ءىس-شاراعا بۇۇ باس حاتشىسىنىڭ ورىنباسارى جانە قارۋسىزدانۋ ماسەلەلەرى جونىندەگى جوعارى وكىلى يزۋمي ناكاميتسۋ, لاتىن امەريكاسى مەن كاريب باسسەينىندە يادرولىق قارۋعا تىيىم سالۋ جونىندەگى اگەنتتىكتىڭ (OPANAL) باس حاتشىسى لۋيس فيليپە دە ماسەدو سۋارەش, بۇۇ قارۋسىزدانۋ پروبلەمالارىن زەرتتەۋ ينستيتۋتىنىڭ (يۋنيدير) اعا وكىلى دجون بورري, موڭعوليانىڭ بۇۇ جانىنداعى تۇراقتى وكىلى سۋحبولد سۋكحي, سونداي-اق بۇۇ-عا مۇشە-مەملەكەتتەردىڭ باسقا دا جوعارى وكىلدەرى قاتىستى.
جيىنعا قاتىسۋشىلار يادرولىق قارۋسىز ايماقتار جاھاندىق يادرولىق قارۋسىزدانۋ جانە يادرولىق قارۋدى تاراتپاۋ ىسىندە ماڭىزدى ەلەمەنت بولىپ قالا بەرەتىنىن جانە يادرولىق قارۋسىز الەمگە قول جەتكىزۋگە باعىتتالعان حالىقارالىق كۇش-جىگەردىڭ نەگىزى بولۋى ءتيىس ەكەنىن اتاپ ءوتتى.
فورۋم بارىسىندا قازاقستان سىرتقى ىستەر ءمينيسترىنىڭ ورىنباسارى ەرجان اشىقباەۆ يادرولىق قارۋسىز ايماقتار ءبىر-بىرىمەن تىعىز جانە ءتيىمدى ءىس-قيمىلدى جولعا قويعان جاعدايدا ۇلكەن جەتىستىككە جەتە الاتىنىنا توقتالدى. بۇل قارۋسىزدانۋ ماسەلەلەرىن شەشۋدەگى ولاردىڭ ساياسي سالماعىن جانە بەدەلىن ارتتىراتىنى انىق.
قازاقستاندىق ديپلومات: «2017 جىلدىڭ تامىزىندا ماگاتە-ءنىڭ تومەن بايىتىلعان ۋران بانكىنىڭ قازاقستاندا اشىلۋ سالتاناتىندا جاريالانعان يادرولىق قارۋسىز ايماقتاردىڭ كۇش-جىگەرىن نىعايتۋ جونىندەگى قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ باستاماسىنىڭ ءبىزدىڭ ۇجىمدىق كۇش-جىگەرىمىزدى ىسكە اسىرۋداعى وزەكتىلىگى جوعارى», دەپ مالىمدەي وتىرىپ, جوعارى دەڭگەيدەگى ايماقارالىق كەزدەسۋلەردى تۇراقتى ۇيىمداستىرۋدىڭ ماڭىزدىلىعىن اتاپ ءوتتى.
«قازاقستان ايماق اراسىنداعى ءوزارا ارەكەتتەستىكتى كۇشەيتۋ بويىنشا بىرلەسكەن قادامداردى جان-جاقتى تالقىلاۋ ءۇشىن قازىرگى بارلىق يادرولىق قارۋسىز ايماقتاردىڭ جانە موڭعوليانىڭ كوشباسشىلارىن, سونداي-اق وسى سالاداعى كورنەكتى بەلسەندىلەردى شاقىرا وتىرىپ, وسىنداي العاشقى كەزدەسۋدى ءوز اۋماعىندا ۇيىمداستىرۋعا دايىن», دەدى ە.اشىقباەۆ.
ي.ناكاميتسۋ بۇۇ باس حاتشىسىنىڭ قارۋسىزداندىرۋ تۋرالى جاڭا كۇن تارتىبىنە سۇيەنە وتىرىپ, يادرولىق قارۋدان ازات ايماقتاردى نىعايتۋ جانە كۇشەيتۋ, تاياۋ شىعىس سياقتى وڭىرلەردە وسىنداي ايماقتاردى ودان ءارى قۇرۋ ماقساتىندا مۇشە-مەملەكەتتەرمەن جۇمىس ىستەۋگە دايىن ەكەنىن ءبىلدىردى.
سول كۇنى بۇۇ قاۋىپسىزدىك كەڭەسىندە تاياۋ شىعىستاعى جاعداي, ونىڭ ىشىندە پالەستينا ماسەلەسى بويىنشا اشىق پىكىرتالاستار ءوتتى.
ە.اشىقباەۆ پىكىرتالاستاردا سويلەگەن سوزىندە تاياۋ شىعىستاعى وقيعالاردىڭ تۇراقسىزدىعى مەن ءوزارا بايلانىسى تەك وسى وڭىردە عانا ەمەس, سونىمەن قاتار ودان تىس جەرلەردە الاڭداۋشىلىق تۋعىزىپ, جاھاندىق قاۋىپسىزدىككە ەلەۋلى ىقپالىن تيگىزىپ جاتقانىن اتاپ ءوتتى.
ول قازاقستاننىڭ پالەستينانىڭ تاۋەلسىزدىككە, ءيزرايلدىڭ قاۋىپسىزدىككە قول جەتكىزۋ قۇقىعىن قولداۋعا قاتىستى پوزيتسياسىن قايتا اتاپ, بۇۇ جارعىسىنا جانە بۇۇ قاۋىپسىزدىك كەڭەسىنىڭ ءتيىستى قارارلارىنا سايكەس ەكىجاقتى فورماتتا جانە الدىن الا شارتسىز كەلىسسوزدەردى جۋىق ارادا وتكىزۋگە شاقىردى.
قازاقستاننىڭ وكىلى ءوز سوزىندە سيرياداعى, ليۆانداعى, يراكتاعى, يەمەندەگى جاعدايلارعا توقتالدى جانە 46 مەملەكەتتىڭ بەدەلدى رۋحاني كوشباسشىلارى مەن ءدىني قايراتكەرلەرىنىڭ قاتىسۋىمەن استانادا وتكەن الەمدىك جانە ءداستۇرلى دىندەر كوشباسشىلارىنىڭ VI سەزىنىڭ قورىتىندىسى تۋرالى باياندادى.
«ەگەمەن-اقپارات»
