ەلگە ەل قوسىلسا قۇت. ايتپەسە, كەنتتىڭ تىرشىلىگى ءبىراز ۋاقىت بۇرىن جۇدەۋ ەدى. كەزىندە الىپ ستانسامەن بىرگە سالىنعان كوپقاباتتى ۇيلەرى بوس قالعان-دى. قازىر جۇدەۋ تىرشىلىككە رەڭ بەرىپ, ءوندىرىستى كەنتتىڭ كەلبەتى وزگەرە باستادى. تۇرعىنداردىڭ دەنى ەلەكتر ستانساسىندا ەڭبەك ەتۋدە. بۇدان باسقا, بىرنەشە شارۋا قوجالىعى, شاعىن جانە ورتا بيزنەس نىساندارى بار.
كەنت اكىمى مارجان الشىنباەۆانىڭ ايتۋىنشا, كەنتتىڭ بىلتىردان بەرى جەكە بيۋدجەتى بار. ياعني, 4-ءشى دەڭگەيلى بيۋدجەت ارقىلى سالىقتان تۇسكەن قارجىعا كەنت قاۋىمداستىعىمەن اقىلداسا وتىرىپ, ىشكى جولداردى جوندەۋ, ساياباقتار وتىرعىزۋ قولعا الىنۋدا. تۇرعىندار كەنتكە كىرەبەرىس جولدىڭ جوندەلۋىن كۇتۋدە. جوبا-جوسپارلار دا جەتەرلىك.
بىلتىر گرەس-2 ستانساسى كەنتتىڭ 60 جىلدىعىنا بالالار الاڭىن ورناتىپ, جاقسى سىيلىق جاساپ بەرىپتى. تۇرعىن ۇيلەر دە قالپىنا كەلتىرىلۋدە. بوس قالعان پاتەرلەر جوندەۋدەن وتكىزىلىپ, 45 وتباسى كىلتتەرىن ەندى الادى. بۇل پاتەرلەر ەكىباستۇز قالاسىنىڭ مەنشىگىنە وتكەن. ەگەر قالعان ۇيلەر جوندەلسە, بۇل ۇيدەگى پاتەرلەرگە تاعى 200-دەي ادام قونىستانباق.
جالپى, كەنتتە نەگىزىنەن ءوز ۇلتىمىز كوپ, سونداي-اق 1880 ورىس, 141 ۋكراين, 82 نەمىس, 79 تاتار, 41 بەلارۋس, 5 چەشەن حالقىنىڭ وكىلدەرى تۇرادى. سونىمەن بىرگە وزبەكستاننان ەلگە ورالعان 24 وتباسى قونىستاندى. كوش ءالى جالعاسۋدا. مىسالى, 3 بالاسى بار اسقاربەك مۇحامەدوۆ تۇركىستان وبلىسىنىڭ ارىس قالاسىنان «ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋ» باعدارلاماسى بويىنشا كوشىپ كەلىپتى. ول ستانساعا گاز-ەلەكترمەن دانەكەرلەۋشى بولىپ جۇمىسقا تۇردى.
كەنت كوشەلەرىنە كورىك بەرگەن «التىن ادام», «بارىس», «جوڭعار مەن قازاقتىڭ جەكپە-جەگى», «قاراكەرەي قابانباي», «شاپىراشتى ناۋرىزباي» مۇسىندەرىنىڭ اۆتورى, ءمۇسىنشى, سۋرەتشى, قولونەرشى ەركىنجاس مۇحامەدجانوۆپەن جولساپار بارىسىندا تانىسقانبىز. مەكتەپ وقۋشىلارى, اۋىل بالالارى سۋرەت ونەرىنە بەيىمدەلىپ, ءمۇسىن ونەرىن ۇيرەنۋدە. ەركىنجاس تا – شەتتەن كوشىپ كەلگەن اعايىننىڭ ءبىرى.
بۇل كۇندەرى قازاق تىلىندە ءبىلىم بەرەتىن مەكتەپتە 400-دەي وقۋشى, ورىس تىلىندەگى مەكتەپتە 366 وقۋشى بار. ورىس مەكتەبىندە 130-عا جۋىق قازاق بالاسى وقىپ جۇرسە, 1-5 جاستىڭ ارالىعىندا 400-گە تارتا كىشكەنتاي ءوسىپ كەلەدى.
ال تۇرعىندار جاڭا مەكتەپتىڭ اشىلۋىن اسىعا كۇتىپ ءجۇر. بيىل مامىر ايىندا باستالعان قۇرىلىستى جەرگىلىكتى «ستالمونتاج» جشس مەردىگەر كومپانياسى قولعا الىپتى. جوبا بويىنشا مەكتەپ 2019 جىلدىڭ شىلدە ايىندا پايدالانۋعا بەرىلمەك. ءسويتىپ, كەلەسى جاڭا وقۋ جىلىن سولنەچنىي كەنتىنىڭ 400-دەن استام وقۋشىسى جاڭا مەكتەپتە وقيدى. سپورت ستاديونى سالىنادى. مەكتەپتىڭ قۇرىلىسىنا 1,2 ملرد تەڭگە بولىنگەن. اباي اتىنداعى جالپى ءبىلىم بەرەتىن مەكتەپ ديرەكتورى ايمان كەنجەباەۆانىڭ ايتۋىنشا, الداعى ۋاقىتتا كەنتتىڭ جالپى ءبىلىم بەرۋ مەكتەبىنەن كوپسالالى مەكتەپ-گيمنازيا ساناتىنا اۋىستىرۋ جوسپارى دا بار.
مەكتەپ قۇرىلىسىمەن ەكىباستۇزعا جاڭادان اكىم بولىپ تاعايىندالعان نۇرجان اشىمبەتوۆ تە تانىسىپ قايتتى. كاسىپورىننىڭ اتقارۋشى ديرەكتورى ۆياچەسلاۆ ۆدوۆىدچەنكونىڭ مالىمەتىنشە, قازىر مەكتەپتىڭ ءبىرىنشى قاباتى دايىن. ەكىنشى قاباتتا تەرەزەلەردى ورناتۋ, سانتەحنيكالىق جانە ەلەكترمونتاجداۋ جۇمىستارى جۇرگىزىلۋدە. قۇرىلىس ماتەريالدارىنىڭ بارلىعى ەكىباستۇزدىق كاسىپكەرلەردەن جەتكىزىلۋدە. قۇرىلىس باسىندا ماماندارمەن بىرگە جەرگىلىكتى تۇرعىندار دا ەڭبەك ەتۋدە.
فاريدا بىقاي,
«ەگەمەن قازاقستان»
پاۆلودار وبلىسى, ەكىباستۇز قالاسى, سولنەچنىي كەنتى
