حالىقارالىق مەدياتسيا, مەنەدجمەنت جانە قۇقىق مەكتەبى مەن كوللەدجدەر اراسىندا تۇڭعىش قول قويىلعان كەلىسىمشارت نەگىزىندە ەكىجاقتى تاجىريبە الماسۋ باعىتىندا كوپتەگەن جۇمىستار ىستەلمەك. ەڭ الدىمەن اتالعان كوللەدج بازاسىندا ستۋدەنتتەر مەدياتسياسىنىڭ مەكتەبى اشىلادى.
جيىنعا قاتىسقان مەدياتورلار جاستارعا, اسىرەسە زاڭ سالاسى بويىنشا ءبىلىم الىپ جاتقان ستۋدەنتتەرگە مەدياتسيانى مەڭگەرۋدىڭ ماڭىزدىلىعى زور ەكەنىن ايتتى. «مەدياتسيا ۇلكەن سالا. مەدياتسيا ارقىلى ەكى جاق كەلىسىپ, سوتقا دەيىن ماسەلەنى شەشىپ كەتە الادى. كەزىندە قازاق دالاسىندا ەشقانداي پروكۋرور, ميليتسيا, تۇرمە بولماعان. ونسىز-اق عاسىرلار بويى بەرەكەلى ءومىر ءسۇرىپ كەلگەنبىز. تەك بىتىمگەرشىلىك, كەلىسىم بولعان. قازاق سوزگە توقتاعان حالىق. داۋ بولسا بيلەر مەن قازىلار شەشىپ وتىرعان. مەدياتسيا – داۋ-دامايدى ۋشىقتىرماي, سوتقا دەيىن كەلىسىمگە الىپ كەلۋ. بۇل بىرىنشىدەن, سوتتاردىڭ ءىسىن جەڭىلدەتەدى. ەكىنشىدەن, قوعامداعى ساياسي مورلالدىك احۋال رەتتەلىپ, ادامدار اراسىنداعى كەشىرىمشىلدىك پەن اۋىزبىرشىلىك سياقتى قۇندى قاسيەتتەرىمىز جاندانادى ەسەپتەيمىن. كەلىسىمشارتقا قول قويۋ ارقىلى جاس ماماندارىمىزعا مەدياتسيا جۇيەسىنىڭ نەگىزىن ۇعىندىرۋ جانە ونى دۇرىس پايدالانۋدى ۇيرەتسەك دەگەن نيەتتەمىز. بۇگىنگى باسقوسۋ ستۋدەنتتەر مەن مەدياتورلار اراسىندا عانا وتسە, الداعى ۋاقىتتا ادۆوكاتتار پالاتاسى, جەكە سوت ورىنداۋشىلار پالاتاسى, نوتاريات پالاتاسىمەن دە كەزدەسۋلەر بولادى. سونداي-اق ءبىز مەدياتسيانى فاكۋلتاتيۆتى ءپان رەتىندە كىرگىزۋدى دە جوسپارلاپ وتىرمىز. مەموراندۋم نەگىزىندە ول ساباقتاردى مەدياتسيانىڭ ماماندارى جۇرگىزەتىن بولادى جانە ستۋدەنتتەر تاجىريبەدەن ءوتۋ ءۇشىن مەدياتسيا مەكتەبىنىڭ ءىس-شارالارىنا قاتىسادى», دەدى قازگزۋ گۋمانيتارلىق زاڭ كوللەدجىنىڭ پرەزيدەنتى جومارت قوشقاروۆ.
حالىقارالىق مەدياتسيا, مەنەدجمەنت جانە قۇقىق مەكتەبىنىڭ ديرەكتورى اسەل سايلاۋبايدىڭ ايتۋىنشا, جاستار مەن جاسوسپىرىمدەردى بۇل سالاعا بەيىمدەۋ كوپتەگەن ماسەلەنىڭ وڭتايلى شەشىلۋىنە مۇمكىندىك بەرەدى. «گەرمانيادا مەكتەپتەر مەن كوللەدجدەردە مەدياتسيا قوسىمشا ساباق رەتىندە وقىتىلادى دا, ديپلومىندا كورسەتىلەدى. بۇل ولاردىڭ جۇمىسقا تۇرۋىنا قولايلى. ويتكەنى مەدياتسيانى بىلەتىن ادام قارىم-قاتىناسقا شەبەر, باسقارۋ جۇمىسىن جاقسى اتقارا الاتىن بولادى. ال بولگاريادا ارنايى مەدياتورلار مەكتەبى بار. سونىڭ نەگىزىندە مەن قازاقستاندا مەكتەپ قۇرىپ جاتىرمىن. مەدياتسيا كوپتەگەن سالانى قامتيدى. بۇل سالانى مەڭگەرۋ ءۇشىن جان-جاقتى بولۋ كەرەك. ياعني, قىلمىستىق كودەكستى, ازاماتتىق كودەكستى ءبىلۋ, پسيحولوگيانى مەڭگەرۋ شارت. مەدياتور بولۋ ءۇشىن زاڭ مامانى بولۋ مىندەتتى ەمەس. ءار ادامنىڭ بويىندا مەدياتورلىق قاسيەت بار. مىسالى, اتا-انالار بالالارىنىڭ اراسىنداعى ماسەلەلەردى شەشىپ جاتادى. ەرلى-زايىپتىلاردىڭ اجىراسۋلاردىڭ سەبەبىن انىقتايتىن بولساق, ول تۇككە تۇرعىسىز نارسەدەن باستالادى ەكەن. بىراق سونىڭ بارلىعى جينالىپ كەلىپ اراداعى داۋ-داماي ۋشىعادى دا, نەدەن باستالعانىن ءتىپتى وزدەرى ۇمىتىپ قالىپ جاتادى. سوندىقتان ءبىز كوپتەگەن وتباسىلاردى ساقتاپ قالۋ ءۇشىن دە جۇمىس ىستەيمىز. قازىر ءبىزدىڭ قوعامدا پسيحولوگقا بارۋدى كوپ ادام ءجون سانامايدى. سوندىقتان ولار مەدياتوردىڭ كومەگىنە جۇگىنەدى. ءسويتىپ ءوزارا بىتىمگە كەلىپ, ماسەلەنى وڭ شەشەدى. اسىرەسە مەدياتسيانى بالالارعا, جاستارعا سىڭدىرە بىلگەن دۇرىس», دەيدى مەدياتور ءا.سايلاۋباي.
جيىندا بۇنداي باسقوسۋ ەلورداداعى باسقا كوللەدجەردەدە جالعاسىن تاباتىندىعى ايتىلدى. «قازىرگى كەزدە كوپتەگەن دامىعان مەملەكەتتەردە مادياتسيا وتە جوعارى دەڭگەيدە دامۋدا. ويتكەنى ەكى جاقتى ءبىر-بىرىمەن تاتۋلاستىرۋ ۇلكەن ماسەلەلەردى شەشۋگە جول اشادى. بۇل سالا ءبىزدىڭ ەلىمىزدە دە دامۋ ۇستىندە. جاستارعا مەدياتسيانى ءتۇسىندىرۋ جانە ونى قولدانۋ بويىنشا جۇمىستار اتقارىلىپ جاتىر. ول تەك زاڭ سالاسىندا ءبىلىم الىپ جاتقان ستۋدەنتتەردى عانا ەمەس, ءاربىر جاسقا كەرەك دۇنيە. سوندىقتان استانا قالاسىنىڭ بارلىق كوللەدجدەرىندە مىقتى مەدياتورلار مەن زاڭگەرلەر ءتۇسىندىرۋ جانە تاجىريبە جۇمىستارىن جالعاستىرادى», دەدى «جاس وتان» جاستار قاناتى استانا قالاسى فيليالىنىڭ ءبىرىنشى ورىنباسارى باعداۋلەت جاندىلداەۆ.
ايتا كەتەيىك, ءىس-شارا جوعارعى سوت, قازاقستان حالقى اسسامبلەياسى, «نۇر وتان» پارتياسى جانە استانا قالاسى اكىمدىگى سياقتى بىرنەشە ۇيىمنىڭ ۇيىتقى بولۋىمەن ءوتتى.
مايگۇل سۇلتان,
«ەگەمەن قازاقستان»
