. پرەمەر-مينيستر بارلىق تاپسىرمالار ورىندالاتىنىن جانە دەپۋتاتتاردىڭ ايتقان ۇسىنىستارى مەن ەسكەرتۋلەرى ۇكىمەتتىڭ الداعى جۇمىسىندا ەسكەرىلەتىنىن اتاپ ءوتتى.
بۇدان وزگە, پارلامەنت ءماجىلىسىنىڭ وتىرىسى بارىسىندا دەپۋتاتتار «قر ۇلتتىق قورىنان 2019–2021 جىلدارعا ارنالعان كەپىلدەندىرىلگەن ترانسفەرت تۋرالى» زاڭ جوباسىن ماقۇلدادى. وعان قوسا, «كينەماتوگرافيا تۋرالى» زاڭ جوبالارى مەن تۇزەتۋلەر تۋرالى ىلەسپە زاڭ ماقۇلداندى.
