«ەلباسى حالىققا ارناعان ءداستۇرلى جولداۋلارىندا دەنساۋلىق ساقتاۋ سالاسىن نازاردان تىس قالدىرعان ەمەس. مەملەكەت باسشىسى العاشقى مەديتسينالىق-سانيتارلىق كومەكتىڭ اسىرەسە اۋىلدى جەرلەرگە دەيىن قولجەتىمدى بولۋىن قامتاماسىز ەتۋ كەرەكتىگىن ايتتى. ياعني, مەديتسينالىق ورتالىقتاردىڭ تەحنيكالىق بازاسىن كوتەرىپ, دارىگەرلەردىڭ بىلىكتىلىگىن ارتتىرۋىمىز قاجەت. جاڭا تەحنولوگيانى كوبەيتۋ, ۋچاسكەلىك دارىگەرلەردىڭ موينىنا ارتىلعان جۇكتى جەڭىلدەتۋ, ساندىق تەحنولوگيا جانە ەلەكتروندى جۇيەگە تولىقتاي كوشۋ ارقىلى ەلىمىزدىڭ مەديتسيناسى دامي تۇسەدى. بۇل قادامدار الداعى ۋاقىتتا تەلەفونمەن دارىگەردەن كەڭەس الۋعا جەتۋگە جول اشادى», – دەدى تاياۋدا تۇركىستان قالاسىنداعى بىرقاتار ەمدەۋ مەكەمەلەرىن ارالاپ, تىنىس-تىرشىلىگىمەن تانىسقان دەنساۋلىق ساقتاۋ ءمينيسترى ەلجان ءبىرتانوۆ.
مينيستر وسى ساپارىندا جوعارى مەديتسينالىق كوللەدجدىڭ جۇمىسىمەن تانىستى. ەلىمىزدەگى ەڭ ۇزدىك كوللەدج اتانعان ءبىلىم ورداسىنىڭ تەحنيكالىق بازاسى زاماناۋي قوندىرعىلارمەن تولىق جابدىقتالعان. 1965 جىلى نەگىزى قالانعان ءبىلىم وشاعىندا بۇگىندە 2,5 مىڭعا جۋىق ستۋدەنت ءبىلىم الۋدا.
كەزدەسۋ بارىسىندا ايماق باسشىسى جانسەيىت تۇيمەباەۆ كوللەدج ستۋدەنتتەرىن ساپالى ءبىلىم الىپ, الداعى ۋاقىتتا تۇركىستان قالاسىندا جاڭادان اشىلاتىن 8 بىردەي مەديتسينالىق مەكەمەگە جۇمىس ىستەۋگە شاقىردى. مينيستر 2013 جىلى اشىلعان 500 ورىنعا لايىقتالعان قالالىق ەمحاناعا دا ات باسىن بۇردى.بۇگىندە ەمدەۋ مەكەمەسىندەگى قىزمەت كورسەتۋ 100 پايىز ساندىق جۇيەگە كوشكەن.
ەلجان ءبىرتانوۆ ىسكەر باسشى مۇقان ەگىزباەۆ باسقاراتىن تۇركىستان وبلىستىق دەنساۋلىق ساقتاۋ باسقارماسى قولدانىسقا ەنگىزگەن وسى جۇيەنى ەلىمىزدەگى وزگە مەكەمەلەرگە ۇلگى ەتۋ كەرەكتىگىن جەتكىزدى. ياعني, كەلەسى جىلدان باستاپ, بارلىق ەمحانالار مەن اۋرۋحانالار مەديتسينالىق قۇجاتتاردى قاعازسىز, تسيفرلىق نۇسقادا جۇرگىزۋگە كوشۋگە مىندەتتەلگەن. بۇل ازاماتتاردىڭ دەنساۋلىق ساقتاۋ كىتاپشالارىنىڭ ەلەكتروندى نۇسقادا جاساۋعا, ەمدەۋ مەكەمەلەردەگى ۇزىن-سونار كەزەكتەردى جويىلۋىنا, بيۋروكراتيادان ارىلۋعا, قىزمەت كورسەتۋ ساپاسىن ارتتىرۋعا مۇمكىندىك بەرمەك.
عالىمجان ەلشىباي,
«ەگەمەن قازاقستان»
