اۋىلدىق اۋماقتاردى تاراتۋ ءبولىمىنىڭ جەتەكشىسى جانار احميەۆانىڭ ايتۋىنشا, بىلتىر ءتورت اۋىلدىڭ تۇرعىندارى باسقا جەرلەرگە كوشىرىلسە, بيىل بولاشاعى بۇلدىر اۋىلداردىڭ سانى 10 ەسەگە كوبەيگەن.
«قازاقستان رەسپۋبليكاسىنىڭ اكىمشىلىك-اۋماقتىق ورنالاسۋى تۋرالى» زاڭنىڭ 3-ءشى بابى 4-ءشى تارماعىنا سايكەس تۇرعىندار سانى 50-دەن اسپايتىن اۋىلدار جاقىن ماڭايداعى ەلدى مەكەندەردىڭ قۇرامىنا قوسىلادى. وبلىستا وسىنداي 103 اۋىل بار. ولاردىڭ 17-ءى شەكارا ماڭىندا ورنالاسقان. اۋىلدا ءبىر تۇرعىن قالسا دا, ەلەكتر قۋاتىنان اجىراتىلمايدى», دەيدى ج. احميەۆا.
جەرگىلىكتى اتقارۋشى ورگاندار ەلدى مەكەندەرگە الەۋمەتتىك-ەكونوميكالىق دامىتۋ مونيتورينگىن جۇرگىزىپ, كەلەشەگى جوق اۋىلداردى انىقتاعان. سوعان وراي ادامدار سانى 10-نان اسپايتىن 38 ەلدى مەكەندى تاراتۋ جۇمىستارى جۇرگىزىلۋدە. بۇلارداعى 153 تۇرعىننىڭ ۇشتەن بىرى–زەينەتكەرلەر مەن بالالار. كەلەشەگى جوق دەپ تانىلعان اۋىلداردا مەكتەپ, اۋرۋحانا جۇمىس ىستەمەيدى. 5 اۋىلعا اۋىز سۋ تاسىپ جەتكىزىلەدى. 33 اۋىل ورتالىقتاندىرىلماعان سۋ جۇيەسىن تۇتىنادى.
جۋىردا قوعامدىق كەڭەستە 15 اۋىلدىڭ جايى قارالىپ, ۇسىنىس وبلىستىق ماسليحاتقا جىبەرىلدى. سولاردىڭ ءبىرى ەسىل اۋدانى كالينوۆكا اۋىلىندا 6 ادام تىرشىلىك ەتەدى. كەزىندە مۇندا 300 تۇرعىن بولىپتى. قىزىلجار اۋدانى يانتسەنو اۋىلىندا ءبىر عانا وتباسى ءتۇتىن تۇتەتىپ وتىر.
الايدا, ادامدار كىمنىڭ ەسەبىنەن كوشىرىلەدى دەگەن ساۋالدىڭ باسى اشىق كۇيىندە قالىپ وتىر. بۇل ماقسات ءۇشىن جەرگىلىكتى قازىنادان قاراجات قاراستىرىلماعان. باسپانا ساتىپ الۋ, ءارلى-بەرلى جول شىعىندارىن كوتەرۋگە ونسىز دا تۇرمىسى جۇدەۋ, كوڭىلى تۇسىڭكى تۇرعىندار قاۋقارسىز. بۇل مىندەت اۋداندىق اكىمدىكتەرگە جۇكتەلگەنمەن, ولار دا شاراسىز.
ەندىگى بار ۇمىت–ۇكىمەتتە. ايتپەسە, شىقپا جانىم شىقپامەن ازەر كۇن كورىپ وتىرعان اۋىلدىقتار ەسكى جۇرتتىڭ ورنىن سيپاپ وتىرا بەرۋگە ءماجبۇر.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
