سالىنىپ جاتقان جاڭا ماگيسترالدار ءبىزدىڭ ەلىمىزدىڭ بارلىق ايماقتارىن ورتالىقپەن بايلانىستىرادى. جۇك تاسىمالى جەدەلدەپ, ەل ارقىلى ترانزيت كولەمى ارتۋدا.
وسى قاتاردا شەكارالىق وڭىرگە جاتاتىن اتىراۋ وبلىسى اۋماعىمەن وتەتىن حالىقارالىق ترانزيتتىك دالىزدەردىڭ جوسپارلانعان رەكونسترۋكتسياسى بولاشاقتا شەكارالاس مەملەكەتتەرمەن كوپجاقتى ىنتىماقتاستىق شەڭبەرىندە ءوڭىردىڭ ترانزيتتىك كۇش-قۋاتىن ارتتىرىپ, ناتيجەسىندە ءوڭىردىڭ ەكونوميكالىق دامۋىنا وڭ اسەرىن تيگىزەتىنى ءسوزسىز.
بىراق «باتىس ەۋروپا – باتىس قىتاي» جوباسىمەن سالىستىرعاندا «اقتوبە – اتىراۋ – استراحان» جوباسىندا ەلدى مەكەندەردىڭ اينالىم جولدارى قاراستىرىلماعان. وسى باعىت جانە «اتىراۋ – ورال» اۆتوموبيل جولدارىنىڭ ترانزيتتىك اعىمى اتىراۋ قالاسىنىڭ ىشكى جولدارى ارقىلى, جىلىوي اۋدانىنىڭ ورتالىعى قۇلسارى قالاسىنىڭ ىشىمەن «دوسسور – قۇلسارى – اقتاۋ» جولى وتەدى. ول تەحنيكالىق ستاندارتتارعا ساي كەلمەيدى جانە جول قاۋىپسىزدىگى تالاپتارىن بۇزۋعا سەبەپ بولۋدا. سونىڭ سالدارىنان وبلىستا تەك 2016-2017 جىلدارى جانە 2018 جىلدىڭ ءبىرىنشى توقسانىندا 74 جول-كولىك وقيعاسى تىركەلىپ, 47 ادام قازا تاۋىپ, 142 ادام ءتۇرلى جاراقاتتار العان. الداعى ۋاقىتتا جول قوزعالىستارىنىڭ قارقىنداۋىنا بايلانىستى جول قاۋىپسىزدىگى ماسەلەلەرى قيىنداي تۇسەرى ءسوزسىز.
تاعى ءبىر كۇردەلى ماسەلە – «اقتوبە – ماقات» جول ۋچاسكەسىن رەكونسترۋكتسيالاۋعا بايلانىستى رەسپۋبليكالىق تاس جول بويىمەن قىزىلقوعا اۋدانى جانە ءارى قاراي اقتوبە وبلىسىنا باعىتتالعان ماڭعىستاۋ وبلىسىنان جانە جىلىوي اۋدانىنان شىققان اۆتوكولىكتەر ماقات اۋدانىنىڭ دوسسور اۋىلىن 260 شاقىرىم اينالىپ وتۋگە ءماجبۇر بولىپ وتىر.
اتالعان ماسەلەلەردى كەشەندى تۇردە شەشۋ ءۇشىن رەسپۋبليكالىق مەنشىككە بەرىلگەن جول جابىندىسى تولىقتاي بۇزىلعان جانە بارلىق جەرىندە قۇرىلىمى توزعان, ۇزىندىعى 135 شاقىرىم «قۇلسارى – مۇقىر» اۆتوموبيل جول ۋچاسكەسىن (جەلىسىن) قايتا قالپىنا كەلتىرۋ قاجەت. بۇل ءبىر جاعىنان, اقتوبە قالاسىنان اقتاۋ قالاسىنا دەيىنگى جولدى 120 شاقىرىم قىسقارتۋعا, ەكىنشى جاعىنان, «دوسسور – قۇلسارى» ۋچاسكەسىنىڭ رەكونسترۋكتسياسىنا جانە بولەك اينالىم جولدىڭ قۇرىلىسىنا بيۋدجەتتەن قوسىمشا شىعىن شىعارماۋعا مۇمكىندىك بەرەدى.
وسىعان بايلانىستى ءبىز ۇكىمەت باسشىسى باقىتجان ساعىنتاەۆتىڭ اتىنا ساۋال جولداپ, «اقتوبە – اتىراۋ – استراحان» ءدالىزى جوباسىن جۇزەگە اسىرۋ بارىسىندا اتىراۋ قالاسىنىڭ اينالىم جولى قۇرىلىسى جانە قۇلسارى قالاسىنىڭ اينالىم جولىمەن قوسا «مۇقىر – قۇلسارى» اۆتوموبيل جولىن رەكونسترۋكتسيالاۋ مۇمكىندىگىن قاراستىرۋدى سۇرادىق.
عۇمار دۇيسەمباەۆ,
سەنات دەپۋتات
