وسى ورايدا, ارى-بەرى ساپىرىلىسىپ جاقتان جولاۋشىلار كونتينگەنتىنىڭ ىشىندە نەبىر تەرىس پيعىلدى پەندەلەر دە از ەمەس. ولار كەدەندىك تەكسەرۋ كەزىندە تاۋارلاردى جاسىرىپ ءوتۋدىڭ نەبىر ادىستەرىن قولدانۋعا تىرىسادى. سەبەبى, قىمبات باعالى كيىمدەردىڭ كەدەندىك باج سالىعىنىڭ ءتاريفى جوعارى بولعاندىقتان, كەدەن زاڭىنا باعىنۋ ونداي ادامدارعا ونشا ءتيىمدى ەمەس. سوندىقتان دا قۋلىقتىڭ قىرىق قالتارىسىن قولدانۋدىڭ نەبىر ادىستەرىن ويلاستىرادى. وسىنداي قىسىلتاياڭ ساتتەردە بىرلەسە ءىس-ارەكەت ەتۋ شارالارى عانا ءتيىمدى ناتيجە بەرەتىنى ءسوزسىز.
جۋىردا, ياعني 22 قازان كۇنى كەزەكتى كەدەندىك تەكسەرۋ كەزىندە تەرىس پيعىلدى كونترابانديستەردىڭ جىمىسقى ارەكەتى كەدەنشىلەردىڭ نازارىنان تىس قالمادى. كەدەنشىلەر مەن شەكارا قىزمەتى جانە «قورعاس» پوليتسيا ءبولىمى قىزمەتكەرلەرىمەن بىرلەسە وتىرىپ ارەكەت ەتۋدىڭ ناتيجەسىندە 70 دانا قىمبات باعالى تەرىلەردەن (نەگىزىنەن قۇندىز) تىگىلگەن سىرت كيىمدەر ۇستالدى. بۇل تۋرالى الماتى وبلىستىق مەملەكەتتىك كىرىستەر دەپارتامەنتى «التىنكول» كەدەن بەكەتىنىڭ ءباسپاسوز قىزمەتى حابار تاراتتى.
قازىرگى ۋاقىتتا ۇستالعان تاۋارلاردىڭ كەدەندىك قۇنىن انىقتاۋ جانە اتالمىش تاۋارلارعا قاتىسى بار ادامداردى جاۋاپكەرشىلىككە تارتۋ ماسەلەلەرى قولعا الىنۋدا.
ايناش ەسالي,
«ەگەمەن قازاقستان»
الماتى
