وسىعان وراي ە.ومىرزاقوۆ اتىنداعى وبلىستىق فيلارمونيادا ەسكە الۋ كەشى ءوتتى. وندا جينالعان جۇرت الدىمەن تەلەجۋرناليست گۇلجىبەك باەكەنوۆا جاساعان, «كامشات دونەنباەۆا: يا ك تەبە پريشلا, پولە!» اتتى دەرەكتى ءفيلمدى تاماشالادى. فيلمدە قاراپايىم ەڭبەك ادامىنان قوعام قايراتكەرلىگىنە دەيىن كوتەرىلگەن, قازاقتىڭ ماقتانىشى كامشات دونەنباەۆانىڭ ءومىر جولى ايشىقتى باياندالادى. مۇنان كەيىن وبلىس اكىمى ارحيمەد مۇحامبەتوۆ كامشات اپامىزدىڭ ەڭبەك جولى دا, ءومىر جولى دا جاس ۇرپاققا ۇلگى-ونەگە ەكەنىن ايتتى.
«كامشات بايعازىقىزىنىڭ ورامالى قانداي اق بولسا, كوڭىلى دە, جۇرەگى دە سونداي اپپاق ادام ەدى. ول اۋىرىپ جۇرگەننىڭ وزىندە وبلىستاعى قوعامدىق جۇمىستاردان قالماي قاتىسىپ وتىردى. ءبارىمىز دە بالا كەزدەن ونىڭ اتىنا قانىق بولدىق. مەن وبلىسقا 2015 جىلى قىزمەت بابىمەن كەلگەن كەزدە, الدىمەن اپامىزعا سالەم بەرىپ, باتاسىن العان ەدىم. ول تەك وبلىستىڭ عانا ەمەس, ەلىمىزدىڭ ماقتانىشىنا اينالدى. كامشات بايعاقىزىن ماڭگى ەستە قالدىرۋ ءۇشىن وبلىستا ءبىرشاما ىستەر جاسالدى. كوشەنىڭ اتى بەرىلدى, جاقىندا ءمۇسىنى قويىلاتىن گۇلزار اشىلادى, كوللەدج كامشات اپامىزدىڭ اتىمەن اتالادى, كاچار كەنتىندەگى مەشىت تە كامشات انا اتىندا», دەدى ارحيمەد بەگەجان ۇلى.
كەشكە الماتىدان ارنايى كەلگەن سوتسياليستىك ەڭبەك ەرى, مەملەكەت جانە قوعام قايراتكەرى ۆەرا سيدوروۆا تەبىرەنە سويلەدى.
«كامشاتتىڭ ەڭبەك ەتكەن جىلدارىنىڭ, دەپۋتات بولعان كەزىنىڭ كۋاگەرىمىن. مەن ول كەزدە اۋدانداردا باسشىلىق قىزمەتتە بولدىم. كامشات ەڭبەكتىڭ, ونىڭ ىشىندە اۋىل شارۋاشىلىعىنداعى اۋىر ەڭبەكتىڭ بەدەلىن كوتەرگەن ادام. تراكتور ايداۋ ايەل ادامعا ەشقانداي وڭاي جۇمىس ەمەس ەدى. كامشاتتىڭ ءۇن قاتۋىمەن ەلدە قىزدار تراكتورعا وتىرا باستادى. سوندا پارتيانىڭ وبلىستىق كوميتەتىنىڭ حاتشىسى حابارلاستى, «نەگە قىزدار تراكتورعا وتىرماي جاتىر, از عوي؟» دەيدى. سوندا مەن الگى كىسىگە: ء«سىز ءوز قىزىڭىزدى تراكتورعا وتىرعىزار ما ەدىڭىز؟» دەگەن ەدىم, ول ءۇنسىز قالدى, – دەدى ۆەرا ۆاسيلەۆنا.
كەشتە ەستەلىكتەردەن قۇراستىرىلعان «كامشات» اتتى كىتاپتىڭ تۇساۋكەسەرى ءوتتى. ونى كامشاتتىڭ كەلىنى اقمارال جاقسىباەۆا, قازاق رەداكتسياسىن جۋرناليست قىدىربەك قيىسقان, ورىس رەداكتسياسىن باسپاگەر ۆالەنتينا زاحارچەنكو جاسادى. ل.توستوي اتىنداعى امبەباپ كىتاپحانا كامشات بايعازىقىزى تۋرالى ماقالالار شىققان ءار جىلدارعى بۇقارالىق اقپارات قۇرالدارىنىڭ كورمەسىن ۇيىمداستىردى.
كەشتە كامشات اپايدىڭ تەك ەڭبەك ادامى, قوعام قايراتكەرلىگى عانا ەمەس, ول كىسىنىڭ يماندىلىقتى تۋ ەتىپ ۇستاعان, وتباسىنىڭ ۇيتقىسى بولعان ادامگەرشىلىگى دە ءسوز بولدى.
«كامشات سونشا داڭققا بولەنسە دە قاراپايىمدىلىعىنان اسىپ كەتكەن جوق. ءبىر ادامنىڭ الدىنان كەسىپ وتپەيتىن. نامازىن قازا ەتكەن جوق. قاجىعا بارىپ كەلگەندە باسىنان وتكەن عاجاپ وقيعانى ايتىپ ەدى. مەككەدە جۇرگەندە ءبىر قۇيىن تۇرادى دا, كامشاتتىڭ باسىنان جاۋلىعىن الىپ كەتەدى. كامشات: «بۇل نە بولدى؟ ەندى جالاڭباس قالاي جۇرەمىن, اللاعا نە جازدىم ەكەن؟» دەپ قامىعىپ تۇرعاندا, سالدەن سوڭ تاعى ءبىر رەت قۇيىن كوتەرىلەدى دە, كامشاتتىڭ جاۋلىعىن قايتا اكەلىپ تاستايدى». كامشات اللانىڭ سۇيگەن ق ۇلى دەپ بىلەمىن» دەدى وبلىستىق ارداگەرلەر كەڭەسىنىڭ توراعاسى كەنجەبەك ۇكين.
كەشتە كامشات اپاعا ارنالعان قوس ءاننىڭ دە تۇساۋى كەسىلدى. سونىمەن قاتار ءى.وماروۆ اتىنداعى وبلىستىق قازاق دراما تەاترىندا ءجۇرىپ جاتقان اقىلبەك شاياحمەتتىڭ پەساسى بويىنشا قويىلعان «ەڭبەك ەرلەرى» اتتى سپەكتاكلىنەن ءۇزىندى كورسەتىلدى.
كەشتەن كەيىن اس بەرىلىپ, كامشات اپاعا رۋحىنا قۇران باعىشتالدى.
ءنازيرا جارىمبەت,
«ەگەمەن قازاقستان»
قوستاناي
