جيىندى اشقان جازۋشىلار وداعى باسقارماسىنىڭ توراعاسى ۇ.ەسداۋلەتوۆ عافاڭا قاتىستى ونەگەلى ەستەلىكتەردىڭ باسىن قايىردى. اقسەلەۋلى دالادا شالقالاپ جاتقان عافاڭ: «اقسەلەۋ! بيدايعا ورىن بەرمەشى!» دەپ جالبارىنىپتى. تىڭنىڭ ويرانىن ەسكەرتكەنى عوي...
اقىن ە.راۋشانوۆتىڭ بايانداماسى مازمۇنىمەن ەرەكشەلەندى. ع.مۇسىرەپوۆ ومىردەن وتكەندە عافاڭ: «قازاق ادەبيەتىنىڭ ءبىر ءداۋىرى اياقتالدى, ويسىرادى», دەپتى. وسى تاقىلەتتەس اۋىر ويلارى قايىربەكوۆپەن قوشتاسقاندا مىرزاليەۆ, مىرزاليەۆتى اقىرعى ساپارعا شىعارىپ سالعاندا ت.مولداعاليەۆ قايتالاعان ەكەن. نەتكەن ايانىشتى ءارى قاستەرلى ۇندەستىكتەر ەدى...
اقىن ر.نيازبەكوۆ: «عافاڭ جەڭىلگەندەردى جاقتايتىن, رەتسىز جەڭگەندەردى داتتايتىن», دەپ ادىلەتتىلىگىن وركەشتەندىردى. سونداي-اق «ۇستاعاندا حرۋستالدى, جاعدايىم دۇرىستالدى», سەكىلدى ازىلمەن ورىلگەن تاپقىرلىعىنان ءبىرشاما شۋماق ءورىپ كۇلكىگە بوكتىردى.
مەملەكەتتىك سىيلىقتىڭ لاۋرەاتى, ساۋلەتشى ءا.تاتىعۇلوۆ عافاڭنىڭ ادامگەرشىلىگىنە قاتىستى ءسوز ءوربىتتى. ال اكادەميك سايلاۋ بايزاقوۆ ءوزىنىڭ ۇيلەنۋ تويىن وسىدان 57 جىل بۇرىن عافاڭ جۇرگىزگەنىن ەسكە ءتۇسىردى. ونىڭ ءىنىسى, اكادەميك ءسابيت قىزبەلدەگى مەكتەپ مۇعالىمى, بوزبالا اقىن عافۋدىڭ ولەڭ وقىپ, دومبىرامەن ءان سالعاندا بۇجىرلاۋ بەتىن ماڭدايىنا باسا تارتقان ورامالى جارتىلاي جاۋىپ, كولەگەيلەپ تۇراتىنىن, مۇنىڭ ءوزى كوز, ءتىل تيمەۋدىڭ قامى ەكەنىن قىزىقتى ەتىپ باياندادى.
قوستاناي وبلىستىق مادەنيەت باسقارماسىنىڭ باستىعى ە.قالماقوۆ وبلىس اكىمىنىڭ قۇتتىقتاۋ حاتىن وقىپ, اقىننىڭ جارى بادەش پەن ۇلى باقىتقا سىي-سياپات جاسادى. ال اقىننىڭ تۋعان ولكەسىنەن, جانگەلدين اۋداندىق ءماسليحاتىنىڭ حاتشىسى س.نۇرعازين ەكەۋىنە اۋدان 90 جىلدىعىنىڭ مەرەكەلىك توسبەلگىسىن تابىس ەتتى.
ع.قايىربەكوۆتىڭ قۇرمەتىنە ارنالعان جىر ءمۇشايراسىنىڭ قورىتىندىسىن جازۋشىلار وداعى باسقارما توراعاسىنىڭ ورىنباسارى ب.جاقىپ جاريا ەتىپ, باس جۇلدەگەر ءا.شەگەباي مەن ءبىرىنشى ورىن العان م.قۇنىپياقىزى ولەڭدەرىن وقىدى.
قوستانايلىق اقىن س.وسپانوۆ جۋىردا تاتارستانعا دەلەگاتسيا قۇرامىندا بارعاندا قوناقتاردى عافاڭنىڭ «انا تۋرالى جىر» انىمەن قارسى العانىن ايتقاندا, بادەش اپا باستاپ, زال قوستاپ وسى ءبىر قۇدىرەتتى اۋەندى اۋەلەتىپ جىبەردى...
مەرەيتويدىڭ كەرەمەت كادە-سىيى ع.قايىربەكوۆتىڭ پروزالىق تاڭدامالى شىعارمالارىنىڭ ءۇش تومدىعىنىڭ تاراتىلۋى ەدى.
كەشتى تاپقىرلىقپەن جۇرگىزگەن, اقىن ب.بەدەلحان: «بۇگىن قالانىڭ بارلىق كافەلەرى مەن مەيرامحانالارىندا باياعىداعى عافاڭ وتىرعانىنداي بوپ, ونىڭ قۇرمەتىنە داستارقان جايۋلى تۇر», دەپ استارلى ءازىل تاستادى.
ءبىز دە ءوز كەزەگىندە: «عافاڭدى ساعىنساڭىزدار, وسى زالدا ادەيى استانادان كەلىپ وتىرعان, وزىنەن ەكى جاس كىشى تۋعان قارىنداسى كۇلاش اپايدىڭ قۇيىپ قويعانداي مىنا تۇرىنە تەلمىرىڭىزدەرشى!» دەپ ول كىسىنى ورنىنان كوتەردىك.
قايسار ءالىم
الماتى
