سۋرەتتى تۇسىرگەن الەكساندر كۋپريەنكو
«قاراشىعاناق پەترولەۋم وپەرەيتينگ بۆ» كومپانياسىنىڭ قارجىسىنا بوي كوتەرگەن سپورت عيماراتىنىڭ الاڭى 3056,7 شارشى مەتر, جالپى اۋدانى 13 597,3 شارشى مەتردى قۇرايدى. كەشەن قۇرىلىسى 2017 جىلدىڭ شىلدە ايىندا باستالىپ, 2018 جىلدىڭ شىلدە ايىندا اياقتالدى. جوبا قۇنى - 321,6 ملن تەڭگە.
«وڭىرلىك دەڭگەيدەگى رەزەرۆتەردى تاۋىپ, بۇقارالىق سپورت پەن دەنە شىنىقتىرۋدىڭ قولجەتىمدىلىگىن ارتتىرۋ قاجەت. ۇكىمەتكە جانە اكىمدەرگە كەم دەگەندە 100 دەنە شىنىقتىرۋ-ساۋىقتىرۋ كەشەنىن سالۋدى تاپسىرامىن. سونداي-اق, قولدانىستاعى, اسىرەسە مەكتەپتەردەگى سپورت عيماراتتارىن ءتيىمدى پايدالانىپ, دەنە شىنىقتىرۋمەن اينالىسۋ ءۇشىن اۋلالاردى, پاركتەردى, ساياباقتاردى جابدىقتاۋ قاجەت» دەگەن ەدى ەلباسى «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىندا.
- بۇل – ءدال پرەزيدەنت تاپسىرعانداي, اۋىلدىق جەردە اشىلعان دەنە شىنىقتىرۋ جانە ساۋىقتىرۋ كەشەنى. جولداۋدا مۇنداي قۇرىلىستار ەلدىمەكەننىڭ بولاشاعىن, تۇرعىندار سانىن ەسكەرىپ سالىنسىن دەلىنگەن. ءبورلى – بولاشاعى بار اۋىل. مۇنداعى جەرگىلىكتى مەكتەپتە 550 وقۋشى, اگروتەحنيكالىق كوللەدجدە 300 ستۋدەنت وقيدى. كەشەندە ءداستۇرلى سپورت تۇرلەرى دە, باسكەتبول, فۋتبول, ۆولەيبول ۇيىرمەلەرى دە بولادى. سونداي-اق مۇندا وبلىستا تۇڭعىش رەت قىسقى سپورت تۇرلەرىنەن – دوپتى حوكككەي مەن شاڭعىدان شاكىرت دايىندايدى. بۇرىن دوپتى حوككەي كومانداسىندا ويناعان ازامات ماجىك ءبورلى اۋىلىنا جاتتىقتىرۋشى بولىپ اتتاندى, وعان قىزمەتتىك پاتەر بەرىلدى. وسىنىڭ ءبارى جەرگىلىكتى بيلىك تاراپىنان كورسەتىلىپ جاتقان ۇلكەن قولداۋ عوي, - دەيدى باتىس قازاقستان وبلىستىق سپورت باسقارماسىنىڭ باسشىسى ءاسيا امانباەۆا.
ەلباسىمىزدىڭ وڭىرلەردە بۇقارالىق سپورتتى دامىتۋ تۋرالى تاپسىرماسى اق جايىق وڭىرىندە قارقىندى جۇزەگە اسىرىلىپ جاتىر. 2018 جىلدىڭ 9 ايىندا جەرگىلىكتى بيۋدجەت ەسەبىنەن ورال قالاسى مەن اۋدانداردا 28 سپورتتىق الاڭ سالىنعان. جىل سوڭىنا دەيىن تاعى 23 الاڭ سالىنىپ, جالپى سانى 41-گە جەتپەك. ال الداعى ۋاقىتتا «نۇر وتان» پارتياسىمەن بىرلەسىپ وڭىردە 100 جاڭا سپورت الاڭى سالىنۋى جوسپارلانعان.
- سپورتتىق الاڭدار, ستريت-ۋوركاۋت جابدىقتارى شىنىمەن دە بۇقارالىق سپورتتىڭ دامۋىنا ىقپال ەتەدى. اۋىلدا دا, قالادا دا وىنداي الاڭداردىڭ بوس تۇرعانىن كورگەن ەمەسپىن. ەرتەلى-كەش حالىق تولىپ جۇرەدى, - دەيدى ءاسيا راقىمقىزى.
ستاتيستيكاعا كوز سالساق, باتىس قازاقستان وبلىسى تۇرعىندارىنىڭ 27,1%-ى, ياعني 175245 ادام دەنە شىنىقتىرۋ جانە سپورتپەن تۇراقتى شۇعىلدانادى ەكەن. 2018-2019 وقۋ جىلىندا وبلىس مەكتەپتەرىندە ءار ءتۇرلى باعىتتاعى 838 سەكتسيادا 43120 وقۋشى سپورتپەن اينالىسقان. كوللەدجدەردەگى 496 سپورتتىق سەكتسياعا 11728 ستۋدەنت تۇراقتى بارىپ ءجۇر. ءتۇرلى سپورتتىق-كوپشىلىك شارالارعا دا حالىق ىقىلاسپەن قاتىسادى. ماسەلەن, جەڭىس كۇنىنە ارنالعان كوپشىلىك جۇگىرۋگە 1000-عا جۋىق ادام, قازاقستان رەسپۋبليكاسىنىڭ مەملەكەتتىك قىزمەتشىلەر كۇنى مەرەكەسىنە ارنالعان كوپشىلىك جۇگىرۋگە – 600, ەلوردامىز – استانا قالاسىنىڭ 20 جىلدىعىنا ارنالعان «اقجايىق دۋاتلون-2018» جارىسىنا – 500-گە جۋىق قاتىسۋشى قاتىسقان. قازاقستان رەسپۋبليكاسىنىڭ پرەزيدەنتى ن.ءا. نازارباەۆتىڭ جۇلدەسى ءۇشىن باتىس قازاقستان وبلىسىنىڭ VI حالىق سپورتى ويىندارى 200-گە جۋىق اۋەسقوي سپورتشىنىڭ باسىن قوسىپتى.
- ءبىزدىڭ ءوڭىردىڭ گەوگرافيالىق جاعدايى ترياتلون جارىستارىن وتكىزۋگە دە قولايلى. كەلەر جىلى بۇيىرسا ورال قالاسىندا ترياتلون سايىسىن وتكىزۋ جسوپاردا بار. ورالداعى سپورت مەكتەبىنىڭ بىرىندە ترياتلون ءبولىمى دە اشىلدى, - دەيدى باسقارما باسشىسى.
ەسكە سالا كەتەيك, 2018 جىلدىڭ 9 ايىندا بويىنشا باتىس قازاقستان وبلىسى سپورتشىلارى ءتۇرلى رەسپۋبليكالىق جانە حالىقارالىق جارىستاردا (الەم, ازيا, قازاقستان رەسپۋبليكاسىنىڭ چەمپيوناتتارى) 428 مەدال (149 التىن, 118 كۇمىس, 161 قولا) ۇتىپ الدى.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان
