مادەنيەت جانە سپورت مينيسترلىگى مەن وبلىس اكىمدىگىنىڭ بىرلەسۋىمەن استانا قالاسىنىڭ 20 جىلدىعى اياسىندا ۇيىمداستىرىلعان امىرە قاشاۋباەۆ اتىنداعى رەسپۋبليكالىق فەستيۆالعا 34 جاس ءداستۇرلى ءانشى قاتىستى.
قازىلار القاسى بايقاۋعا كەلگەن قاتىسۋشىلاردىڭ ونەرىن ءۇش كەزەڭ بويىنشا ساراپقا سالدى. «فەستيۆالعا كەلگەن جاستار شاما-شارقىنشا ونەرلەرىن كورسەتتى. ونەرپازداردىڭ ورىنداۋشىلىق دەڭگەيى جاقسى, باسىم كوپشىلىگى انشىلىك اپپاراتتى مەڭگەرۋگە جۇمىس جاساعانى بايقالىپ تۇر. اتتەڭ-ايى, ءاننىڭ مازمۇنىنا كوڭىل ءبولۋ قالىس قالىپ جاتىر. ارينە بۇنى جاس انشىلەر بولاشاقتا ەسكەرەدى دەپ ويلايمىن. جالپى, بايقاۋ وتە جوعارى, كاسىبي دەڭگەيدە ۇيىمداستىرىلدى», دەيدى الماتىداعى قۇرمانعازى اتىنداعى قازاق ۇلتتىق كونسەرۆاتورياسىنىڭ «حالىق ءانى» كافەدراسىنىڭ مەڭگەرۋشىسى, PHD دوكتورى امانگەلدى كۇزەۋباي.
ءبىر اپتاعا جۋىق وسكەمەن اسپانىندا ءداستۇرلى اندەردى قالىقتاتقان امىرە قاشاۋباەۆ اتىنداعى رەسپۋبليكالىق فەستيۆال وبلىستىق دراما تەاتردا گالا-كونتسەرتپەن قورىتىندىلاندى. گالا-كونتسەرتتە فەستيۆال جۇلدەگەرلەرىمەن قاتار استانادان قۇرمەتتى قوناق رەتىندە شاقىرىلعان ءداستۇرلى انشىلەر مەدعات ماناپوۆ, پەريزات تۇراروۆا, ايتبەك نىعىزباەۆ پەن ەرلان رىسقالي اۋەلەتە ءان شىرقادى. ماراپاتتاۋ راسىمىندە ءسوز العان قازىلار القاسىنىڭ توراعاسى, قازاقستاننىڭ حالىق ءارتىسى قاجىبەك بەكبوسىنوۆ: «ەرەكشە ايتقىم كەلەتىنى, بايقاۋعا قاتىسۋشىلار بۇرىن 9-10 ادامنان اسپايتىن ەدى. وسى جولى فەستيۆالگە 34 جاس ءانشى قاتىستى. ءۇش كۇن بويى سابىلىپ بايقاۋ وتكىزدىك. ونەرپازدار بىرىنەن ءبىرى وتەدى. ولاردىڭ ءداستۇرلى انگە كوڭىل بولگەندەرى, سونى ۇستاپ جۇرگەندەرى قۋانتتى», دەي كەلە فەستيۆالدى ۇيىمداستىرۋشىلارعا العىسىن جەتكىزدى.
سونىمەن, فەستيۆال قورىتىندىسىندا ەكى ءۇشىنشى ورىندى الماتىداعى ت.جۇرگەنوۆ اتىنداعى قازاق ۇلتتىق ونەر اكادەمياسى مەن قۇرمانعازى اتىنداعى قازاق ۇلتتىق كونسەرۆاتورياسىنىڭ ستۋدەنتتەرى دياس مۇراتحان مەن ءبىرجان ايتاحمەتوۆ يەلەنسە, ەكىنشى ورىن باتىس قازاقستان وبلىسى ع.قۇرمانعاليەۆ اتىنداعى وبلىستىق فيلارمونياسىنىڭ ءانشىسى ەرنار ومىرالىگە بۇيىردى. جۇلدەلى 1-ورىندى استاناداعى قازاق ۇلتتىق ونەر ۋنيۆەرسيتەتىنىڭ ستۋدەنتى باۋىرجان نۇرمۇحانوۆ قانجىعالاسا, باس جۇلدە – گران-پريگە (1 ميلليون تەڭگە) الماتىداعى «قازاقكونتسەرت» مەملەكەتتىك كونتسەرتتىك ۇيىمىنىڭ ءانشىسى اسقار مۇقيات لايىق دەپ تابىلدى.
ازامات قاسىم,
«ەگەمەن قازاقستان»
وسكەمەن
