ەلباسى «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىندا الداعى ۋاقىتتا مۇمكىندىگى شەكتەۋلى تۇلعالارعا ارنالعان «كەدەرگىسىز ورتا» قالىپتاستىرۋعا زور ءمان بەرىلۋى تيىستىگىن ايتتى.
وسى رەتتە «نۇر وتان» پارتياسىنىڭ بىرنەشە جىل بويى «كەدەرگىسىز كەلەشەك» الەۋمەتتىك جوباسىن جۇزەگە اسىرىپ كەلە جاتقانىن اتاپ وتكەن ءجون. پارتيا قىزمەتىن جاڭعىرتۋ اياسىندا بۇل جوبا ودان ءارى جاندانىپ, جەتىلە ءتۇستى. وسىنداي يگى باستامالار ارقىلى نۇروتاندىقتار مۇمكىندىگى شەكتەۋلى جاندار مەن ەرەكشە قاجەتتىلىكتەردى تالاپ ەتەتىن ازاماتتاردىڭ ءومىر ءسۇرۋ ساپاسىن جاقسارتۋدى كوزدەيدى.
اشىلۋ راسىمىندە بارشا قاتىسۋشىلاردى قۇتتىقتاپ, ولارعا ساتتىلىك تىلەگەن «نۇر وتان» پارتياسى توراعاسىنىڭ ءبىرىنشى ورىنباسارى سپورتشىلاردىڭ وسىنداي دودالارعا قاتىسۋىنىڭ ءوزى تەك وزدەرى ءۇشىن عانا ەمەس, اتا-انالارى مەن تۋعان-تۋىستارى ءۇشىن دە, جالپى قوعامىمىز ءۇشىن دە ۇلكەن جەڭىس ەكەنىن ايتتى. سونداي-اق ول مۇمكىندىگى شەكتەۋلى جاندارعا قولداۋ كورسەتۋ پارتيانىڭ نەگىزگى باسىمدىقتارىنىڭ ءبىرى ەكەنىن تىلگە تيەك ەتتى.
– سوڭعى جىلدارى ەلىمىزدە وسى باعىتتا اۋقىمدى جۇمىستار اتقارىلىپ, كوپتەگەن يگى باستامالار جۇزەگە اسىرىلۋدا. تاياۋدا عانا ەلباسىمىز ءوزىنىڭ جولداۋىندا مۇمكىندىگى شەكتەۋلى تۇلعالارعا ارنالعان كەدەرگىسىز ورتا قالىپتاستىرۋ جونىندە تاعى دا ناقتى تاپسىرمالار بەردى. وسىعان وراي پارتيامىز «كەدەرگىسىز كەلەشەك» جوباسىن جاڭا دەڭگەيگە كوتەرىپ, جەتىلدىرۋدە. بۇل جوبانى جۇزەگە اسىرۋ بارىسىندا ءبىز ناقتى ءتورت باسىمدىقتى انىقتادىق. بىرىنشىدەن, مۇمكىندىگى شەكتەۋلى جاندارعا ارنالعان كەدەرگىسىز ورتا قالىپتاستىرۋ. ەكىنشىدەن, ولاردىڭ ينكليۋزيۆتى ءبىلىم الۋلارىنا ىقپال ەتۋ. ۇشىنشىدەن, جۇمىسقا ورنالاسۋلارىنا قولداۋ كورسەتۋ. تورتىنشىدەن, مۇمكىندىگى شەكتەۋلى جانداردىڭ قوعامدىق-ساياسي ومىرگە بەلسەندى قاتىسۋىن قامتاماسىز ەتۋ. بۇگىندە وسى باعىتتار بويىنشا ناقتى ءىس-شارالار قولعا الىنىپ, ءتيىستى جۇمىستار باستالىپ كەتتى, – دەدى ماۋلەن اشىمباەۆ.
سونىمەن قاتار پارتيا توراعاسىنىڭ ءبىرىنشى ورىنباسارى مۇنداي سپارتاكيادالاردىڭ ماقساتى جەڭىمپازدى انىقتاۋ ەمەس, قايتا ءومىر قۇندىلىقتارىن دارىپتەپ, رۋحى مىقتى جاندارعا قۇرمەت كورسەتۋ, توزىمدىلىكتى, قاجىرلىقتى, تاباندىلىقتى ناسيحاتتاۋ ەكەنىن ايتتى.
ودان بولەك, ماۋلەن اشىمباەۆ اشىلۋ سالتاناتىنا قازاقستان پاراليمپيادا قۇراماسىنىڭ مۇشەلەرى كەلگەنىنە نازار اۋدارىپ:
– بۇگىنگى سايىسقا وسى قازان ايىندا يندونەزيادا وتكەن پارازيادا ويىندارىندا ەلىمىزدىڭ نامىسىن ابىرويمەن قورعاعان كاسىبي سپورتشىلاردىڭ ارنايى قاتىسۋى ۇلكەن ماڭىزعا يە. سەبەبى, مۇنداي قادام قاشاندا جاس سپورتشىلاردىڭ ىنتاسىن وياتىپ, جىگەرىن جاني تۇسەدى, – دەدى.
سونداي-اق «نۇر وتان» پارتياسى توراعاسىنىڭ ءبىرىنشى ورىنباسارى الەۋمەتتىك سالا قىزمەتكەرلەرى كۇنىنە وراي بىرقاتار ماماندى كاسىبي مەرەكەلەرىمەن قۇتتىقتاپ, پارتيانىڭ اتىنان العىس حاتتارمەن ماراپاتتادى. ول ءوز سوزىندە الەۋمەتتىك سالا قىزمەتكەرلەرىنىڭ ەڭبەگى قايىرىمدىلىقتىڭ, مەيىرىمدىلىكتىڭ, ىزگىلىكتىڭ ۇلگىسى ەكەنىن ايتتى.
سپارتاكيادا «نۇر وتان» پارتياسىمەن بىرگە استانا قالاسى اكىمدىگىنىڭ, «تەڭ مۇمكىندىكتەر الەمى» مۇمكىندىگى شەكتەۋلى بالالارى بار اتا-انالار قوعامىنىڭ, «بوچچا» پاراليمپيادالىق سپورت فەدەراتسياسىنىڭ, «جىگەر» سپورت كلۋبىنىڭ جانە «كاسپي» سپورتتى دامىتۋ قورىنىڭ ۇيىمداستىرۋىمەن وتكىزىلدى. سايىسقا 200-دەن استام سپورتشى قاتىسىپ, ۇستەل تەننيسى, توعىزقۇمالاق, وتىرىپ وينايتىن ۆولەيبول, «64» دويبىسى, پاۋەرليفتينگ, گولبول, بوچچا جانە شاحماتتان سىنعا تۇسۋدە.
سونىمەن قاتار سپارتاكيادا اياسىندا «بوچچا» پاراليمپيادالىق سپورت فەدەراتسياسىنىڭ رەسمي تۇردە اشىلعانىن اتاپ وتكەن ءجون. بۇل سپورت تىرەك قيمىل اپپاراتى بۇزىلعان, دتسپ اۋرۋىنىڭ ەڭ اۋىر تۇرىنە شالدىققان جاندارعا سپورتتىق باسەكەلەردە باق سىناۋعا مۇمكىندىك بەرەتىن سايىس تۇرلەرىنىڭ ءبىرى. بوۋلينگ پەن پەتانكا سياقتى بوچچا دا دوپپەن وينالاتىن كوماندالىق سايىس. ول ويىنشىلاردى دالدىككە, شيراقتىققا باۋليدى.
ايتا كەتەيىك, سپارتاكيادا پاراليمپيادالىق جاتتىعۋ ورتالىعىندا ءوتتى. بۇل بىرەگەي سپورت كەشەنىنىڭ زالدارى تولىقتاي مۇمكىندىگى شەكتەۋلى جاندارعا ارنالىپ جابدىقتالعان. نىسان قازاقستان رەسپۋبليكاسى ۇلتتىق پاراليمپيادالىق كوميتەتىنىڭ باستاماسىمەن سالىندى. مۇندا امبەباپ, بەيىمدەلگەن جاتتىعۋ زالى, سپورت ويىندارىنا ارنالعان بولەك زال جانە جەكپە-جەك زالى بار.
بۇگىندە باس قالامىزدا 382 مۇمكىندىگى شەكتەۋلى تۇلعا بەيىمدەلگەن سپورت تۇرلەرىمەن تۇراقتى تۇردە اينالىسسا, سونداي سپورت ۇيىرمەلەرىنە كەلەتىن بالالار سانى – 145.
