«سولنەچنىي مير» قوعامدىق قورىنىڭ نەگىزىن داۋن سيندرومىنا بايلانىستى دامۋ ەرەكشەلىگى بار بالالاردىڭ ءبىر توپ بەلسەندى اتا-انا توبى قالاپ, ورتاق پروبلەمالارىمەن بولىسكەن ولار كەيىنىرەك بالالارعا مەديتسينالىق جانە پسيحولوگيالىق كومەك بەرەتىن وسى ورتالىقتى اشقان بولاتىن. ءار وتباسىنىڭ ءوز پروبلەماسىمەن جەكە كۇرەسكەننەن گورى ورتاقتاسا وتىرا سيندروممەن تۋعان بالالارعا قوعامنىڭ نازارىن اۋدارىپ, ءبىر جاعىنان ءبىر-بىرىنە مورالدىق تۇرعىدان قولداۋ كورسەتۋدىڭ اسا قاجەتتىگىن سەزىندىرگەن ورتالىق بارا-بارا جۇرگىزەتىن جۇمىستارىنىڭ اۋقىمىن كەڭەيتە ءتۇستى. اتا-انالارعا الەۋمەتتىك قورعاۋ جانە بەيىمدەۋ قىزمەتتەرى كۋرس رەتىندە وتكىزىلىپ, بىرجولعى تەگىن كەڭەس كورسەتۋ قولعا الىندى. الەۋمەتتىك ماڭىزى بار وسىنداي جۇمىستار اتقارۋمەن بىرگە «سولنەچنىي مير» بالالاردىڭ دامۋىندا ماڭىزى بار, ولارعا شاتتىق سىيلايتىن مادەني جانە سپورتتىق ءىس-شارالار الاڭىنا اينالدى. ماسەلەن «سولنتسەكروسس» شاراسى اياسىندا قازاقستاندىق ارتىستەر ونەر كورسەتىپ, بالعىندارعا باعا جەتپەس قۋانىش سىيلايدى. ورتالىق اشىلعاننان بەرگى ءبىر جارىم جىلدا وڭالتۋ كۋرسىنان 250 بالا ەم الدى.
جۋىردا «Beeline» كومپانياسىمەن ىنتىماقتاستىقتىڭ ارقاسىندا ورتالىق جۇمىسىندا جاڭا مۇمكىندىكتەر پايدا بولدى. وسىعان دەيىن ءبىر قالا اۋماعىندا كومەك بەرىپ كەلگەن «سولنەچنىي مير» وڭالتۋ ورتالىعىنىڭ ماماندارى بۇدان بىلاي قازاقستاننىڭ بارلىق ايماعىنا كەڭەس بەرۋگە مۇمكىندىك الدى. «بۇل – ەرەكشە بالا تاربيەلەپ وتىرعان وتباسىلارعا ۇلكەن كومەك», دەيدى «سولنەچنىي مير» قوعامدىق قورىنىڭ قۇرىلتايشىسى ماريا فەدوروۆا.
«شەكسىز مۇمكىندىكتەر» جوباسىنا قاتىسۋشىلار ءتىزىمىنىڭ تولىعۋى تۋرالى «Beeline قازاقستان» وكىلى راۋان قابدىراحيموۆ «بۇل جوبامەن اينالىسىپ جۇرگەنىمىزگە ءتورت جىلدان استى. وسى جىلداردا قازاقستاننىڭ بارلىق جەرىندەگى مەكتەپتەر, وڭالتۋ ورتالىقتارى, كىتاپحانالار ينتەرنەتكە قوسىلدى. نازارىمىزدى اۋدارعان جيىرما بەس ۇيىم بۇگىندە زاماناۋي تەحنولوگيالاردىڭ ارقاسىندا كوپتەگەن جەتىستىككە جەتىپ وتىر. ەندى «سولنەچنىي مير» ورتالىعى دا بىزبەن بىرگە. ورتالىقتىڭ پەداگوگتارىنا, اتا-انالارعا تاۋسىلماس ءتوزىم مەن قاجىر-قايرات, بارلىق بالاعا دەنساۋلىق تىلەيمىز. ينتەرنەت قوسىلعان سوڭ, ورتالىقتىڭ جۇمىسى بۇرىنعىدان دا جەمىستى بولاتىنىنا سەنىمدىمىز», دەدى.
انار تولەۋحانقىزى,
«ەگەمەن قازاقستان»
