بالىق اۋلاۋشىلار جارىسىمەن باستالعان فەستيۆال حالىقارالىق دەڭگەيدەگى سايىستارعا ۇلاسىپ, بىرنەشە سپورت تۇرىنەن جارىس ءوتتى. اتاپ ايتقاندا, قازاقشا كۇرەس, جەلكەندى قايىق, اكادەميالىق ەسۋ, جاعاجاي ۆولەيبولى مەن فۋتبولى, قول كۇرەسى, گىر كوتەرۋ, ارقان تارتۋ, بورەنەگە ورمەلەۋ, قوشقار كوتەرۋ سىندى جارىستاردان قاتىسۋشىلار باق سىنادى. سونداي-اق قوناقتار شاردارا اۋدانىنىڭ تاريحىمەن, اۋىل شارۋاشىلىعى ونىمدەرى جانە ۇلتتىق قولونەر كورمەسىمەن تانىستى. سپورتتىق سايىستار مەن كونتسەرتتىك باعدارلامالار قاتار ۇيىمداستىرىلدى. شاردارا اۋدانىنىڭ ونەرپازدارى ارنايى مەرەكەلىك «Safari Shardara» ءانىن, «قازىنا», «شامسينۋر» بي توپتارى جانە تسيرك ونەرپازدارى حورەوگرافيالىق كومپوزيتسيا ورىندادى. ال تۇركىستان – وتىرار – شاردارا باعىتىندا ءجۇرىپ وتكەن موتوبايكەرلەر «motokross» ونەرىمەن كوپشىلىكتى ءتانتى ەتتى.
فەستيۆالدا ءسوز العان وبلىس اكىمى جانسەيىت تۇيمەباەۆ سپورتتىق جارىستارعا قاتىسۋشىلار مەن قوناقتاردى قۇتتىقتاپ, جەڭىمپاز اتانعان بىرقاتار سپورتشىنى ماراپاتتادى. ءىس-شارا «دجيپ» كولىكتەرىنىڭ جارىسىمەن جالعاسىپ, قۇمدا كومپوزيتسيالىق «Rock racing» شوۋى كورسەتىلدى. ال تۇيەلەر جارىسىندا 15 قاتىسۋشى باق سىناپ, ءوزارا مىقتىنى انىقتادى. سونداي-اق كوپشىلىك ساياتشىلاردىڭ حالىقارالىق جارىسىن تاماشالادى.
ايتا كەتەلىك, وڭىردە بۇعان دەيىن تۇلكىباس اۋدانىندا «قىزعالداق», بايدىبەك اۋدانىندا «قىمىزمۇرىندىق», جەتىسايدا «قاۋىنفەست» فەستيۆالى وتكەن بولاتىن.
عالىمجان ەلشىباي,
«ەگەمەن قازاقستان»
تۇركىستان وبلىسى
