ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنە سايكەس, باعدارلاماعا ونىڭ قولدانىستاعى تەتىكتەرىنىڭ تيىمدىلىگىن ارتتىرۋ جانە جاڭا شارالارمەن تولىقتىرۋ ءۇشىن وزگەرىستەر ەنگىزۋ كوزدەلگەن. مەملەكەتتىك باعدارلامانىڭ نەگىزگى ماقساتى – ەڭبەك رەسۋرستارىنىڭ بىلىكتىلىگىن ارتتىرۋ, جاپپاي كاسىپكەرلىكتى دامىتۋ جانە ءوزىن-ءوزى جۇمىسپەن قامتىعانداردى, جۇمىسسىزداردى ءونىمدى جۇمىسقا تارتۋ. مينيستر ءمادينا ابىلقاسىموۆانىڭ بايانداۋىنشا, 2018 جىلى باعدارلامانى ىسكە اسىرۋعا 112,9 ملرد تەڭگە بولىنگەن, جىلدىڭ سوڭىنا دەيىن 571 مىڭ ازاماتتى جۇمىسپەن قامتۋ شارالارىنا تارتۋ جوسپارلانىپ وتىر.
«وسى جىلدىڭ 10 ايىنىڭ قورىتىندىسى بويىنشا 82,5 ملرد تەڭگە يگەرىلگەن. قازانداعى جاعداي بويىنشا قولدانىستاعى باعدارلاما 563 مىڭ ادامدى جۇمىسپەن قامتۋ شارالارىنا تارتۋعا مۇمكىندىك بەردى, بۇل جىلدىق جوسپاردىڭ 99 پايىزىن قۇرايدى», دەدى م. ابىلقاسىموۆا.
باعدارلامانىڭ ءبىرىنشى باعىتى ەڭبەك نارىعىندا سۇرانىسقا يە ماماندىقتار مەن داعدىلار بويىنشا جاپپاي وقىتۋدى كوزدەيدى. تەگىن تەحنيكالىق جانە كاسىپتىك وقىتۋ شەڭبەرىندە 1 قىركۇيەكتەن باستاپ 20 مىڭ ادام وقۋعا كىرىستى, بۇل – جىلدىق جوسپاردىڭ 99 پايىزى. م.ابىلقاسىموۆانىڭ مالىمدەۋىنشە, قازانداعى جاعداي بويىنشا 40 مىڭعا جۋىق باعدارلاماعا قاتىسۋشى قىسقا مەرزىمدى وقىتۋعا جىبەرىلدى. رەسپۋبليكا بويىنشا قىسقا مەرزىمدى كاسىپتىك وقىتۋدى اياقتاعان 18 مىڭ ادام جۇمىسقا ورنالاستىرىلدى.
ەڭبەك جانە حالىقتى الەۋمەتتىك قورعاۋ ءمينيسترى ءبىرىنشى باعىتتىڭ ىسكە اسىرىلۋىن ەسكەرە وتىرىپ, مەملەكەتتىك باعدارلاما جوباسىندا وقۋدى اياقتاعان ادامداردى تولىق جۇمىسقا ورنالاستىرۋدى قامتاماسىز ەتۋگە باعىتتالعان جاڭا تەتىكتەر كوزدەلگەنىن اتاپ ءوتتى.
باعدارلامانىڭ ەكىنشى باعىتى جاپپاي كاسىپكەرلىكتى دامىتۋدى كوزدەيدى. وسى بويىنشا اۋىلداردا جانە قالالاردا شاعىن نەسيە بەرۋ اياسىندا قازانداعى جاعداي بويىنشا 42 ملرد تەڭگە, ونىڭ ىشىندە اۋىلداردا 31 ملرد تەڭگە جانە قالالاردا 11 ملرد تەڭگە يگەرىلدى. م.ابىلقاسىموۆا شاعىن نەسيەلەردى تۇپكى قارىز الۋشىلارعا جەتكىزۋدى تەزدەتۋ ءۇشىن مەملەكەتتىك باعدارلاما جوباسىندا بىرقاتار وزگەرىس قاراستىرىلعانىن ايتتى. وسى بويىنشا اۋىلدىق ەلدى مەكەندەردە زاكىرلى كووپەراتسيانى دامىتۋ ءۇشىن شاعىن نەسيە مولشەرى 5000-نان 8000 اەك-كە دەيىن ۇلعايتىلدى, زاكىرلى كووپەراتسيا قاتىسۋشىلارىنا, اۋىلدارداعى جانە شاعىن قالالارداعى جۇمىس ىستەپ جۇرگەن كاسىپكەرلەرگە جۇمىس ورىندارىن قۇرۋ بويىنشا قويىلاتىن تالاپتار جەڭىلدەتىلدى, باعدارلاماعا قاتىسۋشىلار سانى جۇمىس ىستەپ جۇرگەن كاسىپكەرلەرمەن تولىقتى.
باعدارلامانىڭ ءۇشىنشى باعىتى اياسىندا قازانداعى جاعداي بويىنشا 128 مىڭ ادام سۋبسيديالاناتىن جۇمىس ورىندارىنا جۇمىسقا ورنالاستىرىلدى, ونىڭ ىشىندە 22 مىڭ ادام الەۋمەتتىك جۇمىس ورىندارىنا, 26 مىڭ ادام جاستار پراكتيكاسىنا,
80 مىڭ ادام قوعامدىق جۇمىستارعا جىبەرىلدى. ەلەكتروندى ەڭبەك بيرجاسى ارقىلى 336 مىڭعا جۋىق ادام تۇراقتى جۇمىس ورىندارىنا ورنالاستىرىلدى. ەڭبەك رەسۋرستارىنىڭ ۇتقىرلىعىن ارتتىرۋ اياسىندا وڭتۇستىك وڭىرلەردەن 1488 وتباسى نەمەسە 4925 ادام قونىس اۋدارىپتى.
«جۇمىس كۇشى جەتىسپەيتىن وڭىرلەرگە كوشۋ كەزىندە قونىس اۋدارعان ادامداردى تۇرعىن ۇيمەن قامتاماسىز ەتۋ ماڭىزدى فاكتور بولىپ تابىلادى. وسى ءۇشىن مەملەكەت باسشىسىنىڭ تاپسىرماسى بويىنشا مەملەكەتتىك باعدارلامادا جۇمىس بەرۋشىلەردىڭ قاتىسۋىمەن قونىس اۋدارۋشىلارعا تۇرعىن ءۇي سالۋ جانە ساتىپ الۋ تەتىگى ازىرلەنگەن. بۇل ءتاسىل الدىمەن سولتۇستىك قازاقستان وبلىسىندا سىناقتان وتكىزىلىپ, كەيىن باسقا وڭىرلەردە قولدانىلادى», دەدى م.ابىلقاسىموۆا.
سقو-دا الداعى ءۇش جىلدا ءۇش مىڭعا جۋىق قونىس اۋدارۋشى وتباسىن تۇرعىن ۇيمەن قامتاماسىز ەتۋ جوسپارلانىپ وتىر.
ۇلتتىق ەكونوميكا ءمينيسترى تيمۋر سۇلەيمەنوۆ قازىرگى تاڭدا شاعىن نەسيە بەرۋ سحەماسىنا ەكىنشى دەڭگەيلى جەتى بانك جانە ەكى شاعىن قارجى بەرۋ ۇيىمى قاتىساتىنىن ايتتى. 2018 جىلى قالالارداعى شاعىن نەسيە بەرۋگە بولىنگەن قاراجاتتىڭ جالپى سوماسى 17 ملرد تەڭگەنى قۇرايدى. قازىر 11,1 ملرد تەڭگە يگەرىلىپ, 1042 جوبا قارجىلاندىرىلعان.
ءوز كەزەگىندە ءبىلىم جانە عىلىم ءمينيسترى ەرلان ساعاديەۆ تەحنيكالىق جانە كاسىپتىك ءبىلىمى بار كادرلاردى دايارلاۋدى ىسكە اسىرۋ بارىسى جونىندە باياندادى. قازىرگى تاڭدا 337 كوللەدجدە 36,6 مىڭ ادام ءبىلىم الۋدا, ونىڭ 21,5 مىڭى الەۋمەتتىك ءالسىز توپتان.
«2018 جىلى 20 200 ادام قابىلداندى. جالپى, جوسپار ورىندالدى. اكىمدىكتەردىڭ اقپاراتى بويىنشا وتكەن جىلى تۇسكەن ستۋدەنتتەردىڭ 3900-ءى وقۋ ءبىتىرىپ, ونىڭ 72 پايىزى جۇمىسقا ورنالاستى. ال كەلەسى, 2019 جىلى 5300 ادام وقۋ بىتىرەدى», دەدى ءبىلىم جانە عىلىم ءمينيسترى.
اۋىل شارۋاشىلىعى ءبىرىنشى ۆيتسە-ءمينيسترى ارمان ەۆنيەۆتىڭ بايانداۋىنشا, باعدارلامانىڭ ەكىنشى باعىتى بويىنشا «قازاگرو» ەنشىلەس قۇرىلىمدارى ارقىلى اۋىلدىق ەلدى مەكەندەردە جانە شاعىن قالالاردا بيزنەس-جوبالاردى ىسكە اسىرۋ ءۇشىن شاعىن نەسيەلەر بەرۋ جۇمىستارى جۇرگىزىلۋدە. وسى ماقساتتار ءۇشىن 2018 جىلى 44,7 ملرد تەڭگە بيۋدجەتتىك نەسيە ءبولىندى, سونىڭ ىشىندە «پرەزيدەنتتىڭ بەس الەۋمەتتىك باستاماسىن» ىسكە اسىرۋ اياسىندا 13,9 ملرد تەڭگە قوسىمشا قارجى ءبولىندى.
«اتامەكەن» ۇكپ باسقارما توراعاسى ابىلاي مىرزاحمەتوۆ تەحنيكالىق جانە كاسىپتىك ماماندىقتار بويىنشا كاسىپتىك دايارلاۋ, بىلىكتىلىكتى ارتتىرۋ جانە داعدىلاردى مەڭگەرۋ بويىنشا وقۋ ورتالىقتارى ءتىزىلىمىن جۇرگىزۋ جۇمىستارى اتقارىلىپ جاتقانىن اتاپ ءوتتى. سونىمەن قاتار «باستاۋ-بيزنەس» جوباسى بويىنشا 2018 جىلى بيزنەس جۇرگىزۋ داعدىلارىنا اۋىل مەن شاعىن قالالاردىڭ 30 مىڭعا جۋىق تۇرعىنىن وقىتۋ كوزدەلگەن.
ءتيىستى مينيسترلىكتەر مەن ءوڭىر اكىمدەرىنىڭ باياندامالارىن تىڭداعاننان كەيىن, پرەمەر-مينيستر باقىتجان ساعىنتاەۆ وزەكتەندىرۋ جوسپارلارى مەن باعدارلامانىڭ مەملەكەتتىك مارتەبەسىمەن قايتا بەكىتىلۋىن ەسكەرە وتىرىپ, ونى ودان ءارى ىسكە اسىرۋعا قاتىستى ناقتى تاپسىرمالار بەردى. بەرىلگەن مالىمەتتەرگە سايكەس, ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋ باعدارلاماسىنىڭ جوسپارلى كورسەتكىشتەرى ورىندالعانى اتالىپ ءوتتى. سونىمەن قاتار پرەمەر-مينيستر بارلىق وڭىرلەرگە باعدارلامانى ىسكە اسىرۋ جۇمىستارىن جانداندىرۋدى تاپسىردى. نىسانالى توپتاردى, اتاپ ايتقاندا جۇمىسسىزدار مەن ءوزىن-ءوزى جۇمىسپەن قامتىعان ادامداردىڭ تابىسىن ارتتىرۋ ءۇشىن ازاماتتاردى ءونىمدى جۇمىسپەن قامتۋ بويىنشا قابىلدانىپ جاتقان شارالاردىڭ اسەرىنە مونيتورينگ جۇرگىزۋ جۇيەسىن جولعا قويۋى كەرەكتىگى تاپسىرىلدى. ۇكىمەت باسشىسىنىڭ تاپسىرماسى بويىنشا, ەڭبەك جانە حالىقتى الەۋمەتتىك قورعاۋ مينيسترلىگى «اتامەكەن» ۇكپ-مەن جانە وڭىرلەرمەن بىرىگىپ, «بيزنەس-باستاۋ» جوباسىمەن ءبىلىمىن جەتىلدىرگەندەردى شاعىن نەسيەمەن قامتۋ ماسەلەسىنە ەرەكشە نازار اۋدارۋى كەرەك.
بۇدان بولەك, باعدارلامانىڭ ورىندالۋىن جەكە وڭىرلىك جۇمىسپەن قامتۋ باعدارلامالارى, ونىڭ ىشىندە بيۋدجەتتىك قاراجاتتىڭ تيىمدىلىگى تۇرعىسىندا ىسكە اسىرىلۋىن ەسكەرە وتىرىپ تالداۋ جاساۋ تاپسىرىلدى. ب.ساعىنتاەۆ ۇكىمەت مۇشەلەرىنە وزەكتەندىرىلگەن باعدارلامانىڭ تيىمدىلىگى تۇرعىنداردىڭ تابىسىنىڭ وسىمىمەن دە باعالانۋى ءتيىس ەكەندىگىن ەسكە سالدى.
سونداي-اق ۇكىمەت وتىرىسىنىڭ بارىسىندا ادىلەت ءمينيسترى مارات بەكەتاەۆ 2019 جىلعا ارنالعان زاڭ جوبالاۋ جۇمىستارىنىڭ جوسپارى تۋرالى باياندادى. ادىلەت مينيسترلىگى زاڭ جوبالاۋ قىزمەتى ماسەلەلەرى جونىندەگى ۆەدومستۆوارالىق كوميسسيا مۇشەلەرىمەن بىرلەسىپ, ۇكىمەتتىڭ 2019 جىلعا ارنالعان جۇمىس جوسپارىن ازىرلەدى. ونىڭ نەگىزىنە ەل پرەزيدەنتى ايقىنداعان, مەملەكەتتىڭ ستراتەگيالىق قۇجاتتارىندا باياندالعان مىندەتتەر الىندى.
م.بەكەتاەۆ الداعى جىلى «حالىقتىڭ دەنساۋلىعى جانە دەنساۋلىق ساقتاۋ جۇيەسى تۋرالى», «پەداگوگ مارتەبەسى تۋرالى», «مەملەكەتتىك فەلدەگەرلىك بايلانىس تۋرالى» زاڭ جوبالارىن جانە باسقا دا قۇجاتتاردى ازىرلەۋ كوزدەلىپ وتىرعانىن جەتكىزدى. سونىمەن قاتار مەملەكەتتىك ورگاندار قۇقىقتىق مونيتورينگ ناتيجەلەرىنىڭ نەگىزىندە بىرقاتار زاڭ جوبالارىن ازىرلەۋدى جوسپارلاپ وتىر.
جالپى, جوسپار جوباسىندا 29 زاڭ جوباسىن ازىرلەۋ قاراستىرىلعان. م.بەكەتاەۆ جوسپار جوباسىن قالىپتاستىرۋ كەزىندە زاڭ جوبالارىن وسى جىل ىشىندە پارلامەنتتىڭ قاراۋىنا ەنگىزۋ قاجەتتىگى ەسكەرىلگەنىن ايتتى. ماسەلەن, 2019 جىلدىڭ ءى جارتىجىلدىعىندا پارلامەنتكە – 16, ال ءىى جارتىجىلدىقتا 13 زاڭ جوباسىن ەنگىزۋ جوسپارلانۋدا.
«جوسپاردىڭ جوباسى زاڭ جوبالاۋ قىزمەتى ماسەلەلەرى جونىندەگى ۆەدومستۆوارالىق كوميسسيانىڭ وتىرىسىندا تالقىلاندى. ۇكىمەتتىك ەمەس ۇيىمداردىڭ ۇسىنىستارى ەسكەرىلدى. جوسپاردا كوزدەلگەن زاڭ جوبالارى بويىنشا ءتۇسىندىرۋ جۇمىستارىن ونى قابىلداعاننان كەيىن مەملەكەتتىك ورگاندار جۇرگىزەتىن بولادى», دەدى مينيستر.
ۇكىمەت باسشىسى زاڭ جوبالارىنىڭ تىڭعىلىقتى جانە كەشىكتىرىلمەي ازىرلەنۋى جونىندە ءتيىستى تاپسىرمالار بەردى.
سۇڭعات ءالىپباي,
«ەگەمەن قازاقستان»
