17-21 قازان ارالىعىندا مادەنيەت جانە سپورت مينيسترلىگى مەن وبلىس اكىمدىگىنىڭ بىرلەسۋىمەن استانا قالاسىنىڭ 20 جىلدىعى اياسىندا ۇيىمداستىرىلعان امىرە قاشاۋباەۆ اتىنداعى رەسپۋبليكالىق فەستيۆالگە 34 جاس ءداستۇرلى ءانشى قاتىستى.
بەس كۇنگە سوزىلعان شارا 17 قازاندا وسكەمەندەگى «يۋبيلەينىي» كينوتەاترىندا «امىرە» كوركەم ءفيلمىنىڭ كورسەتىلىمىنەن باستالدى. كورسەتىلىمگە فيلمدە داڭقتى تۇلعانىڭ ءرولىن ويناعان سانجار ماديەۆتىڭ ءوزى دە استانادان ارنايى كەلدى. ال 18-20 قازان كۇندەرى قازاقستاننىڭ حالىق ءارتىسى قاجىبەك بەكبوسىنوۆ, ونەرتانۋشى, امىرەتانۋشى جارقىن شاكارىم, باقىت ۇدەرباەۆا باستاعان, تولعانباي سەمباەۆ, گۇلميرا سارينا, امانگەلدى كۇزەۋباەۆ, ەربول ايتباەۆ قوستاعان قازىلار القاسى بايقاۋعا كەلگەن قاتىسۋشىلاردىڭ ونەرىن ءۇش كەزەڭ بويىنشا ساراپقا سالدى. «فەستيۆالگە كەلگەن جاستار شاما-شارقىلارىنشا ونەرلەرىن كورسەتتى. ونەرپازداردىڭ ورىنداۋشىلىق دەڭگەيى جاقسى, باسىم كوبى انشىلىك اپپاراتتى مەڭگەرۋگە جۇمىس جاساعانى بايقالىپ تۇر. اتتەڭ-ايى, ءاننىڭ مازمۇنىنا كوڭىل ءبولۋ قالىس قالىپ جاتىر. ارينە, بۇنى جاس انشىلەر بولاشاقتا ەسكەرەدى دەپ ويلايمىن. جالپى, بايقاۋ وتە جوعارى, كاسىبي دەڭگەيدە ۇيىمداستىرىلدى», - دەيدى الماتىداعى قۇرمانعازى اتىنداعى قازاق ۇلتتىق كونسەرۆاتورياسىنىڭ «حالىق ءانى» كافەدراسىنىڭ مەڭگەرۋشىسى, PHD دوكتورى امانگەلدى كۇزەۋباي.
1974 جىلى ماسكەۋدەن ءبىرتۋار ءانشىنىڭ داۋىسىن تاۋىپ, ۇمىتىلىپ بارا جاتقان ونەرپازدى حالقىمەن قايتا قاۋىشتىرعان ونەرتانۋشى جارقىن شاكارىم 1980 جىلدان بەرى ءداستۇرلى تۇردە وتكىزىلىپ كەلە جاتقان امىرە قاشاۋباەۆ اتىنداعى رەسپۋبليكالىق بايقاۋدىڭ بيىلعى وزگەشەلىگى فەستيۆال فورماتىندا ۇيىمداستىرىلعاندىعىندا ەكەندىگىن ايتادى. «ەڭ قۋانىشتىسى, ەستە قالارلىعى, وسكەمەندە امىرەگە ۇلكەن اس بەرىلدى. ءوزىم وسىعان قاتتى قۋاندىم. وسى ءىستىڭ باسى-قاسىندا جۇرگەن مادەنيەت جانە سپورت مينيسترلىگىنە, وبلىستىق مادەنيەت باسقارماسىنا العىسىم شەكسىز. فەستيۆالعا ىشىندە تەنور داۋىستىسى دا, باس داۋىستىسى دا بار, مىقتى-مىقتى قىز-جىگىتتەر كەلدى. اسقار مۇقياتتىڭ داۋىسى قانداي! ءمولدىر, تازا. باۋىرجان نۇرمۇحانوۆتىڭ داۋىسى تەنور ەكەن. قاي ءاندى ايتسا دا, امىرەگە تاقاپ ايتتى. بەرىكبول كوپەن ۇلىنىڭ «اعاشاياق» ءانىن تاماشا ورىندادى. بەرىكبول امىرەنىڭ دوسى عوي. بۇل ءاندى امىرە ونىڭ جانىندا ءجۇرىپ ۇيرەنگەن», - دەيدى ونەرتانۋشى.
ءبىر اپتاعا جۋىق وسكەمەن اسپانىندا ءداستۇرلى اندەردى قالىقتاتقان امىرە قاشاۋباەۆ اتىنداعى رەسپۋبليكالىق فەستيۆال وبلىستىق دراما تەاتردا گالا-كونتسەرتپەن قورىتىندىلاندى. ءوز ەركىمەن, ەركىنەن تىس جينالعان كورەرمەن گالا-كونتسەرتتە فەستيۆال جۇلدەگەرلەرىمەن قاتار استانادان قۇرمەتتى قوناق رەتىندە شاقىرىلعان ءداستۇرلى انشىلەر مەدعات ماناپوۆ, پەريزات تۇراروۆا, ايتبەك نىعىزباەۆ پەن ەرلان رىسقاليدىڭ اۋەلەتە شىرقاعان اندەرىن تىڭدادى. ماراپاتتاۋ راسىمىندە ءسوز العان قازىلار القاسىنىڭ توراعاسى, قازاقستاننىڭ حالىق ءارتىسى قاجىبەك بەكبوسىنوۆ: «ەرەكشە ايتقىم كەلەتىنى, بايقاۋعا قاتىسۋشىلار بۇرىن 9-10 ادامنان اسپايتىن ەدى. وسى جولى فەستيۆالگە 34 جاس ءانشى قاتىستى. ءۇش كۇن بويى سابىلىپ بايقاۋ وتكىزدىك. ونەرپازدار بىرىنەن ءبىرى وتەدى. ولاردىڭ ءداستۇرلى انگە كوڭىل بولگەندەرى, سونى ۇستاپ جۇرگەندەرى قۋانتتى» دەي كەلە فەستيۆالدى ۇيىمداستىرۋشىلارعا العىسىن جەتكىزدى.
سونىمەن, فەستيۆال قورىتىندىسىندا ەكى ءۇشىنشى ورىندى الماتىداعى ت.جۇرگەنوۆ اتىنداعى قازاق ۇلتتىق ونەر اكادەمياسى مەن قۇرمانعازى اتىنداعى قازاق ۇلتتىق كونسەرۆاتورياسىنىڭ ستۋدەنتتەرى دياس مۇراتحان مەن ءبىرجان ايتاحمەتوۆ يەلەنسە, ەكىنشى ورىن باتىس قازاقستان وبلىسى ع.قۇرمانعاليەۆ اتىنداعى وبلىستىق فيلارمونياسىنىڭ ءانشىسى ەرنار ومىرالىگە بۇيىردى. جۇلدەلى 1 ورىندى استاناداعى قازاق ۇلتتىق ونەر ۋنيۆەرسيتەتىنىڭ ستۋدەنتى باۋىرجان نۇرمۇحانوۆ قانجىعالاسا, باس جۇلدە – گران-پريگە (1 ميلليون تەڭگە) الماتىداعى «قازاقكونتسەرت» مەملەكەتتىك كونتسەرتتىك ۇيىمىنىڭ ءانشىسى اسقار مۇقيات لايىق دەپ تابىلدى.
ازامات قاسىم,
«ەگەمەن قازاقستان»
وسكەمەن
