لوندون وليمپياداسىنىڭ مۇراسى

ەمي تسان, «نيۋ-يورك تايمس» – لوندون

بۇل – 2005 جىل ەدى. لون­دون باسشىلىعى قالانىڭ شىعى­سىن­داعى ونەركاسىپتىك ايماق, تۇرمىسى تومەن اۋدان ستراتفوردتى قايتا جاڭعىرتۋى كەرەك-تۇعىن. بىراق شاھار باسشىلىعى لوندوننىڭ شىعىسىنداعى كەدەي اۋداندى دامىتۋ ءۇشىن 9 ميلليارد فۋنت-ستەرلينگتى (11,5 ميلليارد دوللار) وليمپيادا كەشەنىنە عانا جۇمساۋعا قۇقىعى جوق ەدى. 

قارجىلىق داعدارىس بۇرق ەتە تۇسكەندە, وليمپياداعا ارنالعان كەشەندەردى ويىنداردان كەيىن دە پايدالانۋدىڭ ماڭىزى ارتا ءتۇستى. 

قازىرگى تاڭدا, وليمپيا ويىن­دارىنان كەيىن 6 جىل وتكەندە ەليزابەت پاتشايىم اتىنداعى وليمپيادالىق ساياباققا قاتىس­تى ماقسات ورىندالدى دەۋگە بو­لادى. بوس جاتقان جەرلەر كوگال­داندىرىلدى. وزەندەر مەن كانالداردا سەرۋەندەۋگە ارنالعان قايىقتار قويىلدى. 

«وليمپيادا ستاديونى» «ۆەست حەم يۋنايتەد» فۋتبول كلۋ­بى­نىڭ نەگىزگى الاڭىنا اينالدى. سونىمەن قاتار مۇندا ءتۇرلى جەڭىل ات­لەتيكا جارىستارى, Foo Fighters جانە بەيونسە سەكىلدى انشىلەردىڭ كون­تسەرتى ءوتتى. 

سەر انيش كاپۋردىڭ ارحيتەك­تۋ­راسىمەن سالىنعان The Arcelor­Mittal Orbit شولۋ مۇناراسى بوي كو­تەردى. مەيماندار الىپ ەسكەرت­كىشتىڭ توبەسىنە اينالمالى, كۇمىس تۇستەس قۇرال ارقىلى شىعادى. 

ۇلىبريتانيا قارجىلىق با­قىلاۋ جونىندەگى باسقارماسى مەن يۋنيسەف ساياباقتىڭ بيزنەسكە ارنالعان بولىگىندە دۇكەندەرىن اش­تى. وسى ارادا الىپ ويىن-ساۋىق ورتالىعى بار. بۇرىن ءباسپاسوز ورتالىعى بولعان جەر قازىرگى تاڭدا تەحنولوگيالىق حابقا اينالعان. 

ساياباقتىڭ ىشىندە سپورتپەن اينالىسىپ جۇرگەندەردىڭ قاراسى قالىڭ. بەيجىڭدە وتكەن 2008 جىلعى جازعى وليمپيادادان كەيىن 10 جىل وتكەن سوڭ كەشەندەردىڭ ءتيىم­سىز پايدالانىلعانى انىق­تالدى. ريو وليمپياداسىنا ارنالعان كەشەندەر التى اي وتپەي-اق قا­ڭى­راپ بوس قالدى. ورىستار مەن برا­زيليالىقتار فۋتبولدان الەم چەمپيوناتىن وتكىزۋدىڭ پايداسىنا كۇمانمەن قارادى. 

باسقا قالالار دا ماسەلەگە باسقا قىرىنان ءمان بەرە باستادى. توكيو بيلىگى 2020 جىلعى جاز­عى وليمپياداعا ارناپ سالىنا­تىن, زاحا حاديد ارحيتەكتۋراسىن سىز­عان ستاديوننىڭ باعاسىن كور­گەن­نەن كەيىن ونى سالۋدان باس تارتتى. 

Games for Populous ارحي­تەك­تۋرالىق فيرماسىنىڭ بۇرىنعى قىزمەتكەرى دجەفف كەاستىڭ اي­تۋىنشا, لوندون تاراپى از عيمارات سالۋ جونىندە شەشىم قابىلداعان ەكەن. 

«ۇنەمى قاجەتتىلىگى جوق سپورت كەشەندەرىن ۋاقىتشا عانا پايدالاناتىنداي ەتىپ سالدىق», دەيدى ول. باسكەتبول ارەناسى لوندون وليم­پياداسى اياقتالعاننان كەيىن ساتىلىپ كەتتى. جاعالاۋ ۆولەي­بولى «اتتى گۆارديالار الاڭىن­داعى» ۋاقىتشا كەشەندە ءوتتى. 

2024 جىلعى وليمپيادانى وتكىزۋ قۇقىعىنا يە بولعان پاريج تاراپى لوندوننىڭ تاجىريبەسىنە سۇيەنىپ, تۇراقتى ءۇش كەشەن سالۋدى جوسپارلاپ وتىر. ءجۇزۋ باسسەينى ۋاقىتشا عانا سالىنادى. ال ۇنەمدەلگەن قارجى شاھاردىڭ سپورت عيماراتتارى از بولىگىندە تۇرعىندارعا ارنالعان باسسەيندەر سالۋعا جۇمسالماق. 

لوندونداعى وليمپيادا ساياباعى باسشىلىعى سۋىق جانە قوناقتار قاتارى سيرەيتىن ايلاردا كەلۋشىلەردىڭ سانىن ارتتىرۋعا كۇش سالۋى كەرەك. 

قازىرگى تاڭدا اۋدانداعى تۇر­عىن­­داردىڭ باسىم بولىگى اينالا­دا­عى بيىك عيماراتتاردان قانداي پاي­­دا تۇسەتىنىن بىلگىسى كەلەدى. وليم­­پيادا ساياباعىنىڭ جانىن­داعى تۇرعىن ۇيلەر قۇنى ويىن­دار اياق­تالعاننان كەيىنگى 5 جىل­دا 64 پايىزعا ءوستى. وسىعان باي­لا­نىس­تى لوندون اسسامبلەياسى اي­ماق­تى دامىتۋعا جاۋاپتى كوم­پا­­نيا­نىڭ جۇمىس جىلدامدىعىن سىنعا الدى. 

قولجەتىمدى باسپانا جونىندە باستاما كوتەرىپ جۇرگەن ساسكيا و’حارانىڭ ايتۋىنشا, كوپشىلىك دامۋ تۋرالى بەرىلگەن ۋادەلەردىڭ ورىندالماعانىنا قىنجىلادى. 

«قازىرگى تاڭدا لوندوننىڭ باسقا بولىكتەرىنە قاراعاندا, وسى اۋداندا ۇيسىزدەر سانى كوپ. وليم­پيادا – ايماقتى جەدەل دامى­تۋدىڭ ءتيىمدى جولى. بىراق ورتا تاپ ءۇشىن مۇنىڭ ەش ماعىناسى جوق», دەيدى و’حارا. 

© 2018 The New York Times News Service

ماقالانى اۋدارعان اباي اسانكەلدى ۇلى,

«ەگەمەن قازاقستان»