از عانا ۋاقىتتىڭ ىشىندە بۇل ساياباق ادام تانىماستاي وزگەرىپ, جاڭاشا سيپات الدى. بۇگىنگى قالا كۇنى مەرەكەسى قارساڭىندا حالىق قاھارمانى قايرات رىسقۇلبەكوۆ اتىنداعى ساياباق ەل يگىلىگىنە بەرىلدى. بۇل كۇنى ءبىرتۋار پەرزەنتىنىڭ رۋحىمەن قايتا قاۋىشقان كوپشىلىك ساياباققا كوپتەپ جينالدى. ناقاقتان شاھيت كەتكەن باتىردىڭ رۋحىنا تاعزىم ەتىپ, قاھارماننىڭ قايتا جاڭعىرتىلعان ەسكەرتكىشىنە گۇل شوقتارىن قويدى.
جيىن بارىسىندا جازۋشى, جامبىل وبلىسىنىڭ قۇرمەتتى ازاماتى ەلەن ءالىمجان, «پاتريوتتىق قوزعالىس «جەلتوقسان اقيقاتى» رەسپۋبليكالىق قوعامدىق بىرلەستىگىنىڭ مۇشەسى مۇرات بەرداليەۆ جانە قايرات رىسقۇلبەكوۆتىڭ اپكەسى گۇلنار رىسقۇلبەكوۆا ءسوز سويلەپ, قايراتتاي قايراتتى ەردىڭ ءومىر جولىنداعى ەرلىك ساتتەرىنە توقتالدى. جەلتوقسان وقيعاسىنىڭ ناقاق قۇربانىنا اينالىپ كەتە بارعان باتىر تۋرالى ەستەلىكتەر ايتىلدى.
قايرات رىسقۇلبەكوۆ ەسكەرتكىشىنىڭ اشىلۋ سالتاناتىنان سوڭ قوناقتار ساياباق ىشىنەن اشىلعان «جەلتوقسان-86» ورتالىعىندا بولدى. قالا قوناقتارى مەن تۇرعىندارى قايتا جاڭعىرتۋدان وتكەن قايرات رىسقۇلبەكوۆ ساياباعىن تاماشالادى. بۇگىندە ساياباقتىڭ جالپى اۋماعى التى جارىم گەكتاردى قۇرايدى. جالپى سمەتالىق قۇنى 403,9 ميلليون تەڭگەنى قۇرايتىن ساياباقتىڭ ەسكيزدىك جوباسىن «تابىس جوبا» جاۋاپكەرشىلىگى شەكتەۋلى سەرىكتەستىگى ازىرلەگەن.
ساياباقتاعى قايرات رىسقۇلبەكوۆ ەسكەرتكىشىنىڭ ءوزى نازار اۋدارارلىق. قايمىقپاي جالىنعا قارسى جۇگىرگەن باتىر بەينەسى كوپشىلىكتى تەبىرەنتپەي قويماسى انىق. ال ساياباق كىرەبەرىسىندە جازىلعان باۋىرجان مومىش ۇلى, شەرحان مۇرتازا, مۇحتار شاحانوۆ, قايرات رىسقۇلبەكوۆ سياقتى الىپ تۇلعالاردىڭ ناقىل سوزدەرى دە ەلىمىزدىڭ ۇلى مۇراتىن ايعاقتاپ تۇرعانداي. سونىمەن قاتار, بۇگىن اتالعان ساياباق ىشىنەن «جەلتوقسان-86» ورتالىعى, «تاۋەلسىزدىك ۇشقىنى» اللەياسى, قايتا جاڭعىرتۋدان وتكەن «ارداگەرلەر ءۇيى», «عيبرات» ورتالىعى جانە «شاحمات» الاڭى اشىلىپ, ەل يگىلىگىنە بەرىلدى. بۇدان بىلاي تارازدىقتار مەن قالا قوناقتارى قايرات رىسقۇلبەكوۆ ساياباعىنا كەلىپ, وسىنداي كەرەمەتتەردى تاماشالاي الادى.
حاميت ەسامان,
«ەگەمەن قازاقستان»
جامبىل وبلىسى
