جىلدان-جىلعا جالعاسىن تاۋىپ كەلە جاتقان ۇلتتىق سىيلىق قايىرىمدىلىق سالاسىنا ۇلەسىن قوسقان بارشا مەيىرباندارعا, ونىڭ ىشىندە جەكە تۇلعالارعا, ۇيىمدارعا جانە مەكەمەلەرگە العىس ايتۋدى ءوزىنىڭ مىندەتى سانايدى. بيىل 12 نوميناتسيا بويىنشا جۇلدەگەرلەردىڭ ەسىمى بەلگىلى بولدى. ماراپات يەگەرلەرى - كاسىپكەرلەر, ءىرى كومپانيالار, باق وكىلدەرى مەن قاراپايىم تۇرعىندار.
مىسالعا «مۇگەدەك جاندارعا كورسەتكەن قامقورلىعى ءۇشىن» نوميناتسياسىندا ALMAU-دىڭ الەۋمەتتىك كاسىپكەرلىك ورتالىعىنىڭ ديرەكتورى – نۇرجان ءالجانوۆا جەڭىمپاز اتاندى. بيزنەستىڭ قىر-سىرىن تانيتىن نۇرجان حانىم, ءبىلىم مەن مانساپتى دامىتۋ ارقىلى مۇمكىندىكتەرى شەكتەۋلى ادامدار اراسىندا الەۋمەتتىك تەڭسىزدىكتى ەڭسەرۋگە باعىتتالعان جۇمىستار جاسايدى.
«مەنىڭ ويىمشا, قايىرىمدىلىق دەگەن جاي عانا دايىن ماتەريالدىق كومەك ەمەس. مەن مۇمكىندىگى شەكتەۋلى ادامدارعا وزدەرىنىڭ بىلگەندەرىن جەتىلدىرىپ, جوبالارى بولسا, ولاردى جان-جاقتى دامىتۋعا قولعابىس ەتەمىن. بولاشاقتا ولار قوعامدا ءوز ورنىن تاۋىپ, تۇلعا رەتىندە قالىپتاسىپ جاتسا, ودان ارتىق نە كەرەك؟ قايىرىمدىلىقتىڭ نەگىزگى يدەياسى سوندا جاتىر», - دەپ ءبولىستى نۇرجان ءالجانوۆا.
سونداي-اق «قازاقستاننىڭ وركەندەۋىنە قوسقان ۇلەسى ءۇشىن» نوميناتسياسىندا ماسكەۋلىك ولگا باتۋتينا جانە يليا بايگابۋلوۆ, «جەتىم بالالارعا كورسەتكەن قامقورلىعى ءۇشىن» گۇلنار قابىلبەكوۆا, «دەنساۋلىق ساقتاۋ سالاسىنا كورسەتكەن قولداۋى ءۇشىن روزا ءالىمحانوۆا جانە ت.ب بار.
قايىرىمدىلىقتى اسىل قاسيەت دەپ تانيتىن «Baurzhan» قورى وكىلدەرىنىڭ ايتۋى بويىنشا, 5 اي ىشىندە «التىن جۇرەك» سىيلىعىنا 300-دەن استام ءوتىنىش كەلىپ تۇسكەن. ولاردىڭ ىشىنەن ءادىل-قازىلار القاسى تەك لايىقتى دەگەن جۇلدەگەردى تاڭداعان.
«التىن جۇرەك» - قايىرىمدىلىق جولىنداعى ەڭ بەدەلدى ماراپات. اراعا 12 جىل ۋاقىت سالسا دا «Baurzhan» قورىنىڭ ۇيىمداستىرۋىمەن وتەتىن بۇل جوبا بۇگىندە ەل نازارىندا.
«قازىرگى تاڭدا قوعامدا ادامدار اراسىندا جىلۋلىق مەن قامكورلىق سيرەكتەپ بارادى. وسى ماسەلەلەردى قاراستىرىپ, مۇمكىندىگى شەكتەۋلى ادامدارعا, قارت ادامدار مەن ارداگەرلەرگە كومەكتەسىپ جۇرگەن ادامداردى انىقتاپ الىپ, ولارعا قۇرمەت كورسەتۋ, مەنىڭ ويىمشا, وتە دۇرىس. «التىن جۇرەك» سىيلىعى - فيلوسوفياسى مەن قاعيدالارى جەتىلگەن, ادامدار اراسىندا ناسيحاتتاۋعا تۇرارلىق ءمان-ماڭىزى بار ۇلكەن جوبا», - دەپ سىيلىقتىڭ وزەكتىلىگى جايىندا جازۋشىلار وداعى توراعاسىنىڭ ورىنباسارى مەرەكە قۇلكەنوۆ ايتىپ ءوتتى.
ادامزات بالاسىن يگى ىستەرگە يتەرمەلەپ, ەڭ باستىسى, مۇقتاج جاندارعا كومەك قولىن سوزۋعا دەگەن تالپىنىستى شىڭدايتىن «التىن جۇرەك» ۇلتتتىق سىيلىعى مارتەبەسىن اسقاقتاتىپ كەلەدى. وعان سالتاناتتى ءراسىمدى تاماشالاۋعا كەلگەن مىڭداعان ادام كۋا بولدى.
«التىن جۇرەك» جۇلدەگەرلەرى
«جەتىم بالالارعا كورسەتكەن قامقورلىعى ءۇشىن» نوميناتسياسى بويىنشا گۇلنار قابىلبەكوۆا
ء«بىلىمدى دامىتۋعا قوسقان ۇلەسى ءۇشىن» نوميناتسياسى بويىنشا اسىلبەك قوجاحمەتوۆ
«مۇمكىندىگى شەكتەۋلى جاندارعا كورسەتكەن قامقورلىعى ءۇشىن» نوميناتسياسى بويىنشا نۇرجان ءالجانوۆا
«سپورتتى دامىتىپ, ونى قولداعانى ءۇشىن» نوميناتسياسى بويىنشا ارمان ماشيموۆ
«ارداگەرلەرگە كورسەتكەن قۇرمەتى ءۇشىن» نوميناتسياسى بويىنشا سەيداحمەت قالتاەۆ
«اقپاراتتىق قولداۋشى» نوميناتسياسى بويىنشا «Bestdoctor.kz» مەديتسينالىق اقپاراتتىق پورتالى
«جىلدىڭ قايىرىمدى ادامى» نوميناتسياسى بويىنشا بولات وتەمۇراتوۆ
«جىل ۇيىمى» نوميناتسياسى بويىنشا «حارەكەت» قورى
«دەنساۋلىق ساقتاۋ سالاسىنا قولداۋ كورسەتكەنى ءۇشىن» نوميناتسياسى بويىنشا روزا اليمحانوۆا
«قازاقستاننىڭ وركەندەۋىنە قوسقان ۇلەسى ءۇشىن» نوميناتسياسى بويىنشا ولگا باتۋتينا جانە يليا بايگابۋلوۆ
«قورشاعان ورتانى قورعاۋعا قوسقان ۇلەسى ءۇشىن» نوميناتسياسى بويىنشا «تازالىق» ەكولوگيالىق جوباسى
جىل مەتسەناتى سەرگەي گلۋشكوۆ
ەلۆيرا سەرىكقىزى,
«ەگەمەن قازاقستان»
الماتى
