جايىق جاعاسىندا ءۇش كۇن بويى كۇي كۇمبىرلەدى. قىرعىزستان, وزبەكستان, رەسەي مەملەكەتتەرىنەن جانە ەلىمىزدىڭ تۇكپىر-تۇكپىرىنەن جينالعان 600 ونەرپاز قۇرمانعازى رۋحىن اسقاقتاتتى. ۇلى كۇيشى-كومپوزيتور قۇرمانعازى ساعىرباي ۇلىنىڭ شىعارماشىلىعىن ناسيحاتتاۋعا ارنالعان حالىقارالىق وركەسترلەر فەستيۆالى اتىراۋ وبلىسى اكىمىنىڭ تاپسىرماسىمەن وبلىستىق مادەنيەت, مۇراعاتتار جانە قۇجاتتاما باسقارماسىنىڭ ۇيىمداستىرۋىمەن ءوتتى. ء«بارى وتە جوعارى دەڭگەيدە جاسالعان, اتىراۋعا تابانىمىز تيگەننەن باستاپ قۇرمەت پەن قوشەمەتتىڭ قۇشاعىندا بولدىق. قازاق اسپاپتارىنىڭ وزىندىك ەرەكشە ءۇنى بار. ونەردىڭ ءتىلى ءبىر, وسىنداي اۋقىمدى شاراعا قاتىسقانىمىزعا قۋانىشتىمىز», دەيدى رەسەيدەن كەلگەن «سكيف» كۆارتەتىنىڭ كوركەمدىك جەتەكشىسى الەكساندر موستىكانوۆ.
فەستيۆالدىڭ العاشقى ەكى كۇنى «جاستار» مادەنيەت ۇيىندە ءوتتى. ونەر مەرەكەسىنە 15 وركەستر ۇجىمى قاتىستى. شارا شىمىلدىعىن اتىراۋداعى دينا نۇرپەيىسوۆا اتىنداعى اكادەميالىق ۇلت اسپاپتار وركەسترى اشتى. ودان كەيىن ساحناعا كوتەرىلگەن كوكشەتاۋلىق ك.كۇمىسبەكوۆ اتىنداعى ۇلت اسپاپتار وركەسترى, اقتوبەلىك ا.جۇبانوۆ اتىنداعى ۇلت اسپاپتار وركەسترى, پاۆلوداردان كەلگەن ر.وماروۆ اتىنداعى ۇلت اسپاپتار وركەسترىنىڭ ونەرىن قىرعىزستاننان كەلگەن قوناقتار ء«مولمول» قومىزشىلار ءانسامبلى جالعادى. رەسەيدىڭ «سكيف» كۆارتەتى, اقتاۋ, قوستاناي, استانا قالالارىنان كەلگەن ونەر ۇجىمدارى دا قۇرمانعازى كۇيلەرىمەن بىرگە وزگە دە كومپوزيتورلاردىڭ شىعارمالارىن ورىنداپ, كورەرمەن قوشەمەتىنە بولەندى.
وزبەكستاننىڭ «سوگديانا» حالىق اسپاپتار وركەسترى, اتىراۋلىق «نارىن», الماتىدان كەلگەن قۇرمانعازى اتىنداعى مەملەكەتتىك اكادەميالىق ۇلت اسپاپتار وركەسترى فەستيۆالدىڭ ەكىنشى كۇنىندە ونەر كورسەتىپ, جايىق جاعاسىندا قۇدىرەتتى كۇي ونەرى سالتانات قۇردى. بۇل قاتاردا تالدىقورعاندىق م.تولەباەۆ اتىنداعى, ورالدىق داۋلەتكەرەي اتىنداعى, قىزىلوردالىق تۇرماعامبەت اتىنداعى حالىق اسپاپتارى وركەسترلەرى دە بار.
فەستيۆالدىڭ گالا-كونتسەرتىن 2000-عا جۋىق كورەرمەن تاماشالادى. قۇرمەتتى قوناقتار قاتارىندا ءاسانالى ءاشىموۆ, ۇلىقبەك ەسداۋلەت, قاتيموللا بەردىعاليەۆ, ءجۇرسىن ەرمان, ايتقالي جايىموۆ, ەرمەك قازيەۆ, ايگۇل ۇلكەنباەۆالاردىڭ بولۋى دا شارانىڭ ماڭىزىن ارتتىرا ءتۇستى. گالا-كونتسەرتتە وبلىس اكىمى نۇرلان نوعاەۆ: «ەلباسى باعدارلامالىق ماقالاسىندا «اركىم ءوزىنىڭ تۋعان جەرىن, ولكەسىن جەتىك ءبىلۋى كەرەك. تۋعان جەردەن ەلگە دەگەن ماxاببات ويانادى, ەلگە قىزمەت ەتۋ نامىسى ويانادى» دەگەن بولاتىن. ءار ءۇيدىڭ تورىندە تۇراتىن دومبىرانىڭ ارقاسىندا ەلىمىزدىڭ ونەرى, ءداستۇرى, مادەنيەتى بۇگىنگە دەيىن جەتىپ وتىر. ونەرىمىز بەرىك كەزدە مادەنيەتىمىزدى, ءداستۇرىمىزدى تاني ءبىلىپ, دارىپتەپ, الەمدىك جاھاندانۋ زامانىنداعى جاستارىمىزدىڭ بويىنا رۋx سىڭىرە وتىرىپ, ەلىن, جەرىن قورعايتىن ازاماتتى وسىرۋدە سىزدەردىڭ اتقارىپ جۇرگەن ەڭبەكتەرىڭىز زور. ءبىز وزىمىزگە جۇكتەلگەن لاۋازىمدىق مىندەتكە سايكەس وسى شارالاردى ۇيىمداستىرامىز. سونىمەن قاتار ءار ادام ازاماتتىق ۇستانىمىنا سايكەس بۇل ىستەردىڭ قوسشىسى, جارشىسى بولۋى ءلازىم», دەپ اتاپ ءوتتى.
گالا-كونتسەرتتىڭ ەرەكشەلىگى – ساحنا تورىندە 15 وركەستر ۇجىمىنىڭ بىرىگىپ ونەر كورسەتۋى بولدى. ەلىمىزدەگى ەڭ بەلگىلى ديريجەرلەر ايتقالي جايىموۆ, تالعات كارىموۆ, نازىمبەك مولداحمەتوۆ, گۇلفارا ءىزبانوۆا, ابىلاي تىلەپبەرگەنوۆ, ەركىن ورالبەكوۆ, ارمان امانجولوۆ, قابيرا قابيجانوۆا, راحات مادرەەۆ, راحيلا ەرعاليەۆا, سايا جۇماشەۆالار كەزەك-كەزەك ساحنا تورىنە كوتەرىلدى.
استانا قالاسى مەملەكەتتىك اكادەميالىق فيلارمونياسى قازاق وركەسترىنىڭ كوركەمدىك جەتەكشىسى ايتقالي جايىموۆ: «اتىراۋ توپىراعىندا دومبىرا ۇستاعان دۇلدۇلدەردىڭ باس قوسۋى – قۇرمانعازى بابامىزدىڭ ۇلىلىعىنا قۇرمەت. دومبىراشىلار قاي جەردە باس قوسسا دا, قۇرمانعازىنىڭ كۇيى كۇمبىرلەيدى. بۇل دا ونەر قۇدىرەتى», دەيدى. ۇلى دالانىڭ ماڭگىلىك ءۇنى وسىلايشا اتىراۋ اسپانىندا سالتانات قۇردى. ەلباسى «ۇلتتىق دومبىرا كۇنىن» جاريالاعان جىلدا بۇل دا ءبىر جاقسى باستاما بولعانى انىق.
باقىتگۇل باباش,
«ەگەمەن قازاقستان»
اتىراۋ
