ەۋروپا ەكولوگيا اگەنتتىگى اۋانىڭ لاستانۋى سالدارىنان جىل سايىن ەۋروپادا 500 000-عا تارتا ادام قايتىس بولاتىنىن ايتىپ دابىل قاعىپ وتىر. مۇنىڭ الدىن الۋ ماقساتىندا اتقارىلعان شارالار جەمىستى بولعانىنا قاراماستان, ناتيجە ەۋروپالىق جانە دۇنيەجۇزىلىك دەنساۋلىق ساقتاۋ ۇيىمىنىڭ ستاندارتىنان الدەقايدا تومەن. ەۋروپاداعى 41 مەملەكەتتە كوپ ادام وسى سەبەپتەن كوز جۇمعان ەكەن.
«لاستانعان اۋا كوزگە كورىنبەيتىن قىلمىسكەر سىندى. بىزگە مىندەتتى تۇردە بۇنىڭ الدىن الاتىن شارالاردى جۇزەگە اسىرۋ كەرەك», دەدى ەۋروپا ەكولوگيا اگەنتتىگىنىڭ باسشىسى حانس بريۋينكس.
ەۋروپالىق وداقتىڭ ساراپشىسى 28 مەملەكەت اۋانىڭ ساپاسىنا قاتىستى ناتيجەگە قول جەتكىزە الماعانىن ايتادى. وسىعان بايلانىستى وتىرىس بىرنەشە اپتادان سوڭ وتەدى دەپ جوسپارلانعان. ول سونداي-اق شىعىس ەۋروپا مەملەكەتتەرىندە دەنساۋلىعى سىر بەرگەن ادامدار سانى قىتاي مەن ۇندىستانداعى كورسەتكىشتەن اسىپ تۇسكەندىگىن اتاپ ءوتتى.
اۋاعا تارالعان بولشەكتەر قولعا ىلىنبەيتىن ۇساقتىعىنا قاراماستان, جۇرەك اۋرۋلارىنىڭ, دەمىكپە, وكپەنىڭ قاتەرلى ىسىگى سىندى اۋرۋلاردىڭ قوزدىرادى. اۋا ساپاسىنا قاتىستى جۇرگىزىلگەن زەرتتەۋ ناتيجەسىندە كولىكتەردەن جانە قازاندىقتاردان بولىنەتىن ۋىتتى ازوت ديوكسيدى 79 000 ادامنىڭ كوز جۇمۋىنىڭ نەگىزگى سەبەبى دەپ تانىلدى.
ەۋروپالىقتاردىڭ اۋا ساپاسىنا قاتىستى جۇرگىزگەن ساياساتى كولىك جاساۋدا, ءوندىرىس ورىندارىن قالىپتاستىرۋدا ەكولوگيالىق تازا ونىمدەر تۇتىنۋعا الىپ كەلدى.
الايدا, بولگاريا, پولشا مەن سلوۆاكيا سىندى شىعىس ەۋروپا مەملەكەتتەرىندە اۋا ساپاسىن جاقسارتۋ جۇمىسى ايتارلىقتاي ناتيجە بەرگەن جوق. حورۆاتيا, سەربيا, البانيا مەن بوسنيا ەلدەرى بۇل ماسەلەنى شەشۋدە كوزدەگەن ماقساتقا جەتكەن.
ەۋروپانىڭ وڭتۇستىگىندە ورنالاسقان ماكەدونيادا اتالعان مەملەكەتتەرمەن سالىستىرعاندا اۋانىڭ لاستانۋ كورسەتكىشى 3 ەسە جوعارى.
سالتانات شىءنادىل,
ەۇۋ ستۋدەنتى,
«ەگەمەن اكادەمياسى»
