باتىس قازاقستان وبلىسىنىڭ اكىمى التاي كولگىنوۆ وڭىردەگى ءىرى كاسىپورىن باسشىلارىمەن كەزدەسۋى كەزىندە كومپانيا باسشىلارى مەملەكەت باسشىسىنىڭ باستاماسىن قولدايتىنىن جەتكىزىپ, ەڭ تومەنگى جالاقى الاتىن قىزمەتكەرلەرىنىڭ ەڭبەكاقىسىن كوتەرۋ تۋرالى شەشىم قابىلدانعانىن اتاپ ءوتتى. ولاردىڭ ىشىندە «زەنيت», «ورال ترانسفورماتور زاۋىتى», «گيدروپريبور», «ۋرالسكاگرورەمماش», «كوندەنسات», «سترويكومبينات», «جەلاەۆ نان ونىمدەرى كومبيناتى, «ۋپتك», «كۆانت» جشس, «بەلەس-اگرو», «زەنيتتەحسەرۆيس», «جايىقاگرو-لتد», ورال كىرپىش زاۋىتى, ورال مەحانيكالىق زاۋىت جانە ت.ب. ءىرى كاسىپورىندار بار.
بۇل كاسىپورىنداردا جالاقى عانا ءوسىپ قويمايدى. كومپانيا باسشىلارى جۇمىسشىلاردىڭ الەۋمەتتىك جاعدايىن جاقسارتۋعا, ادامي كاپيتالدى دامىتۋ بويىنشا ينۆەستيتسيا قۇيۋعا ەرەكشە كوڭىل ءبولىنىپ جاتقانىن اتاپ ءوتتى.
- ءبىز ارقاشان مەملەكەتتىڭ قولداۋىن كورىپ كەلەمىز. مەملەكەتتىك تۇرعىن ءۇي باعدارلامالارى ارقاسىندا تۇراقتى تاپسىرىس بار. بۇگىندە ءبىزدىڭ ۇجىمدا 400-دەن استام جۇمىسشى قىزمەت ەتەدى. ءبىز ەلباسى باستاماسىن تولىق قولدايمىز جانە ەڭ تومەنگى جالاقى الاتىن جۇمىسشىلارعا تاعى 10-15% كوتەرۋ تۋرالى شەشىم قابىلدادىق, - دەدى ورال كىرپىش زاۋىتىنىڭ ديرەكتورى مۇحامەدجان كەنجەعۇلوۆ.
ورال ترانسفورماتور زاۋىتىندا دا 250-دەن استام ادام ءۇش اۋىسىمدا قىزمەت ەتەدى. مۇندا ورتاشا جالاقى 170-180 تەڭگە شاماسىندا. كاسىپورىن تاۋارى نەگىزىنەن ەكسپورتقا باعىتتالعان. زاۋىت ديرەكتورى اقجول ساۋرانباەۆ ەڭ از جالاقى الاتىن قىزمەتكەرلەرىنىڭ ايلىعىن قازىرگى 70 مىڭ تەڭگەدەن 10-15 پايىزعا كوتەرۋگە شەشىم قابىلدانعانىن حابارلادى. ء«بىزدىڭ زاۋىتتا 100 ستۋدەنت دۋالدى ءبىلىم جۇيەسىمەن قامتىلعان. ءوندىرىس كولەمىن ۇلعايتۋدى جوسپارلاپ وتىرمىز, بۇل ءوز كەزەگىندە جالاقىنىڭ وسۋىنە سەپتىگىن تيگىزەدى», - دەيدى ترانسفورماتور زاۋىتىنىڭ ديرەكتورى. ايتا كەتەيىك, زاۋىت ءونىمىنىڭ 95%-ى ەكسپورتقا, تمد ەلدەرىنە شىعارىلادى. ديرەكتوردىڭ ايتۋىنشا, جاڭا جىلدا زاۋىتتا جاڭا تسەح اشىلىپ, 110 ادامعا جۇمىس ورنى پايدا بولماق. كاسىپورىن بيىل جىل سوڭىنا دەيىن 7 مىڭ, كەلەر جىلى 12 مىڭ ترانسفورماتور شىعارۋدى كوزدەپ وتىر ەكەن.
- زاۋىت باسشىلىعى جاستاردى قولداۋ باعىتىندا الەۋمەتتىك مىندەتتەمە قابىلداپ, جۇيەلى جۇمىس جۇرگىزىپ كەلەدى. مىسالى, زاۋىتتا قىزمەت ەتەتىن قىز بەن جىگىت ۇيلەنەتىن بولسا, ولارعا 500 مىڭ تەڭگە كوتەرمە سىياقى بەرەمىز. ال زاۋىت قىزمەتكەرىنىڭ وتباسىندا دۇنيەگە كەلگەن ءسابي ءۇشىن وسى كەزگە دەيىن 150 مىڭ تەڭگە قارجىلاي قولداۋ كورسەتەتىنبىز. ەندى ونىڭ مولشەرىن 250 مىڭ تەڭگەگە كوتەردىك. جالپى, ءبىزدىڭ زاۋىت ۇجىمىنىڭ ورتاشا جاسى – 28. سوندىقتان دا جوعارىدا ايتىلعان قولداۋ-كومەك ءاربىر قىزمەتكەرىمىز ءۇشىن ماڭىزدى دەپ ويلايمىز, - دەيدى اقجول ساۋرانباەۆ.
وڭىردەگى ءىرى كاسىپورىننىڭ ءبىرى – «جەلاەۆ نان ونىمدەرى كومبيناتى» اق ۇجىمىندا 560 ادام ەڭبەك ەتەدى. ولاردىڭ ورتاشا ايلىق جالاقىسى - 95 مىڭ تەڭگە شاماسىندا. اق ديرەكتورى ەدۋارد فەدورچەنكو الداعى 2019 جىلدى كۇتپەي-اق تابىسى ەڭ تومەن جۇمىسشىلاردىڭ جالاقىسىن 10%-عا كوتەرۋگە شەشىم قابىلدانعانىن حابارلادى. قازىر كومبيناتتاعى ەڭ تومەنگى جالاقى مولشەرى - 50 مىڭ تەڭگە. ونى 26 ادام الادى.
قورعانىس سالاسى مەن شەكارا كۇزەتىنىڭ تاپسىرىستارىن ورىنداپ جۇرگەن بەلگىلى ورالدىق «زەنيت» زاۋىتىندا 822 ادام قىزمەت ەتەدى, ولاردىڭ بۇگىنگى ورتاشا ايلىعى 125 مىڭ تەڭگە. «دەگەنمەن, ءبىزدىڭ ۇجىمدا 29 ادام ەڭ از جالاقى – ايىنا 51 مىڭ تەڭگە الادى. ءبىز 2019 جىلدىڭ باسىنان زاۋىت بارلىق ۇجىمىنا 10 پايىز وسىرەمىز, ال ەڭ از جالاقى مولشەرى 57 مىڭ بولماق. ارينە, مەملەكەت تاراپىنان تاپسىرىس بولسا, ءالى دە كوتەرۋگە مۇمكىندىك بار, - دەيدى «زەنيت» زاۋىتىنىڭ باس ديرەكتورى ۆياچەسلاۆ ۆاليەۆ.
«ەڭ تومەنگى ايلىق مولشەرىن ءوسىرۋ» دەپ اتالاتىن جاڭا باستامانىڭ ناتيجەسىندە باتىسقازاقستاندىق كاسىپورىنداردىڭ 1500-دەن استام جۇمىسشىسى ەندى ايىنا 65-70 مىڭعا دەيىن ۇلعايادى دەپ كۇتىلۋدە.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان
