شارت تاراپتارى رەتىندە ءبىلىم جانە عىلىم مينيسترلىگى, باعدارلامانىڭ وپەراتورى – «قارجى ورتالىعى» جانە ەلىمىزدىڭ بىرقاتار جوعارى وقۋ ورىندارى قاتىستى. ولاردىڭ ىشىندە ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى, س.اسفەندياروۆ اتىنداعى قازاق ۇلتتىق مەديتسينالىق ۋنيۆەرسيتەتى, ق.ساتباەۆ اتىنداعى قازاق ۇلتتىق زەرتتەۋ تەحنيكالىق ۋنيۆەرسيتەتى, قازاقستان ينجەنەرلىك-تەحنولوگيالىق ۋنيۆەرسيتەتى, قازاقستان يننوۆاتسيالىق ۋنيۆەرسيتەتى, قازمزۋ ۋنيۆەرسيتەتى, د.قوناەۆ اتىنداعى ەۋرازيا زاڭ اكادەمياسى بار.
كەلىسىمدەردىڭ ناتيجەسىندە وبەكتىلەردى سالۋ جانە رەكونسترۋكتسيالاۋ ارقىلى استانا, الماتى جانە سەمەي قالالارىنىڭ ستۋدەنتتەرى ءۇشىن جاتاقحانالاردا 4 مىڭنان استام جاڭا توسەك-ورىن بەرىلەدى, ونىڭ ىشىندە 2810 جاڭا توسەك-ورىن كەلەسى جىلى بەرىلەدى دەپ جوسپارلانۋدا. الداعى ۋاقىتتا وقۋ ورىندارى جانە الەۋەتتى ينۆەستورلارمەن بىرلەسىپ, جاڭا جوبالاردى جانداندىرۋ كوزدەلۋدە. باستى ماقسات – 2019 جىلى جاڭا 5 مىڭ توسەك-ورىن ەنگىزۋ.
سونىمەن بىرگە, باعدارلاما وپەراتورى مەن قازاقستاندىق يپوتەكالىق ۇيىمى اراسىندا ستۋدەنت جاستاردىڭ تۇرۋ جاعدايلارىن جاقسارتۋ سالاسىنداعى ىنتىماقتاستىق تۋرالى مەموراندۋم جاسالدى.
«وزدەرىڭىزگە ءمالىم, بيىل ەلباسىنىڭ بەس الەۋمەتتىك باستاماسىنىڭ اياسىندا بىرقاتار ۇلكەن جوبالار قولعا الىندى. سونىڭ بىرەگەيى – ستۋدەنتتەردىڭ جاتاقحاناداعى جاعدايىن جاقسارتۋ بويىنشا ءىس شارالار. بۇگىندە ءبىلىم جانە عىلىم مينيسترلىگى, «قارجى ورتالىعى», ەلىمىزدىڭ بىرقاتار جوو-دىڭ اراسىندا كەلىسىمشارتقا قول قويىلدى. بۇل كەلىسىمشارتتىڭ ناتيجەسىندە 4 مىڭعا جۋىق جاڭا ورىن پايدا بولادى جانە ونىڭ 2810-ى 2019 جىلدىڭ سوڭىنا دەيىن ىسكە قوسىلادى. جالپى بۇل مەحانيزمنىڭ ەرەكشەلىگى – مەملەكەت جانە جەكە سەكتور ارىپتەستىگىنىڭ نەگىزىندە قۇرىلۋى. جاتاقحانانى جوو ءوز قاراجاتىنىڭ ەسەبىنەن نەمەسە جەكە سەكتوردىڭ ينۆەستيتسياسىن تارتۋ ارقىلى ىسكە قوسادى. ناتيجەسىندە ءاربىر ىسكە قوسىلعان ورىن ءۇشىن مەملەكەت ەگەر دە ستۋدەنت سول جاتاقحانادا تۇرعان جاعدايدا قۇرىلىس ارقىلى ىسكە قوسىلسا, 122 ايلىق ەسەپتىك كورسەتكىشپەن, ال ەگەر بۇل جاتاقحانا رەكونسترۋكتسيالاۋ ارقىلى ىسكە قوسىلسا وندا 47 ايلىق ەسەپتىك كورسەتكىشپەن تولەنەدى. وسى جىلدىڭ كورسەتكىشىمەن الاتىن بولساق, قۇرىلىس ارقىلى ىسكە قوسىلسا, 122 ايلىق ەسەپتىك كورسەتكىش شامامەن جىلىنا 300 مىڭ تەڭگە. مەملەكەت بۇل قىزمەتتى 96 اي, ياعني جاتاقحانا ىسكە قوسىلعاننان كەيىن 8 جىل جۇرگىزەدى. نەگىزگى شارت جاتاقحانادا ستۋدەنتتەردىڭ تۇرۋى. قازىرگى تاڭدا استانا, الماتى, شىمكەنت سياقتى قالالاردا جاتاقحاناعا سۇرانىس جوعارى. نەگىزگى جوسپار بويىنشا 75 مىڭ ورىندىق جاتاقحانانى ىسكە قوسۋ كەرەك. مۇنىڭ بارلىعى كەزەڭ-كەزەڭىمەن 2019-2021 جىلدار ارالىعىندا ىسكە قوسىلادى. قارجى ورتالىعىنىڭ ءبىلىم جانە عىلىم مينيسترلىگىمەن بىرلەسە جۇرگىزگەن ساراپتاما ناتيجەسىندە 80 مىڭعا جۋىق ورىنعا سۇرانىس بارى انىقتالدى», دەدى «قارجى» اق ورتالىعىنىڭ دەپارتامەنت ديرەكتورى ءبىرجان ءالىمجانوۆ.
راۋان قايدار,
«ەگەمەن قازاقستان»
